Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр Уэрэд 118 Bible Online

Уэрэд 118 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

Уэрэд 118

¹Зи гъуэгу къабзэхэр гъуэгу махуэ теуващ — Зиусхьэным и хабзэм и гъуэгу ирикӀуэхэр.

²Гъуэгу махуэ теуващ Абы и псалъэ гъуазэхэр зыгъэзащӀэхэр, гууэ яӀэмкӀэ Абы лъыхъухэр.

³Мыхъун ямыщӀэу, Абы и гъуэгум ирокӀуэ ахэр.

⁴Ди пщэ къыдэплъхьахэм быдэу дытетыну унафэ къытхуэпщӀащ Уэ.

⁵Хабзэу Уэ бгъэувахэр згъэзэщӀэну си гъуэгум лъэ быдэкӀэ срикӀуэурэ,

⁶уи унафэ псоми си нэӀэ ятетмэ, напэншэ сыхъункъым.

⁷ГупцӀэнагъэу сиӀэмкӀэ Уэ щӀыхь пхуэсщӀынщ, уи хьэкум и щыпкъагъэм сригъуазэурэ.

⁸Хабзэу бгъэувахэр згъэзэщӀэнщ; утыкум сыкъыумынэ зэи.

⁹Дауэ ирикӀуэну къабзэу и гъуэгу щӀалэр? — Уи псалъэм тету абы хуэсакъмэщ.

¹⁰Гурэ псэкӀэ сыплъохъу: уи унафэхэм сыдомыгъэх.

¹¹Уи псалъэр сигу ислъхьащ — уи пащхьэ гуэныхь щызмылэжьыну.

¹²ЩӀыхь пхузощӀ Уэ, Зиусхьэн! Хабзэу бгъэувахэм Уэ сыхуэгъасэ.

¹³Си макъкӀэ сӀуатэ зэпытщ Уэ уи жьэ къыжьэдэкӀа хьэкумхэр.

¹⁴Мылъкушхуэм нэхърэ нэхъ згъэлъапӀэу, уи псалъэ гъуазэхэм я гъуэгум сыщогуфӀыкӀ.

¹⁵Согупсыс тхуэпщӀа пщэрылъхэм, уи гъуэгум си нэӀэ тетщ.

¹⁶Хабзэу бгъэувахэм сригуфӀэнщ, сщыгъупщэркъым уи псалъэхэр.

¹⁷Срыуи ӀурыщӀэщ, фӀы къысхуэщӀэ, сыпсэуну, згъэзэщӀэну уи псалъэхэр.

¹⁸Си нэхэр къэгъаплъэ уи хабзэм и щӀагъуэхэр зэзгъэлъагъуну.

¹⁹Сэ дунейм сыщыхьэщӀэщ, сфӀомыущэху уи унафэхэр.

²⁰Уи хьэкумхэм зэпыу имыӀэу сызэрыхуэпабгъэм сригъэшащ.

²¹Уогий Уэ укӀытэ зимыӀэхэм, гыбзэ зытелъхэм, уи унафэхэм текӀхэм.

²²Мыхъун къысхужремыӀэ, Ӏумпэм сремыщӀ, уи псалъэ гъуазэхэр згъэзэщӀащи.

²³Сэ сагъэбийуэ, зэрыгъэӀущыжауэ, тепщэныгъэ зиӀэхэр зэхэсщ; хабзэу бгъэувахэм сэ, уи ӀурыщӀэр, согупсыс.

²⁴Уи псалъэхэр гъуазэщ, абыхэм сагъэгуфӀэ, си чэнджэщэгъущ.

²⁵Сабэм щыщ сыхъуащ, сыкъызэрыбгъэгугъауэ сыкъэгъэпсэуж.

²⁶Сэ гъуэгуу къэскӀуам и хъыбар щыпхуэсӀуатэм, сызэхэпхащ, сахуэгъазэ Уэ хабзэу бгъэувахэм.

²⁷Пщэрылъу къэпщӀахэм я гъуэгур къэсщӀэну къызгурыгъаӀуи, уи Ӏуэху щӀагъуэхэм сегупсысынщ.

²⁸Гукъеуэшхуэм си псэр егъэхыщӀэ: дыкъызэрыбгъэгугъам тету сигу къэгъэбыдэ.

