Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр Уэрэд 5 Bible Online

Уэрэд 5 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

Уэрэд 5

¹УэрэдыӀуэхэмрэ пшынауэхэмрэ я пашэм папщӀэ. БжьамиймкӀэ дожьу. Даут и уэрэд

²Къызэхэх си псалъэр, Зиусхьэн, си щэӀу макъым къедэӀу.

³КъыщӀэдэӀу си гуо макъым, си Пащтыхь, си Тхьэ, Уэращ сызэлъэӀур.

⁴Зиусхьэн! Нэхущ нэхъыпэу си макъыр къызэхыбохри, нэхущыгъуэм си Ӏуэхухэр уи пащхьэ изолъхьэри сыножьэ —

⁵Уэ мызахуагъэр фӀыуэ зымылъагъу Тхьэуэ узэрыщытым щхьэкӀэ; бзаджагъэм лъэкӀынкъым уи гъусэн.

⁶Щхьэщытхъухэм ялъэкӀынкъым уи пащхьэ иувэн. БзаджащӀэ псори Уэ уи жагъуэщ.

⁷ПцӀы зыупсхэр уогъэкӀуэд Уэ; лъыгъажэмрэ хьилагъэмрэ Зиусхьэным нэмыплъ ярет.

⁸Ауэ сэ, лъагъуныгъэ мыкӀуэдыж къысхуэпщӀащи, сыкъихьэнщ Уи унэ, сыпфӀэлӀыкӀыу уи унэшхуэ лъапӀэм ущызгъэлъэпӀэнщ.

⁹Зиусхьэн! Си бийхэм ягу хэбгъэщӀу, уи щыпкъагъэм и гъуэгукӀэ сызешэ. Уи гъуэгур занщӀэ къысхуэщӀ.

¹⁰Сыту жыпӀэмэ абыхэм я бзэгупэм щыпкъагъэ телъкъым, я гурылъхэр узэкӀуэдылӀэнщ, я джийхэр бэн зэӀухащ, я жьэм къыжьэдэкӀыр щытхъу нэпцӀщ.

¹¹Я къуаншагъэм ирехьыж ахэр, си Тхьэ, я гухэлъ бзаджэхэм трекӀуэдэж; гуэныхьу ящӀар бэщ, зыкъыпхуаӀэтащи, уи пащхьэ иумыгъэт ахэр.

¹²ЩхьэегъэзыпӀэ Уэ узыщӀ псори ирегуфӀэ, гуфӀэгъуэшхуэм игъащӀэкӀэ хэту уэрэд жреӀэ. Къэхъумэ Уэ ахэр; ЩӀыхь къыпхуащӀынщ уи цӀэр зыгъэлъапӀэхэм.

¹³Сыту жыпӀэмэ щыпкъагъэ зиӀэм уи нэфӀ ящохуэ, Зиусхьэн; уи нэгум и фӀыгъэр, мэӀум хуэдэу, абы хъумакӀуэ хубощӀ.