Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр Уэрэд 32 Bible Online

Уэрэд 32 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

Уэрэд 32

¹Даут и уэрэд Зиусхьэным гуфӀэгъуэ хэвгъуатэ Тхьэм хуэщыпкъэхэм; зигукӀэ захуэхэм щӀыхь ящӀыныр къокӀу.

²ШыкӀэ пшынэкӀэ щӀыхь хуэфщӀ Зиусхьэным, уэрэд хужыфӀэ бзэпсипщӀ зытелъ пшынэ дыкъуакъуэкӀэ.

³УэрэдыщӀэ хужыфӀэ Абы; бзэпскӀэ хужыфӀэ хуэӀэзэу, макъыр хэфӀэтыкӀыурэ хужыфӀэ.

⁴Сыту жыпӀэмэ Зиусхьэным и псалъэхэр захуэщ. Абы и Ӏуэху псоми щыпкъагъэ хэлъщ.

⁵Абы и щӀасэщ щыпкъагъэр, захуагъэр, Зиусхьэным и лъагъуныгъэ мыкӀуэдыж щӀыгум тезщ.

⁶Зиусхьэным езым и псалъэкӀэ уафэгухэр къигъэщӀащ, и унафэкӀэ — уэгум къыщынэхухэр.

⁷Хыпсхэр иугъуеящ Абы зэтезэрыгуэу, хы кууупӀэхэр угъуеипӀэхэм Абы иригъэхъуащ.

⁸Щрешынэ зэрыщӀыгуу Зиусхьэным; дунеишхуэм тет псори Абы и пащхьэм щрекӀэзыз.

⁹Сыту жыпӀэмэ Абы жиӀэри — къэхъуащ; унафэ ищӀри — къэлъэгъуащ.

¹⁰Зиусхьэным хамэ лъэпкъхэм къаухэсыр зэхекъутэ, зэхекъутэ цӀыху лъэпкъхэм я гухэлъхэр.

¹¹Зиусхьэным къиухэсар игъащӀэкӀэ щыӀэнущ; и гупсысэхэри лӀэужь псоми ядызекӀуэнущ.

¹²Гъуэгу махуэ теуващ Зиусхьэныр зи Тхьэ цӀыху лъэпкъыр, Езым и ӀыхьэфӀыр зрита лъэпкъыр.

¹³Уафэм щыӀэ Зиусхьэныр къоплъыхри, цӀыху псори елъагъу,

¹⁴И тахътэм зэрытесу, щӀыгум тет псори елъагъу.

¹⁵Псоми ягухэр Абы егъэпс, я Ӏуэху псори зэхещӀыкӀ.

¹⁶Дзэшхуэми хуэхъумэнкъым пащтыхьыр; хуэхъумэнкъым щэджащэр, и гуащӀэр ин дыдэми.

¹⁷УкъригъэлынкӀэ дзыхьщӀыгъуэджэщ шыр, абы и гуащӀэ лъэщми ухишыжынкъым.

¹⁸Аращ, Зиусхьэным щышынэу, Абы и лъагъуныгъэ мыкӀуэдыжым щыгугъхэм и нэӀэ ятригъэтщ Абы,

¹⁹щихъумэну ажалым, гъаблэм щыгъуэ шхын щимыгъэщӀэну.

²⁰Дэ дигукӀи ди псэкӀи Зиусхьэным дыщогугъ: Ар ди дэӀэпыкъуэгъущ, ди мэӀущ;

²¹дэ дигухэр Абы къегъэжан; сыту жыпӀэмэ дэ дыщогугъ Абы и цӀэ лъапӀэм.

²²Дыпщогугъри, Зиусхьэн, уи лъагъуныгъэ мыкӀуэдыжыр ди щхьэщыгу ирет.