Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр Уэрэд 101 Bible Online

Уэрэд 101 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

Уэрэд 101

¹Къин хэтым, епэзэзыхыу, и гукъеуэр Зиусхьэным щыхуиӀуатэкӀэ, жиӀэ тхьэлъэӀу

²Зиусхьэн! Си тхьэлъэӀур зэхэх, си гухэщӀ макъри уи деж щреӀу.

³Гузэвэгъуэ махуэм сщумыгъэпщкӀу уи нэгу! Уи тхьэкӀумэ къысхуэгъазэ, сыныщоджэ махуэм псынщӀэу сызэхэх.

⁴Сыту жыпӀэмэ Ӏугъуэм хуэдэу си махуэхэр блосыкӀ, си къупщхьэхэр пхъэдзакӀэ ныкъуэсым хуэдэщ.

⁵Сигу зэщыуащ, игъукӀащ удзым хуэдэу, абы къыхэкӀыуи си щӀакхъэу сшхыну сщогъупщэ.

⁶Си къупщхьэхэр си гыз макъым си фэм ирагулӀыжащ.

⁷Губгъуэ нэщӀым ис бзуушхуэм хуэдэу сыхъуащ, унэ зэхэкъутам тес жьындум ещхь сыхъуащ.

⁸Сыжейркъым, унащхьэм и закъуэу тес бзум хуэдэу сыщысщ.

⁹Махуэ енкӀэ сауб си бийхэм къысщодыхьэшх си цӀэ жаӀэурэ, цӀыхухэм йобг.

¹⁰ЩӀакхъуэм хуэдэу, яжьэр сошх сэ, псыуэ сызэфэр нэпскӀэ зэхызощӀэ,

¹¹уи губжьым, уигу зэрыплъым къыхэкӀкӀэ; сыту жыпӀэмэ лъагэу сыпӀэтри, сыкъебдзыхыжащ Уэ.

¹²Си махуэхэр пщыхьэщхьэ ныбжьым ещхьщ; удзым хуэдэу сыгъуащ.

¹³Уэ игъащӀэм утесщ уи тахътэм, щӀэблэ къэкӀуэнухэм ящыгъупщэнкъым уи щӀыхь.

¹⁴ЗыкъэпӀэтыжынщ Уэ, уигу щӀэгъунщ Цион; сыту жыпӀэмэ абы фӀы хуэпщӀэну игъуэ нэсащ; пӀалъэр къэсащ;

¹⁵сыту жыпӀэмэ уи ӀурыщӀэхэм абы и мывэ къутахуэхэр фӀыуэ ялъагъу, и яжьи ягу хуогъу абыхэм.

¹⁶ЦӀыху лъэпкъхэм фӀэлӀыкӀ хуаӀэнщ Зиусхьэным и цӀэм, уи гуащӀэм щышынэнщ щӀыгум и пащтыхьхэр.

¹⁷Сыту жыпӀэмэ Цион къалэр зэфӀигъэувэжынщ Зиусхьэным, и щӀыхьым хэту Ар къэлъэгъуэнщ.

¹⁸И нэӀэ къытридзэнщ Ӏэмалыншэхэм я тхьэлъэӀум, я лъэӀухэр Ӏумпэм ищӀынкъым.

¹⁹КъэкӀуэну щӀэблэхэм хуагъэхьэу ятхынщ, къэкӀуэну цӀыхухэм Абы щӀыхь хуащӀынщ:

²⁰сыту жыпӀэмэ и лъагапӀэ лъапӀэм къеплъыхащ; уафэгум щыӀэу, Зиусхьэныр щӀыгум къеплъащ,

²¹хьэпсым исхэм я гыз макъ зэхихыну, укӀ зытралъхьахэр щхьэхуит ищӀыну;

²²Зиусхьэным и цӀэр Цион къалэм къыщраӀуэну, Абы пылъ щӀыхьри Ерусалим щрагъэщӀэну,

²³цӀыху лъэпкъхэр, пащтыхьыгъуэхэр Зиусхьэныр ягъэлъэпӀэну щызэрыугъуейкӀэ.

²⁴Си гуащӀэм, си гъащӀэм и ныкъуэм секӀуэлӀауэ, гъунэм нигъэсащ Абы, си махуэхэр игъэкӀэщӀащ.

²⁵Сэ жысӀащ: «Си Тхьэ! Си махуэхэм я ныкъуэ фӀэкӀ сымыгъэщӀауэ, дунейм сумыгъэхыж. Уэ зи илъэс псори щӀэблэхэм дэщыӀэнум.

²⁶ЩӀыгум лъабжьэхэр хуэбгъэуващ ижьым щыгъуэ, уафэгухэри Уэ уи ӀэщӀагъэщ.

²⁷Ахэр кӀуэдыжынщ, ауэ Уэ сыт щыгъуи ущыӀэнщ; Ахэр псори, щыгъыным хуэдэу, жьы мэхъу, щыгъыным хуэдэу зэблэпхъунщи, хыфӀэбдзэжынщ.

²⁸Ауэ Уэ узытетам узэрытетщ, уи илъэсхэри ухауэ хъункъым.

²⁹Уэ уи ӀурыщӀэхэм я бынхэр шынагъуэншэу псэунщ, къатехъукӀхэри щыбыдэнщ уи пащхьэ».