²⁹Гъуэгу пхэнжхэм пэжыжьэ сыщӀи, фӀы къысхуэщӀэ, уи хабзэ сыгъащӀэ.

³⁰Сыпхуэщыпкъэным и гъуэгу къыхэсхащ, уи хьэкумхэр си пащхьэ сщӀащ.

³¹СакӀэрыпщӀащ уи псалъэ гъуазэхэм, Зиусхьэн, напэншэ сумыгъэхъу!

³²СрикӀуэнщ уи унафэхэм я гъуэгум, си акъылыр нэхъ ин пщӀымэ.

³³Хабзэу бгъэувахэм я гъуэгу къэгъэлъагъуи, Зиусхьэн, гъунэм нэс срикӀуэнщ абы.

³⁴Акъыл къызэти, Уэ хабзэу бгъэувам сыдэхынкъым, гууэ сиӀэмкӀэ абы сытетынщ.

³⁵Уи унафэхэм я лъагъуэм сригъакӀуэ, абыхэм сащӀохъуэпсри.

³⁶Мылъкуракъым, уи псалъэ гъуазэхэм сигу хуэгъазэ.

³⁷Си нэм Ӏуэху мыфэмыцым япэӀух, уи гъуэгу сытету гуащӀэ къысхэлъхьэ.

³⁸ФӀэлӀыкӀ къыпхузиӀэхэм епта псалъэр сэ, уи ӀурыщӀэм, къысхуэгъэщыпкъэж.

³⁹Сумыгъэуб, убэным сыщошынэри, сыту жыпӀэмэ уи хьэкумхэр фӀыщ.

⁴⁰Аращ, Уэ къытхуэпщӀа пщэрылъхэм сахуэлӀэ сыхъуащ; Уэ щыпкъагъэ уиӀэщи, сыкъэгъэпсэуж.

⁴¹МыкӀуэдыжын лъагъуныгъэкӀэ къыздызекӀуэ, Зиусхьэн, сыкъызэрыбгъэгугъам тету сыкъегъэл.

⁴²Мыхъун къызжезыӀэхэм жэуап естынщ итӀанэ, сыту жыпӀэмэ сыщогугъ уи псалъэм.

⁴³СӀыумыхыпэ си жьэ къыжьэдэкӀа щыпкъагъэ псалъэр, уи хьэкумым сащогугъри;

⁴⁴Уи хабзэр згъэзащӀэ зэпытынщ игъащӀэкӀэ — лӀэщӀыгъуэм лӀэщӀыгъуэхэр кӀэлъыкӀуэу.

⁴⁵Щхьэхуиту сыкъекӀуэкӀынщ, сыту жыпӀэмэ къытхуэпщӀа пщэрылъхэр згъэзэщӀэным и ужь ситащ;

⁴⁶Уи псалъэ гъуазэхэр пащтыхьхэм я пащхьэ щысӀуэтэнщ, напэншэ сыхъункъым.

⁴⁷Уи унафэхэр си щӀасэщи, сагъэгуфӀэ.

⁴⁸Уи унафэхэу си щӀасэхэм си Ӏэхэр яхузоший, согупсыс хабзэу бгъэувахэм.

⁴⁹Уигу игъэлъ, сэ, уи ӀурыщӀэм, псалъэу къызэптар, Уэ абы сыщыбгъэгугъащ.

⁵⁰ТхьэмыщкӀагъэм сыщыхэткӀэ, гупсэхугъуэ къызэзытыр сыкъэбгъэпсэужыну сыкъызэрыбгъэгугъар арщ.

⁵¹УкӀытэ зимыӀэ цӀыхухэр къызщодыхьэшхыпэ, ауэ Уэ уи хабзэм сэ сыдэхакъым.

⁵²Ижь лъандэрэ хьэкумхэу къэпщӀахэр, Зиусхьэн, сигу къыщыкӀыжкӀэ, гупсэхугъуэ согъуэтыж.

⁵³Уи хабзэ цӀыху бзаджэхэм якъутэу щыслъагъукӀэ, губжьым сызэлъещтэ.

⁵⁴Мы дунейм хамэу сытетыху, хабзэу бгъэувахэр уэрэду сиӀащ.

⁵⁵Уи цӀэр жэщкӀэ сигу къокӀыжри, Зиусхьэн, согъэзащӀэ уи хабзэ.

