Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр 1 Мусэ 42 Bible Online

1 Мусэ 42 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

1 Мусэ 42

¹Арати, Екъуб къищӀащ Мысырым гъавэ зэрыщыӀэр, яжриӀащ Екъуб и къуэхэм: — Сыт фызыпэплъэр?

²АдэкӀэ пищащ: — Сэ зэхэсхащ Мысырым гъавэ щыӀэу; абы фыкӀуи, къыщытхуэфщэху гъавэ, шхын щхьэкӀэ дымылӀэн папщӀэ.

³Исуф и къуэшипщӀыр кӀуащ Мысырым, гъавэ къыщащэхуну.

⁴Ауэ Биниамин, Исуф и къуэшыр, игъэкӀуакъым Екъуб, зэкъуэшхэм я гъусэу; къыщымыщӀащэрэт зыгуэр, жери.

⁵КъэкӀуащ Израил и къуэхэр гъавэ ящэхуну, адрей къэкӀуахэм ящӀыгъуу; сыт щхьэкӀэ жыпӀэмэ Ханаан щӀыналъэм щыгъаблэт.

⁶АтӀэ Исуф щыӀэтащхьэтэкъэ а щӀыналъэм; ярищэрт абы щӀыналъэм и цӀыху псоми гъавэ. Исуф и къуэшхэр къакӀуэри, щхьэщэ къыхуащӀащ абы, щӀым нэсу.

⁷Исуф и къуэшхэр къилъагъури, къицӀыхужащ ахэр; ауэ ахэр къимыцӀыхужауэ фэ зытригъауэри, епсэлъащ абыхэм ткӀийуэ, мыр яжриӀащ: — Дэнэ фыкъикӀа фэ? — Ханаан щӀыналъэм, гъавэ къэтщэхуну, — жаӀащ абыхэм.

⁸Исуф къицӀыхужащ и къуэшхэр, ауэ езыхэм къацӀыхужакъым ар.

⁹Абдеж Исуф игу къэкӀыжащ езым абыхэм ятеухуауэ илъэгъуа пщӀыхьэпӀэхэр; яжриӀащ абыхэм: — Фэ фытӀасхъэщӀэхщ; фэ фыкъэкӀуащ, мы щӀыналъэм и тӀасхъэхэр зэвгъэлъагъун папщӀэ.

¹⁰— Хьэуэ, ди зиусхьэн, — къыжраӀащ абыхэм Исуф, — уи унэӀутхэр къэкӀуащ гъавэ къащэхуну.

¹¹Дэ псори зы цӀыхум дрикъуэщ; дэ пэжыгъэ зиӀэ дыцӀыхущ; уи унэӀутхэр щытакъым тӀасхъэщӀэхыу.

¹²— Хьэуэ, — яжриӀащ Исуф абыхэм, — фэ фыкъэкӀуащ, мы щӀыналъэм и тӀасхъэхэр зэвгъэлъагъун папщӀэ.

¹³— Дэ, уи унэӀутхэр, зэкъуэш пщыкӀутӀ дохъу, — жаӀащ абыхэм — дэ Ханаан щӀыналъэм щыщ зы лӀым дрикъуэщ, нэхъыщӀэр ди адэм и гъусэщ, ауэ зыр щыӀэжкъым.

¹⁴— Ар дыдэрщ сэри вжесӀар, — яжриӀащ абыхэм Исуф, — фэ фытӀасхъэщӀэхщ.

¹⁵Мис фэ фызэрызгъэунэхунур: фирхьэуным и цӀэмкӀэ тхьэлъанэ сощӀ мыбы фимыкӀыжыну, фи къуэш нэхъыщӀэр мыбы къэмыкӀуауэ.

¹⁶Фэ фщыщ зы вгъакӀуи, кърешэ абы фи къуэшыр; ауэ фэ хьэпсым фыщӀэсынущ. ИтӀанэ къыщӀэщынщ фэ жыфӀэр пэжрэ мыпэжрэ. Мыпэжмэ, фирхьэуным и цӀэмкӀэ тхьэлъанэ сощӀ фэ фытӀасхъэщӀэхыу.

¹⁷ИкӀи яритащ ахэр хъумакӀуэхэм махуищ пӀалъэкӀэ.

¹⁸ЯжриӀащ Исуф абыхэм ещанэ махуэм: — Мыращ фщӀэнур, псэууэ фыкъэнэну фыхуеймэ; сыт щхьэкӀэ жыпӀэмэ сэ сыщошынэ Тхьэм.

¹⁹Фэ пэжыгъэ зиӀэ фыцӀыхумэ, фэ фщыщу фи зы къуэшыр щрыраӀыгъ фэ фыздыщӀаубыда хьэпсым, ар къренэ; мыдрейхэр фыкӀуэж, фшэ гъавэ, фи унагъуэхэр зэрымэжэщӀалӀэм папщӀэ.

²⁰ИтӀанэ фи къуэш нэхъыщӀэр къысхуэфшэ, фи псалъэхэр пэж хъун, фэри фымылӀэн папщӀэ. Апхуэдэуи ящӀащ абыхэм.

