Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр Уэрэд 50 Bible Online

Уэрэд 50 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

Уэрэд 50

¹УэрэдыӀуэхэмрэ пшынауэхэмрэ я пашэм папщӀэ. Даут и уэрэд

²Батшэбэ бзылъхугъэм деж ихьа нэужь, Натан бегъымбарыр къыщыхуэкӀуэм, Даут иуса уэрэд.

³Лъагъуныгъэ мыкӀуэдыжу пхэлъымкӀэ, ди Тхьэ, гущӀэгъу къысхуэщӀ, си хабзэншагъэхэр схуэгъэкӀуэд уи гущӀэгъуныгъэкӀэ.

⁴СкӀэрыгъэкъэбзыкӀыж бзаджагъэу злэжьар, си гуэныхь къысхуэгъэгъуи, къабзэ сыщӀыж.

⁵Сыту жыпӀэмэ бзаджагъэу злэжьар зыдызощӀэж, гуэныхьу злэжьахэр си пащхьэ илъщ.

⁶Уэ зырщ, Уэ зыращ гуэныхь зэзлэжьылӀар, мыхъуну Уэ плъытэр сэ зэспэсыжащ, Уэ къыстеплъхьар захуагъэщ, сыт къысхуэжыпӀэми захуагъэщ, сыщыбгъэмысэкӀи ухейщ.

⁷Аращ, сигу илъащ бзаджагъэ — си анэ и ныбэ сызэрилъ лъандэрэ, си анэ сыкъызэрилъху лъандэрэ, гуэныхьыр сигу илъащ.

⁸Аращ Уэ пфӀэигъуэр, цӀыхум игу илъыну щыпкъагъэр, Аращи, акъылыфӀагъэм и щэхухэр сыгъащӀэ.

⁹Къыстеутхи иссоп[37], къабзэ сыхъужынщ, сытхьэщӀи, уэсым нэхъ хужь сыхъужынщ.

¹⁰ГуфӀэгъуэрэ нэщхъыфӀагъэмрэ я хъыбар зэхэзгъэхи, гужьеигъуэм сыхэбдзауэ щытыгъами, сыгуфӀэжынщ.

¹¹Гуэныхьу злэжьам Уэ уемыплъ, гъэкӀуэдыж си гуэныхьхэр псори.

¹²Тхьэ, къысхэлъхьэ сэ гу къабзэ, зэблэхъу си гурылъыр, къэгъэбыдэ сигу.

¹³Уи пащхьэ сумыгъэкӀ, Уэ уи Псэ ЛъапӀэр сигу имылъыну умыщӀ,

¹⁴сыкъызэребгъэлым и гуфӀэгъуэр къыслъреӀэс, гу хьэзыр сиӀэну сыгъэбыдэ.

¹⁵Хабзэншэхэр хуэзгъэсэнщ уи гъуэгум, уи деж къагъэзэжынщ гуэныхь зыщӀахэм.

¹⁶Лъы гъэжэным сыщыхъумэ, Уэ, Тхьэм, сымыкӀуэду сыкъезыгъэла Тхьэм, уи щыпкъагъэм щӀыхь хуэсщӀынщ си бзэкӀэ.

¹⁷Зиусхьэн! Си жьэ къызэтехи, Уэ щӀыхь пхуэсщӀынщ.

¹⁸Сыту жыпӀэмэ Уэ къурмэн ухуейкъым — сэ къурмэн пхуэсщӀынт, къурмэн гъэсынми уигу хуэкӀуэркъым.

¹⁹Тхьэм дежкӀэ къурмэн щыпкъэр зигу хэщӀарщ, игу къутауэ щӀегъуэжар ӀэщӀыб пщӀынукъым.

²⁰ФӀыгъэу пхэлъымкӀэ фӀы хуэщӀэ Цион[38] къалэм, Ерусалим и блынхэр зэтегъэувэж.

²¹Абы щыгъуэ Уи гуапэ хъунщ щыпкъагъэкӀэ пхуащӀ къурмэнхэр, зэрыпсэууэ ягъэс къурмэнхэр, Абы щыгъуэ къытралъхьэнщ уи къурмэнщӀыпӀэм танэхэр.