⁵⁶Аращ сигу хэзыгъахъуэр — къытхуэпщӀа пщэрылъхэр згъэзэщӀэныр арщ.

⁵⁷Сэ си ӀыхьэфӀыр, жысӀащ, Зиусхьэн, Уэ уи псалъэхэр згъэзэщӀэныр арщ.

⁵⁸СигукӀэ щӀэзмыуфэу сынолъэӀу. Сыкъызэрыбгъэгугъауэ, фӀыгъэ къысхуэщӀэ.

⁵⁹Си гъуэгухэм сегупсысащ сэ, псалъэ гъуазэ къэпщӀахэм си лъэр хуэзунэтӀащ.

⁶⁰СыхуопӀащӀэ, уи унафэхэр згъэзэщӀэныр сщӀыркъым кӀыхьлыхь.

⁶¹КъызагъэувэкӀ цӀыху бзаджэхэм я хъыр уи хабзэ сэ сщыгъупщэркъым.

⁶²ЩыпкъагъэкӀэ блэжьа хьэкумхэм папщӀэ щӀыхь пхуэсщӀыну жэщ ныкъуэм сыкъотэджыж сэ.

⁶³ФӀэлӀыкӀ Уэ къыпхуизиӀэ псоми къахуэпщӀа пщэрылъхэр зыгъэзащӀэхэм срагъусэщ.

⁶⁴Уи лъагъуныгъэ мыкӀуэдыжыр, Зиусхьэн, щӀыгум тезщ; сыхуэгъасэ хабзэу бгъэувахэм.

⁶⁵Псалъэу къызэптам тету, сэ, уи ӀурыщӀэм, фӀы къысхуэпщӀащ, Зиусхьэн.

⁶⁶Уи унафэхэм уасэ яхуэсщӀыну икӀи абыхэм сащыгъуэзэну, сыгъащӀэ; сыту жыпӀэмэ уи унафэхэр си фӀэщ мэхъу.

⁶⁷Къин шэчыным сыхыумыгъахуэурэ, сыгъуэщэгъащ, ауэ иджы согъэзащӀэ уи псалъэхэр.

⁶⁸Уэ уфӀщ, фӀыгъуэри къысхубощӀэ. Хабзэу бгъэувахэм, Зиусхьэн, сыхуэгъасэ.

⁶⁹УкӀытэ зимыӀэ цӀыхухэм пцӀы схузэрахъэ; сигурэ си псэкӀэ къытхуэпщӀа пщэрылъхэр сэ согъэзащӀэ.

⁷⁰Абыхэм ягухэм зыхащӀэр мащӀэ хъуащ, сэ уи хабзэхэм срогуфӀэ.

⁷¹СэркӀэ фӀыгъуэщ къин шэчыным сызэрыхэхуар — зэзгъэщӀэн папщӀэ хабзэу бгъэувахэр.

⁷²Уи жьэ къыжьэдэкӀа хабзэр — дыжьын, дыщэ миным нэхърэ нэхъыфӀщ сэркӀэ.

⁷³Уи Ӏэхэм сыкъагъэщӀащ, сагъэпсащ; зэхэзэгъэщӀыкӀи, зэзгъэщӀэнщ уи унафэхэр.

⁷⁴Къыпщышынэхэм сыкъалъагъунщи, уи псалъэм сызэрыщыгугъым папщӀэ ахэр гуфӀэнщ.

⁷⁵Уэ уи хьэкумхэр зэрызахуэр сощӀэ, Зиусхьэн, захуагъэкӀэ сэ Уэ сыбгъэпшынащ.

⁷⁶Уи лъагъуныгъэ мыкӀуэдыжым гупсэхугъуэ къызрет, сэ, Уэ уи ӀурыщӀэм, псалъэу къызэптам тету.

⁷⁷Уи гущӀэгъур къыслъреӀэс, итӀанэ сэ сыпсэунщ; бгъэува хабзэм сэ срогуфӀэ.

⁷⁸УкӀытэ зимыӀэхэр напэншэ ирехъу, лажьэ симыӀэу срагъэзащ; согупсыс къытхуэпщӀа пщэрылъхэм.

⁷⁹ФӀэлӀыкӀ Уэ къыпхузиӀэхэм, уи псалъэ лъапӀэхэр зыщӀэхэм зыкъысхурегъазэ.

