Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр 1 Мусэ 22 Bible Online

1 Мусэ 22 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

1 Мусэ 22

¹А къэхъукъащӀэхэм я ужькӀэ Тхьэм игъэунэхуащ Ибрэхьим, мыр къыжриӀэри: — Ибрэхьим! — Сымис сэ, — жиӀащ абы.

²— Къащтэ уи къуэр, фӀыуэ плъагъу уи къуэ закъуэр, Исхьэкъыр, — жиӀащ Тхьэм, — Морый щӀыналъэм кӀуэи, абдежым къурмэныпхъэу щыгъэс ар бгыхэм ящыщу Сэ уэзгъэлъагъуну зым и щыгум.

³Ибрэхьим къэтэджащ пщэдджыжьэм жьыуэ, и шыдым уанэ трилъхьащ, здришэжьащ и унэӀутхэм ящыщу тӀурэ и къуэ Исхьэкърэ; икъутащ къурмэн мафӀэ зэрищӀыну пхъэр, икӀи зиӀэтри ежьащ Тхьэм жыхуиӀа щӀыпӀэм.

⁴Ещанэ махуэм Ибрэхьим и напӀэр иӀэтри, аддэ жыжьэу къыщилъэгъуащ а щӀыпӀэр.

⁵ЯжриӀащ Ибрэхьим и унэӀутитӀым: — Фыкъанэ мыбдежым, шыдым фригъусэу; си къуэмрэ сэрэ абы дыкӀуэнщи, Тхьэм делъэӀунщ, итӀанэ фи деж къэдгъэзэжынщ.

⁶Ибрэхьим мафӀэ зэрищӀыну пхъэр къищтэри трилъхьащ и къуэ Исхьэкъым и дамэхэм; езым мафӀэрэ сэрэ къыздищтэри, ежьащ тӀури зэгъусэу.

⁷Исхьэкъ и адэ Ибрэхьим мыпхуэдэу жриӀащ: — Си адэ! — Сымис сэ, си къуэ, — жэуап итыжащ абы. — Мис мафӀэри пхъэри, атӀэ дэнэ щыӀэ къурмэныпхъэу дгъэсыну щынэр? — жиӀащ абы.

⁸— Тхьэм къысхухихынущ къурмэныпхъэу Езым хуэдгъэсыну щынэр, си къуэ, — жиӀащ Ибрэхьим. Арати, кӀуэрт адэкӀэ тӀури зэгъусэу.

⁹Нэсащ Тхьэм жыхуиӀа щӀыпӀэм; щиухуащ абдежым Ибрэхьим къурмэнщӀыпӀэ, трилъхьащ пхъэр, икӀи и къуэ Исхьэкъ ипхри, трилъхьащ ар къурмэнщӀыпӀэм, пхъэхэм я щӀыӀукӀэ.

¹⁰Ишиящ Ибрэхьим и Ӏэр, къищтащ сэр, и къуэр иукӀын папщӀэ.

¹¹Ауэ Зиусхьэным и мелыӀычыр уафэм къыхуеджыхри, къыжриӀащ абы: — Ибрэхьим! Ибрэхьим! — Сымис сэ, — жиӀащ абы.

¹²— ХуумыӀэт уи Ӏэр ныбжьыщӀэм, йомыщӀэ абы зыри, — жиӀащ мелыӀычым, — сыт щхьэкӀэ жыпӀэмэ иджы Сэ сощӀэ уэ Тхьэм узэрыщышынэр икӀи сэр папщӀэ уи къуэм, уи къуэ закъуэм, узэрыщымысхьар.

¹³Абдеж Ибрэхьим и напӀэр иӀэтри, илъэгъуащ: мес, и щӀыбагъымкӀэ тӀыр бжьакъуэхэмкӀэ хэнауэ чыцэм хэтщ. Ибрэхьим кӀуэщ, мэлыр къищтэри, къурмэныпхъэу игъэсащ езым и къуэм и пӀэкӀэ.

¹⁴ФӀищащ Ибрэхьим а щӀыпӀэм цӀэ: Иеговэ-ире[28]. (Зиусхьэным къытхуегъуэт). Аращ ноби щӀыжаӀэр: Зиусхьэным и бгым деж къыщытхуигъуэтынущ.

¹⁵Зиусхьэным и мелыӀычыр уафэм къыхуеджыхри,

¹⁶Ибрэхьим къыжриӀащ: — Псалъэ быдэкӀэ жызоӀэ, — жеӀэ Зиусхьэным, — уэ мы Ӏуэхур зэрыпщӀам щхьэкӀэ, икӀи уи къуэм, уи къуэ закъуэм, узэрыщымысхьам щхьэкӀэ,

¹⁷Си нэфӀ ныпщыхуэнущ, уэ къыптехъукӀыну бынхэри згъэбэгъуэнущ, уафэм ит вагъуэхэмрэ хы Ӏуфэм Ӏулъ пшахъуэмрэ я бжыгъэм хуэдизу; икӀи къаӀэщӀыхьэнущ уэ къыптехъукӀыну бынхэм я бийхэм я къалэхэр.

¹⁸Уэ къыптехъукӀыну бынхэм я хьэтыркӀэ дунейм и лъэпкъ псоми си нэфӀ ящыхуэнущ, си псалъэм укъызэредэӀуам папщӀэ.

¹⁹Къигъэзэжащ, арати, Ибрэхьим и унэӀутитӀым я деж, ахэри къэтэджыжри, кӀуэжащ зэгъусэу Бэр-Шэвэ; икӀи щыпсэуащ Ибрэхьим Бэр-Шэвэ.

²⁰А къэхъукъащӀэхэм я ужькӀэ Ибрэхьим хъыбар кърагъэщӀащ, мыр къыжраӀэри: Милкъэ къыхуилъхуащ уи къуэш Нахъорым къуэхэр:

²¹Щыпэрылъхуу Уц, абы и къуэш Буз, Арамэ и адэ Кемуел,

²²Кэсэд, Хазо, Пилдаш, Идлаф, Бэтуел сымэ.

²³Бэтуел къыхуалъхуащ Ребеккэ. А бынийр Милкъэ къыхуилъхуащ Нахъор, Ибрэхьим и къуэшым.

²⁴Абы и унэӀут бзылъхугъэ Рэумэ зи цӀэми къилъхуащ Тэбахъ, Гъахъам, Тахъаш, МэӀах сымэ.