Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр Уэрэд 48 Bible Online

Уэрэд 48 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

Уэрэд 48

¹УэрэдыӀуэхэмрэ пшынауэхэмрэ я пашэм папщӀэ. Корах и къуэхэм я уэрэд. Уэрэд

²Мыбы фыкъедаӀуэ цӀыху лъэпкъ псори; мыр зэхэфх, дунеишхуэм тет псори —

³цӀыху къызэрыкӀуи, цӀэрыӀуи, беи, тхьэмыщкӀи!

⁴Си псалъэм акъылышхуэ хэлъщ, си гупсысэхэм — зэхэщӀыкӀ.

⁵Псалъэжьым хуэзгъэзэнщ си тхьэкӀумэ; пшынэдыкъуакъуэм и макъкӀэ зэхезгъэщӀыкӀынщ си щэху.

⁶Къин махуэхэм сыт сыщӀэшынэнур, сыщӀэзыхуэхэм я бзаджагъэм сыкъыщаувыхькӀэ?

⁷Я беигъэм щогугъ ахэр, мылъкушхуэ яӀэм зыщегъэтхъуж!

⁸Дауэ зищӀми, и псэ ищэхужын лъэкӀынкъым цӀыхум, абы и уасэ Тхьэм иритыни лъэкӀынкъым.

⁹Абы и псэр щэхужыгъуейщ, абы и уасэ тыгъуейщ —

¹⁰игъащӀэкӀэ псэуну, хьэдрыхэ имылъагъуну.

¹¹Хэти елъагъу акъылыфӀэхэри зэрылӀэр; ахьмакъхэри акъылыншэхэри зэрылӀэу, я мылъкур нэгъуэщӀым къыхуонэ.

¹²Абыхэм я бэныр[34] унэ яхуэхъунущ игъащӀэкӀэ, къэхъуну щӀэблэхэм псэупӀэ яхуэхъунущ, щӀыгу я уней яӀами.

¹³Щытхъуи мылъкуи иӀами, псэущхьэ кӀуэдыжым хуэдэ хъунщ цӀыхур.

¹⁴Мыращ зи щхьэ щыгугъыжым къехъулӀэнур, Ӏыхьэу яӀэмкӀэ зыхуэарэзыжхэм кӀэух яхуэхъунур:

¹⁵мэлым хуэдэу, яхунщ хьэдрыхэ, ажалыр Ӏэхъуэу яӀэнщ, бэным щӀэх ехыжынурэ,[35] я Ӏэпкълъэпкъыр кӀуэдыжынущ, абыхэм я псэупӀэр — хьэдрыхэщ.[36]

¹⁶Ауэ Тхьэм си псэр ищэхужынщ, ажалым сыӀэщӀихынщи, сызришэлӀэжынщ.

¹⁷ЦӀыхур бей хъуми, абы и быным и щӀыхь багъуэми, ущымышынэ абы, зомыгъэгъэгузавэ,

¹⁸зыри зыдищтэнукъым, лӀамэ; и щӀыхьыр кӀэлъыкӀуэнукъым абы.

¹⁹Псэуху насыпыфӀэу зилъытэми, зыхуейр къызэрехъулӀэм папщӀэ и щытхъу яӀуатэми,

²⁰ар и адэжьхэм — нэхунэр зымылъагъужынухэм — я деж кӀуэжынущ.

²¹Щытхъуи мылъкуи иӀэми, псэущхьэ кӀуэдыжым хуэдэ хъунущ цӀыхур.