⁸⁰Сигу етауэ, сахуоӀурыщӀэ хабзэу Уэ бгъэувахэм напэншэ сымыхъун папщӀэ.

⁸¹Сыкъебгъэлыным сыпэплъэурэ, си псэр изоухылӀэ; уи псалъэм сыщогугъ.

⁸²Сыкъызэрыбгъэгугъам щӀэхъуэпсурэ, си нэхэр йогъукӀ; сэ жызоӀэ: «Сыт щыгъуэ гупсэхугъэ сыщыбгъэгъуэтынур?»

⁸³Фэр Ӏугъуэм зэрищӀым хуэдэу, сэ сызэхогъуэ, ауэ сщыгъупщакъым хабзэу Уэ бгъэувахэр.

⁸⁴Махуэ дапщэкӀэ иджыри сыпэплъэну сэ, Уэ уи ӀурыщӀэр, сыщӀэзыхуэхэм хьэкум сыт щыгъуэ щатепщӀыхьынур?

⁸⁵УкӀыти нэхъуеи зимыӀэхэм мащэр схуатӀащ, Уэ бгъэува хабзэхэм текӀауэ.

⁸⁶Щыпкъэщ уи унафэ псори; пцӀыр къызаупцӀурэ сыкърахуэкӀ; дэӀэпыкӀуэгъу къысхуэхъу.

⁸⁷ЩӀым сыщагъэкӀуэд пэтащ; ауэ сыбгынакъым къытхуэпщӀа пщэрылъхэр.

⁸⁸Уи лъагъуныгъэ мыкӀуэдыжымкӀэ си псэр къегъэл, згъэзэщӀэнщ уи жьэ къыжьэдэкӀ псалъэ гъуазэхэр.

⁸⁹МыкӀуэдыжыну, Зиусхьэн, уи псалъэ уафэгум щыгъэбыдаш.

⁹⁰ЛӀэщӀыгъуэхэр зэкӀэлъыкӀуэу уи щыпкъагъэр щыӀэ зэпытынщ. Уэ щӀыгур бгъэуващи, и пӀэ ар быдэу итщ.

⁹¹Уэ уи хабзэхэм тету зэрыбгъэпсауэ, псори иджыри къыздэсым щытщ, щыӀэ хъуа псори Уэ къыпхуоӀурыщӀэри.

⁹²Уэ бгъэува хабзэр си гурыфӀыгъуэу щымытатэмэ, си хьэзабым секӀуэдылӀэнти.

⁹³ИгъащӀэкӀэ сщыгъупщэнкъым пщэрылъ къэпщӀахэр, абыхэмкӀэ сэ сыкъэбгъэпсэужащ.

⁹⁴Уэ сруейщ сэ — сыкъегъэл; сыту жыпӀэмэ пщэрылъ къытхуэпщӀахэм я ужь ситщ, згъэзэщӀэну.

⁹⁵ЦӀыху бзаджэхэр къызожэ сагъэкӀуэдыну; ауэ сэ уи псалъэ гъуазэхэм согупсыс.

⁹⁶ЩыӀэм я нэхъ нэсахэм гъунэ зэраӀэр слъэгъуащ; ауэ Уэ уи унафэр гъунэншэу инщ.

⁹⁷Сыту си щӀасэ Уэ бгъэува хабзэр! Махуэ псом абы согупсыс.

⁹⁸Си бийхэм нэхърэ нэхъ Ӏущ сищӀащ уи унафэм, ар дапщэщи си гъусэщ.

⁹⁹Сезыгъаджэ псоми нэхърэ нэхъ Ӏущ сыхъуащ; сыту жыпӀэмэ сэ согупсыс уи псалъэ гъуазэхэм.

¹⁰⁰НэжьӀужьым я нэхъыбэ сощӀэ, пщэрылъ къытхуэпщӀахэр дапщэщи сигу илъщи.

¹⁰¹Уи псалъэ згъэзэщӀэн пащӀэ, си лъэр сыт хуэдэ гъуэгу пхэнжи тезгъэувэркъым зэи.

¹⁰²Уи хьэкумхэм защыздзейркъым, сыту жыпӀэмэ сэ Уэ сыбогъасэ.

¹⁰³Уи псалъэхэр сыту фӀэӀэфӀ си бзэгум! Ахэр сэркӀэ фом нэхърэ нэхъ дэгъуэщ.

