Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр Уэрэд 131 Bible Online

Уэрэд 131 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

Уэрэд 131

¹Тхьэм и унэшхуэм и щӀыхь. УдэкӀуеиным и уэрэд Уигу игъэлъ, Зиусхьэн, Даут къину илъэгъуа псор;

²уигу къэгъэкӀыж Зиусхьэным тхьэлъану хуищӀар, Екъуб и Тхьэ лъэщым псалъэ зэрыритар;

³«СыщӀыхьэнкъым си унэ шэтырым, си гъуэлъыжыпӀэм секӀуэлӀэжынкъым;

⁴си нэм жей естынкъым; си напӀэхэр къезгъэхуэхынкъым,

⁵Зиусхьэным естыху щӀыпӀэ, Екъуб и Тхьэ лъэщым — псэупӀэ».

⁶Тхьэм и цӀыхухэм ярищӀылӀа зэгурыӀуэныгъэр зыдэлъ пхъуантэм и хъыбар Евфрат[82] щызэхэтхащ, ЯӀар[83] и губгъуэхэм къыщыдгъуэтащ ар.

⁷«И псэупӀэ дыкӀуэнщи, и лъакъуэ зытетым деж щхьэщэ хуэтщӀынщ».

⁸Уи гупсэхупӀэ унэшхуэм кӀуэ, Зиусхьэн — Уэри зэгурыӀуэныгъэм и пхъуантэу уи лъэкӀыныгъэшхуэр къэзыгъэлъагъуэри.

⁹Дин пашэу уиӀэхэм щыпкъагъэр я фащэ ирехъу, уи цӀыху лъапӀэхэри макъышхуэкӀэ ирегуфӀэ.

¹⁰Даут, уи ӀурыщӀэм, и хьэтыркӀэ, пащтыхьыну къыхэпхам нэмыплъ йомыт.

¹¹Зиусхьэным щыпкъагъэкӀэ Даут псалъэ быдэ иритыгъащ, и псалъэм епцӀыжынукъым ар; «Уэ къыпхуэхъуну къуэхэм ящыщ уи тахътэ тезгъэтӀысхьэнщ,

¹²зэгурыӀуэныгъэ ядэсщӀми, унафэ яхуэсщӀми, уи къуэхэр абыхэм яхуэщыпкъэмэ, абыхэм я къуэхэри уи тахътэм игъащӀэм тесынщ абы щыгъуэм».

¹³Сыту жыпӀэмэ Зиусхьэным Цион къалэр къыхихащ; ар псэупӀэ зыхуищӀыну фӀэигъуэ хъуащ.

¹⁴«Мыр игъащӀэкӀэ си гупсэхупӀэщ, мыбы цӀыхухэр щызгъэӀурыщӀэнщ; сыту жыпӀэмэ апхуэдэу хъумэ, сфӀэигъуащ.

¹⁵Цион къалэр зыхущыщӀэ псори ирикъуу езгъэгъуэтынщ, тхьэмыщкӀэу дэсхэр згъэшхэнщ щӀакхъуэкӀэ.

¹⁶И дин пашэхэм япкъ къикӀыу, цӀыхухэр мыкӀуэду къезгъэлынщ. Тхьэм и цӀыху лъапӀэхэр макъышхуэкӀэ къэгуфӀэнщ.

¹⁷Даут къытехъукӀынухэм ящыщ пащтыхьышхуэ щысщӀынщ, хэсха пащтыхьыр, уэздыгъэм хуэдэу, Цион къалэм къыщызэщӀэзгъэнэнщ, и тепщэныгъэ лъызгъэкӀуэтэнщ.

¹⁸Абы и бийхэм я напэр трезгъэхынщ, абы езым и дыщэ тажыр лыдыжу щхьэрыгъынщ».