Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр Уэрэд 102 Bible Online

Уэрэд 102 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

Уэрэд 102

¹Даут и уэрэд Зиусхьэным щӀыхь хуэщӀ, сигу, Абы и цӀэ лъапӀэм щӀыхь хуэфщӀ си гуи си пси.

²Зиусхьэным щӀыхь хуэщӀ, сигу, Абы и фӀыщӀэ псори зыщумыгъэгъупщэ.

³Абы уэ бзаджагъэу пщӀа псори къыпхуегъэгъу, уи узыфэ псори Абы егъэхъуж;

⁴уи гъащӀэр хьэдрыхэм щехъумэ, къыпхуегъэфащэ мыкӀуэдыж лъагъуныгъэрэ гущӀэгъурэ.

⁵Упсэуху уегъэарэзы фӀыгъэкӀэ, уи ныбжьыщӀэгъуи бгъащхъуэм хуэдэу къыпхуегъэзэж.

⁶Хуэтэн ящӀа псоми я хьэкъ ирет Зиусхьэным, хьэкум захуэ яхуещӀ.

⁷Абы и гухэлъхэр Мусэ иригъэщӀащ, и Ӏуэху щӀагъуэхэр — израил цӀыхухэм.

⁸ГущӀэгъулыщ, хьэлэлщ Зиусхьэныр, щӀэх мыгубжьу, мыкӀуэдыж лъагъуныгъэ хэлъщ Абы.

⁹Къогий зэпыту щыткъым Ар, и губжьи куэдрэ иӀыгъкъым.

¹⁰Ди гуэныхьхэм ятехуэр къыдищӀэркъым, ди мыхъумыщӀагъэхэм хуэфащэр дигъэпшыныжыркъым.

¹¹Сыту жыпӀэмэ уафэр щӀыгум зэрыщхьэщылъагэм хуэдэу, фӀэлӀыкӀ хузиӀэхэм мыкӀуэдыж лъагъуныгъэ яхуиӀэщ Зиусхьэным.

¹²Дыгъэ къуэкӀыпӀэр къухьэпӀэм зэрыпэжыжьэм хуэдэу, хабзэншагъэу тщӀахэр Абы тпэжыжьэ ещӀ;

¹³адэм и сабийхэм гущӀэгъу зэрыхуищӀым хуэдэу, Зиусхьэным фӀэлӀыкӀ къыхузиӀэхэм гущӀэгъу яхуещӀ.

¹⁴Ди зэхэлъыкӀэи ещӀэр, дэ сабэм дыкъызэрыхэкӀар ещӀэ.

¹⁵Удзым хуэдэщ цӀыхум и махуэхэр; губгъуэм ит гъэгъауэ абы зыкъызэӀуех.

¹⁶Жьыбгъэр щыщхьэрыкӀкӀэ, егъэгъу, и лъэужь къэмынэу ар мэкӀуэдыж.

¹⁷ФӀэлӀыкӀ хузиӀэхэм лъагъуныгъэ мыкӀуэдыжыр Зиусхьэным яхуиӀэнущ игъащӀэкӀэ. Абы и щыпкъагъи къахуигъэнэнущ цӀыхум и къуэхэм я къуэжхэу,

¹⁸и зэгурыӀуэныгъэм хуэпэжхэу, и унафэхэр зыщамыгъэгъупщэу, ахэр зыгъэзащӀэхэм.

¹⁹Зиусхьэным и тахътэр уафэхэм тригъэуващ, и тепщэныгъэм хэщӀ имыӀэу, псори ӀэщӀэлъщ.

²⁰Зиусхьэным щӀыхь хуэфщӀ фэ, Абы и мелыӀыч псори, гуащӀэ лъэщхэу, и псалъэкӀэ ӀурыщӀэхэу, зыгъэзащӀэхэм Абы и унафэр!

²¹Зиусхьэным щӀыхь хуэфщӀ, и уафэгу дзэ псори, Абы хуэӀурыщӀэхэу, Абы фӀэигъуэр зыгъэзащӀэхэм!

²²Зиусхьэным щӀыхь хуэфщӀ Абы къигъэхъуа псоми, Абы тепщэныгъэр зыщиӀыгъ щӀыпӀэ псоми. ЩӀыхь хуэфщӀ, сигу, Зиусхьэным!