¹⁰⁴Пщэрылъ къытхуэпщӀахэм акъыл къызатащ; абы къыхэкӀкӀэ слъагъу хъуркъым сыт хуэдэ гъуэгу пхэнжри.

¹⁰⁵Уи псалъэр си лъакъуэм и уэздыгъэщ, си лъагъуэм и нэхунэщ ар.

¹⁰⁶Уи хьэкумхэу щыпкъагъэ зыхэлъхэм сытетыну тхьэлъанэ сщӀащи, ар згъэзэщэнщ.

¹⁰⁷Сыдэкъузауэ сохь сэ, Зиусхьэн; псалъэу къыдэптам тету сыкъэгъэпсэуж.

¹⁰⁸АтӀэ, Зиусхьэн, сэр-сэрэу си бзэкӀэ щӀыхь къурмэну пхуэсщӀыр сӀыхи, уи хьэкумхэр къызгурыӀуэну сыгъасэ.

¹⁰⁹Шынагъуэм си псэр хохуэ[78] зэпымыууэ, ауэ Уэ бгъэува хабзэр сщыгъупщэркъым.

¹¹⁰Сэр папщӀэ хъы ягъэуващ цӀыху бзаджэхэм; ауэ садэхыркъым пщэрылъ къытхуэпщӀахэм.

¹¹¹Уи псалъэ гъуазэхэр мыкӀуэдыжыну си Ӏыхьэщ, сыту жыпӀэмэ гукъыдэж къызат абыхэм.

¹¹²Уэ хабзэу бгъэувахэр игъащӀэкӀэ згъэзэщӀэну, гъунэм нэсыху сигу ислъхьащ сэ.

¹¹³Слъагъу хъуркъым цӀыху гуитӀщхьитӀхэр, ауэ уи хабзэр си щӀасэщ.

¹¹⁴Уэ узихъумапӀэщ, узимэӀущ; уи псалъэм сэ сыщогугъ.

¹¹⁵Фэ, бзаджащӀэхэ, спэжыжьэ зыфщӀи, си Тхьэм и унафэхэм срикӀуэнщ.

¹¹⁶Псалъэу къызэптам тету сыкъэгъэбыди, сэ сыпсэунщ; гугъапӀэу сиӀэмкӀэ сыщӀомыгъэгъуэж.

¹¹⁷СыкъэӀэти, сыкъелынщ сымыкӀуэду, хабзэу бгъэувахэм си нэӀэ тезгъэтынщ зэпымыууэ.

¹¹⁸Хабзэу бгъэувахэм ядэх псори Ӏумпэм уощӀ, я гухэлъ нэпцӀхэр хьэулейщи.

¹¹⁹ЦӀыху бзаджэу щӀым тет псори сахуэм хуэдэу уолъытэ, абы щхьэкӀэ фӀыуэ слъэгъуащ уи псалъэ гъуазэхэр.

¹²⁰ФӀэлӀыкӀыу пхузиӀэм къыхэкӀыу, си пкъынэ-лынэр мэкӀэзыз, уи хьэкумхэм сащошынэ.

¹²¹Къэзлэжьащ сэ захуагъи щыпкъагъи, егъэзыгъэ сызыщӀхэм саӀэщӀумылъхьэ.

¹²²Сэ, уи ӀурыщӀэм, фӀы къызэхъулӀэн папщӀэ, къыздэӀэпыкъу, укӀыти нэхъуеи зимыӀэхэм егъэзыгъэ сремыщӀ.

¹²³Сыкъебгъэлыным, сыкъызэрыбгъэгугъам тету, сызыхэхуам сыкъыхэпшыжыным пэплъэурэ, си нэхэр йогъукӀ.

¹²⁴Уи лъагъуныгъэ мыкӀуэдыжым тету, сэ, уи ӀурыщӀэм, къыспегъуэкӀ, хабзэу бгъэувахэм сыхуэгъасэ.

¹²⁵Сэ срыуиӀурыщӀэщ; зэхэзгъэщӀыкӀи, уи псалъэ гъуазэхэр къызгурыӀуэнщ.

¹²⁶Зиусхьэным и ӀуэхущӀэгъуэ къэсащ; уи хабзэр якъутащ.