²¹ЖаӀэрт абыхэм мыпхуэдэу: — ИпэжыпӀэкӀэ, дэ допшыныж ди къуэшым етщӀэгъа гуэныхьыр. Дэ тлъагъурт абы и псэм телъ хьэзабыр, ар дэ къыщыдэлъэӀум, ауэ дедэӀуакъым. Абы папщӀэ къытлъысащ мы тхьэмыщкӀагъэр.

²²Рубэн абыхэм яжриӀащ: — ВжесӀатэкъэ сэ «НыбжьыщӀэм и гуэныхь къэвмыхь» жысӀэри? Ауэ фэ фыдэӀуакъым; иджы абы и лъыр дагъэпшыныж.

²³Ауэ ящӀэртэкъым абыхэм жаӀэр Исуф къызэрыгурыӀуэр; сыт щхьэкӀэ жыпӀэмэ абыхэм я кум тэрмэш дэтт.

²⁴Абдеж абыхэм ябгъэдэкӀуэтри, гъащ Исуф. ИтӀанэ къабгъэдыхьэжри, епсэлъащ абыхэм, итӀанэ абыхэм Симеон къахишри, псоми ялъагъуу япхыну унафэ ищӀащ.

²⁵АдэкӀэ унафэ ищӀащ Исуф абыхэм я къэпхэм гъавэр из хуащӀыну, щхьэж и дыжьынри къэпхэм хуралъхьэжыну, гъуэмылэ куэди иратыну. Апхуэдэуи хуащӀащ абыхэм.

²⁶Я гъавэр я шыдхэм тралъхьэри ежьэжащ ахэр.

²⁷Абыхэм ящыщ зым и къэпыщхьэр щитӀатэм, жэщым зыщагъэпсэхум шыдым Ӏус иритын папщӀэ, къилъэгъуащ езым и дыжьыныр и къэпым зэрилъыр, гъавэм и щӀыӀукӀэ.

²⁸ЯжриӀащ абы и къуэшхэм: — Си дыжьыныр къызатыжащ; ар къэпым илъщ, гъавэм и щӀыӀукӀэ. Къэгузэващ ахэр, мыпхуэдэу жаӀэрт абыхэм, шынауэ: — Сыт Тхьэм мы къыдищӀар?

²⁹КъэкӀуэжащ ахэр я адэ Екъуб деж, Ханаан щӀыналъэм, абы хуаӀуэтэжащ къащыщӀа псори, мыр жаӀэурэ:

³⁰— А щӀыналъэм щыӀэтащхьэр ткӀийуэ къыдэпсэлъащ, а щӀыналъэм и тӀасхъэ щӀэтхыну дыкӀуауэ жиӀэри.

³¹Дэри абы жетӀащ: «Дэ пэжыгъэ зиӀэ дыцӀыхущ; дытӀасхъэщӀэхкъым.

³²Дэ зэкъуэш пщыкӀутӀ дохъу, ди адэм и къуэхэр; зыр щыӀэжкъым, нэхъыщӀэр ди адэм и гъусэу Ханаан щӀыналъэм щыӀэщ».

³³КъыджиӀащ а щӀыналъэм и Ӏэтащхьэм итӀанэ: «Мис мыпхуэдэущ сэ къызэрысщӀэнур фэ фыцӀыху пэжрэ мыпэжрэ: къысхуэвгъанэ фи къуэшхэм ящыщ зыр; фэ езыхэм къафщтэ гъавэ фи унагъуэхэр зэрымэжэщӀалӀэм папщӀи, фыкӀуэж;

³⁴ИкӀи къысхуэфшэ фи къуэш нэхъыщӀэр; сэ абыкӀэ къэсщӀэнщ фэ фызэрымытӀасхъэщӀэхыр, атӀэ пэжыгъэ зиӀэ цӀыхуу фызырыщытыр; фи къуэшыр фэстыжынщи, хъунущ фэ фыщылажьэ мы щӀыналъэм».

³⁵Абдеж абыхэм я къэпхэр къыщаунэщӀым, щхьэж и къэпым илъщ я дыжьын зэкӀуэцӀыпхахэр. Я дыжьын зэкӀуэцӀыпхахэр зэшхэми абыхэм я адэми щалъагъум, къэшынащ.

³⁶Екъуб, абыхэм я адэм, яжриӀащ и къуэхэм: — Фэ сӀэщӀэфхащ си сабийхэр: Исуф щыӀэжкъым; Симеони щыӀэжкъым; Биниамини сӀэщӀэфхыну фыхуейщ — а псор сшэчын хуей сэ!

³⁷Рубэн и адэм мыпхуэдэу жриӀащ: — УкӀ си къуитӀыр, сэ ар къыщыпхуэзмышэжкӀэ; къилъхьэ ар си ӀэмыщӀэ; сэ къыпхуэсшэжынщ ар.

³⁸— НэкӀуэнукъым си къуэр фи гъусэу, — жиӀащ абы, — сыт щхьэкӀэ жыпӀэмэ абы и къуэшыр лӀэри, а зырщ къэнэжар. Иджы фэ фызытехьэну гъуэгум абы насыпыншагъэ къыщыщыщӀмэ, фэ фи лажьэкӀэ сэ, зи щхьэц тхъуа лӀыжьыр, гуауэм хьэдрыхэ сихьынущ.