Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр Уэрэд 142 Bible Online

Уэрэд 142 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

Уэрэд 142

¹Даут и уэрэд Зиусхьэн, си тхьэлъэӀу къызэхэх; уи щыпкъагъэкӀэ къедэӀу си лъэӀум; щыпкъэу уиӀэмкӀэ зыкъысхуэгъазэ,

²срыуиӀурыщӀэщи, хьэкум къыстумыщӀыхь, сыту жыпӀэмэ псэухэм ящыщ Уэ уи пащхьэ хей щыхъунукъым.

³Бийр си ужь итщ, си гъащӀэр щӀым хиутащ; куэд щӀауэ лӀахэм яхуэдэу кӀыфӀым сыщыпсэуну сищӀащ;

⁴Аращ, гукӀуэдыгъуэ щӀыпӀэ ситщ, гууэ сиӀэри, щтэм къыхэкӀыу, бзагуэ хъуащ.

⁵Сигу къокӀыж пасэрей махуэхэр, согупсыс уи ӀуэхущӀагъэ псоми, уэ уи ӀэкӀэ блэжьа Ӏуэхухэр сигукӀэ зэхызоху сэ.

⁶Си Ӏэхэр ныпхузоший Уэ; псы хуэлӀа щӀыгум хуэдэу, си псэр къыпщӀохъуэпс.

⁷ЩӀэхыу зыкъысхуэгъазэ, Зиусхьэн; си гум хулъэкӀыжыркъым; хьэдрыхэ кӀуэжхэм хуэдэ сымыхъун щхьэкӀэ, уи нэгу сщумыгъэпщкӀу.

⁸Уи лъагъуныгъэ мыкӀуэдыжым и хъыбар пщэдджыжьым зэхэзгъэх, сыту жыпӀэмэ сыпщогугъ. СызэрыкӀуэн хуей гъуэгур сыгъащӀэ, сыту жыпӀэмэ си гур Уэ пхузэӀузох.

⁹Си бийхэм саӀэщӀэх, Зиусхьэн; щхьэегъэзыпӀэу уи деж сынокӀуэ.

¹⁰ПфӀэигъуэр згъэзэщӀэну сыгъасэ, Уэращ си Тхьэр; Уэ уи Псэ ЛъапӀэм и фӀыгъэкӀэ гъуэгу занщӀэ-захуэм сришэ.

¹¹Уи цӀэм и хьэтыркӀэ, Зиусхьэн, сыкъегъэл; щыпкъагъэу зепхьэмкӀэ къиныпӀэм сыкъишыж.

¹²МыкӀуэдыж лъагъуныгъэу пхэлъымкӀэ си бийхэр зэтеукӀэ, къыспэув псори гъэкӀуэд, сэ срыуиӀурыщӀэри.