¹²⁷Щыпкъэщ, уи унафэхэр фӀыуэ солъагъу; дыщэм, дыщэ къабзэм нэхърэ.

¹²⁸Пщэрылъ къытхуэпщӀа псоми яхузогъазэ си лъэбакъуэхэр[79]; слъагъу хъуркъым сыт хуэдэ гъуэгу пхэнжри.

¹²⁹Уи псалъэ гъуазэхэр щӀагъуэ дыдэщ, абы къыхэкӀкӀэ саблэкӀыркъым сымыгъэзащӀэу.

¹³⁰Уи псалъэхэр ягурыбгъаӀуэурэ, ахэр цӀыхухэм нэхунэ яхуохъу: цӀыху къызэрыгуэкӀхэм зэхэщӀыкӀ къарет.

¹³¹Си жьэ Ӏурыхуауэ, содэӀу уи унафэхэм, сахуопабгъэ сэ абыхэм.

¹³²Си дежькӀэ зыкъэгъази, фӀыгъуэ къысхуэщӀэ, уи цӀэ зи щӀасэхэм уадызекӀуэу уи хабзэщи.

¹³³Дыкъызэрыбгъэгугъам тету, си лъэр гъэбыдэ, бзаджагъэ гуэри къыстемыкӀуэну Уэ щӀы.

¹³⁴Сезыгъэз цӀыхухэм саӀэщӀэх, пщэрылъ къытхуэпщӀахэр згъэзэщӀэнщ.

¹³⁵Уи нэгум и нэхунэ къыстегъапсэ сэ, уи ӀурыщӀэм, сыгъащӀэ хабзэу бгъэувахэр.

¹³⁶Уэ хабзэу бгъэувахэр якъутэри, си нэпсыр къыщӀож.

¹³⁷Щыпкъагъэр зыбохьэ Уэ, Зиусхьэн, уи хьэкумхэр захуэщ.

¹³⁸Псалъэ гъуазэу къытхуэбгъэнахэр щыпкъэщ, дзыхь зрагъэзщ.

¹³⁹Фыгъуэм сеух, си бийхэм уи псалъэхэр ящыгъупщащи.

¹⁴⁰Къабзэ дыдэщ Уэ псалъэу къыдэптар, сэ, уи ӀурыщӀэм, ар фӀыуэ солъагъу.

¹⁴¹СыцӀыкӀущ сэ, сыкърадзэркъым, ауэ сщыгъупщэркъым Уэ пщэрылъ къытхуэпщӀахэр.

¹⁴²Уэ уи щыпкъагъэр мыкӀуэдыжын щыпкъагъэщ, уи хабзэри щыпкъагъэ дыдэщ.

¹⁴³Сызэлъаубыдащ гузэвэгъуэм, гухэщӀым, ауэ уи унафэхэм гухэхъуэ язогъуэтылӀэ.

¹⁴⁴Уи псалъэ гъуазэхэр щыпкъэщ сыт щыгъуи, — зэхэщӀыкӀ къызэт сыпсэуну.

¹⁴⁵СигукӀэ си псэкӀи сыноджэ: сызэхэх, Зиусхьэн, хабзэу бгъэувахэр згъэзэщӀэнщ.

¹⁴⁶Сыноджэ сэ Уэ: сыкъегъэли, уи псалъэ гъуазэхэм срикӀуэнщ.

¹⁴⁷УкъыздэӀэпыкъуну сыноджэ нэхущым и пэ; уи псалъэм сыщогугъ сэ.

¹⁴⁸Жэщ къэрэгъулым нэхъапэ йощ си нэхэр, уи псалъэм куууэ сегупсысын си мураду.

¹⁴⁹Уи лъагъуныгъэ мыкӀуэдыжымкӀэ къызэхэх си макъыр, Зиусхьэн; уи захуагъэм и фӀыгъэкӀэ къегъэл си псэр.

¹⁵⁰БзаджагъэкӀэ сыкъезыхуэкӀхэр къэблэгъащ; Уэ уи хабзэм пэжыжьэщ ахэр.

¹⁵¹Ауэ благъэу ущыӀэщ Уэ, Зиусхьэн, уи унафэ псоми дзыхь худощӀ.

¹⁵²Уи псалъэ гъуазэхэр мыкӀуэдыжыну зэрыбгъэувар куэд щӀащ зэрысщӀэрэ.

