Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр Уэрэд 117 Bible Online

Уэрэд 117 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

Уэрэд 117

¹Зиусхьэным щӀыхь хуэфщӀ, сыту жыпӀэмэ Ар фӀыщ, кӀуэдыжынкъым лъагъуныгъэу дэ Абы къытхуиӀэр.

²Израилым и цӀыхухэм нобэ жыфӀэ: «Абы и лъагъуныгъэр мыкӀуэдыжынщ».

³Дин пашэ псоми нобэ жыфӀэ: «Абы и лъагъуныгъэр мыкӀуэдыжынщ».

⁴Зиусхьэным фӀэлӀыкӀ хузиӀэхэм нобэ жыфӀэ: «Абы и лъагъуныгъэр мыкӀуэдыжынщ».

⁵Гузэвэгъуэм сыхэту Зиусхьэным селъэӀуати, Абы сызэхихри, щӀыпӀэ зэгъым сыкъишащ.

⁶Зиусхьэныр къызгуэтщи, сыкъэщтэнкъым, сыт къызищӀэфын сэ цӀыхум?

⁷Зиусхьэныр дэӀэпыкъуэгъуу къызгуэтщ; си жагъуэгъухэм ятекӀуауэ слъагъунщ.

⁸ЦӀыхум ущыгугъ нэхърэ Зиусхьэныр щхьэегъэзыпӀэ пщӀымэ, нэхъыфӀщ.

⁹Тепщэныгъэ зиӀэхэм уащыгугъ нэхърэ Зиусхьэныр щхьэегъэзыпӀэ пщӀымэ, нэхъфӀщ.

¹⁰ЦӀыху лъэпкъыу щыӀэ псоми сыкъаувыхьащ, ауэ Зиусхьэным и фӀыгъэкӀэ хэзгъэщӀащ ахэр.

¹¹Ӏуву сыкъауреихьащ, ауэ Зиусхьэным и фӀыгъэкӀэ хэзгъэщӀащ ахэр.

¹²Бжьэ къэпщӀам хуэдэу къыстебанэхэри, пыжьей мафӀэу кӀуэдыжащ; Зиусхьэным и цӀэкӀэ сэ ахэр хэзгъэщӀащ.

¹³Сраудын я мураду, лъэщу къыстезэрыгуат ахэр, ауэ Зиусхьэныр сэ къыздэӀэпыкъуащ.

¹⁴Зиусхьэныращ гуащӀэ къызэзытыр, Аращ си уэрэдыр зэхьэлӀар; си КъегъэлакӀуэу хъуащ Ар.

¹⁵Тхьэм хуэщыпкъэхэм псэупӀэу яӀэм текӀуэныгъэм и гуфӀэгъуэ макъыр щоӀу: «Куэд дыдэщ Тхьэм и Ӏэ ижьым хузэфӀэкӀыр!

¹⁶И Ӏэ ижьымкӀэ мауэ Зиусхьэныр, ятрешащӀэ Зиусхьэным и Ӏэ ижьыр, Абы хузэфӀэкӀыр бэ дыдэщ!»

¹⁷СылӀэнкъым, сыпсэун нэхъ, згъэӀунущ Зиусхьэным и ӀуэхущӀагъэхэр.

¹⁸Сигъэпшынащ Зиусхьэным ткӀийуэ, ауэ ажалым сыкъыӀэщӀихащ.

¹⁹КъысхуӀуфх Тхьэм и унэшхуэм и куэбжэр, абы сыщӀыхьэнущ, щӀыхь хуэсщӀынщ Зиусхьэным.

²⁰Мыращ Зиусхьэным и куэбжэр; Абы хуэщыпкъэхэр абы дыхьэнущ.

²¹ЩӀыхь пхузощӀ сызэхэпхыу, сыкъызэребгъэлам папщӀэ.

²²УхуакӀуэхэм хыфӀадзыжа мывэр а унэр зытезыӀыгъэ мывэ лъабжьэ хъужащ.

²³Мыр Зиусхьэным и ӀэщӀагъэ Ӏуэхущ, ар дэркӀэ щӀагъуэ дыдэщ.

²⁴Мыр Зиусхьэным къигъэщӀа махуэщ; дыщывгъэгуфӀыкӀ, дыхуэвгъэжан абы.

²⁵ДынолъэӀу, Зиусхьэн, дыкъегъэл, дынолъэӀу, къыддэгъэхъу ди Ӏуэхухэр!

²⁶Гъуэгу махуэ теуващ Зиусхьэным и цӀэкӀэ къакӀуэр. Зиусхьэным и унэ диту, Абы и нэфӀ къытщыхуэну долъаӀуэ.

²⁷Зиусхэныр Тхьэщ, фӀы къытхуищӀащ, къудамэхэр фӀыгъыу, махуэшхуэр фыублэ, къурмэнщӀыпӀэр къэфкӀухь.

²⁸Сэ си Тхьэр Уэращ: щӀыхь пхуэсщӀынщ; си Тхьэр Уэращ: уи цӀэр лъагэу сӀэтынщ. ЩӀыхь пхузощӀ сызэпхыу, сыкъызэребгъэлам папщӀэ.

²⁹Зиусхьэным и щӀыхьыр фӀэт, мыкӀуэдыжынщ Абы и лъагъуныгъэр.