Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр Уэрэд 25 Bible Online

Уэрэд 25 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

Уэрэд 25

¹Даут и уэрэд Сызэрыхейр къыхэгъэщ, Зиусхьэн, мыхъун збгъэдэмылъу сызекӀуащи, Зиусхьэным сыщогугъ сэ, сигукӀэ шэч къытезмыхьэу.

²Сыгъэунэху, Зиусхьэн, сыуплъэкӀу; си гуи си пси гъэунэху;

³сыту жыпӀэмэ Уэ уи лъагъуныгъэ мыкӀуэдыжыр си нитӀкӀэ солъагъу, щыпкъагъэ пхузиӀэу сопсэу[16].

⁴ЦӀыху хьилэхэм садэтӀысыркъым сэ, напитӀ зиӀэ цӀыхухэми сахыхьэркъым.

⁵БзаджащӀэхэм я гупыр слъагъу хъуркъым, цӀыху щӀэпхъаджэхэми гъусэ сахуэхъуркъым.

⁶Си Ӏэ хейхэр стхьэщӀурэ, Зиусхьэн, къызокӀухь уи къурмэнщӀыпӀэр,

⁷фӀыщӀэ зыхэлъ уэрэд жысӀэурэ, уи Ӏуэху щӀагъуэхэр яхузоӀуатэ.

⁸Зиусхьэн! Уэ уи унэ псэупӀэ фӀыуэ солъагъу, уи щӀыхьым и псэупӀэри аращ.

⁹Си псэр ядыхомых гуэныхьыщӀэхэм, лъым щӀэнэцӀхэм садомыгъэкӀуэд —

¹⁰ер зылэжьу, зи Ӏэ ижьым Ӏулъхьэр из зыщӀахэм.

¹¹Сэ сызэрыкъабзэу сопсэу; сыхэшыж, гущӀэгъу къысхуэщӀ.

¹²Сэ гъуэгу захуэм сытетщ; Зиусхьэным и щӀыхьыр щысӀуэтэнщ зэхуэсышхуэм.