¹⁵³Сызыхэт тхьэмыщкӀагъэм къеплъи, сыкъыхэшыж; сыту жыпӀэмэ сщыгъупщэркъым сэ уи хабзэр.

¹⁵⁴Си Ӏуэхум къыхэлажьи, щхьэхуит сыщӀ, уи псалъэкӀэ сыкъэгъэпсэуж.

¹⁵⁵ЦӀыху бзаджэхэр псэууэ къэнэжыным пэжыжьэщ, уи унафэхэм хуэмыныкъуэу ялъытэри.

¹⁵⁶Уэ уи гущӀэгъур ин дыдэщ, Зиусхьэн; уи захуагъэкӀэ сыкъэгъэпсэуж.

¹⁵⁷Куэдщ сыкъезыхуэкӀыу, бийуэ сиӀэр, ауэ уи псалъэ гъуазэхэм сытекӀыркъым.

¹⁵⁸Къыпхуэмыщыпкъэхэр солъагъури, ӀумпӀэм сощӀ ахэр, уи унафэхэр ягъэзащӀэркъым абыхэм.

¹⁵⁹Пщэрылъ къытхуэпщӀахэр зэрызищӀасэр къэлъагъу, уи лъагъуныгъэ мыкӀуэдыжым и хьэтыркӀэ сыкъегъэл, Зиусхьэн.

¹⁶⁰Уэ уи псалъэм и лъабжьэр щыпкъагъэщ, уи хьэкум щыпкъэхэр мыкӀуэдыжынщ.

¹⁶¹Тепщэныгъэ зиӀэхэм сызэрахуэ сылажьэншэу; ауэ сигукӀэ фӀэлӀыкӀ хузиӀэщ уи псалъэм.

¹⁶²Мылъкушхуэ къызыхэхъуам хуэдэу уи псалъэм сегъэгуфӀэ.

¹⁶³ПцӀыр слъагъу хъуркъым, зыщызодзей; Уэ уи хабзэр сэ фӀыуэ солъагъу.

¹⁶⁴Уи щыпкъагъэм и хьэкумхэм папщӀэ махуэм блэнейрэ щӀыхь пхузощӀ Уэ.

¹⁶⁵Гупсэхуныгъэшхуэ ягъуэт Уэ уи хабзэр фӀыуэ зылъагъухэм, ахэр зэтезубыдэн щыӀэкъым.

¹⁶⁶Сыпщогугъ сыкъебгъэлынкӀэ, Зиусхьэн, согъэзащӀэ уи унафэхэри.

¹⁶⁷Уи псалъэ гъуазэхэм я гъуэгу сигукӀэ сытетщ, ахэр фӀы дыдэу солъагъу.

¹⁶⁸Пщэрылъ къытхуэпщӀахэри уи псалъэ гъуазэхэри согъэзащӀэ; сыту жыпӀэмэ уи пащхьэщ сэ си гъуэгухэр.

¹⁶⁹Си гуӀэ макъыр къыплъреӀэс, Зиусхьэн; Сыкъызэрыбгъэгугъауэ, акъыл сэгъэгъуэт.

¹⁷⁰Уи пащхьэ кърехьэ си тхьэлъэӀур; сызэрыбгъэгугъам тету сыхэшыж.

¹⁷¹Уэ хабзэу бгъэувахэр сыбогъащӀэри, щӀыхь пхуэсщӀынщ.

¹⁷²Уэ уи псалъэм уэрэд хужысӀэнщ си бзэкӀэ; сыту жыпӀэмэ уи унафэ псори захуэщ.

¹⁷³Уи Ӏэр дэӀэпыкъуэгъуу среӀэ — пщэрылъ къытхуэпщӀахэм срикӀуэну.

¹⁷⁴СымыкӀуэду сыкъебгъэлыным сыхуопӀащӀэ, Зиусхьэн, уи хабзэм сегъэгуфӀэ.

¹⁷⁵Си псэр ирепсэу; щӀыхьи пхурещӀ, уи хьэкумхэри дэӀэпыкъуэгъу къысхурехъу.

¹⁷⁶Мэл щхьэрыуауэ сыгъуэщащ сэ: сэ, уи ӀурыщӀэр, сыкъэгъуэтыж; сыту жыпӀэмэ сщыгъупщакъым сэ уи унафэхэр.