Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр Уэрэд 58 Bible Online

Уэрэд 58 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

Уэрэд 58

¹УэрэдыӀуэхэмрэ пшынауэхэмрэ я пашэм папщӀэ. «СумыгъэкӀуэд» мэкъамэр щӀэлъэу ягъэӀу. Даут иукӀын папщӀэ, Шаул ар къэрэгъулыну и унэм щигъэкӀуам щыгъуэ Даут иуса уэрэд

²СаӀэщӀэхыж си бийхэм, си Тхьэ! Сащыхъумэ къыспэувхэм!

³СаӀэщӀэхыж бзаджащӀэхэм; лъым щӀэнэцӀхэм саӀэщӀэхыж.

⁴Сыту жыпӀэмэ ахэр къощэ си псэм; цӀыху мэхъаджэхэр зэкъуэтщ, къыстебэнэнхэу ягу илъу; хабзэншагъэкӀэ сыпсэуауэ, гуэныхь злэжьауэ аракъым, Зиусхьэн;

⁵лажьэ симыӀэми, зэрыгъэугъуеяуэ, загъэхьэзыр къызэзэуэнхэу; укъыздэӀэпыкъуну къэтэдж, сыкъэлъагъу.

⁶Уэращ Зиусхьэныр, лъэкӀыныгъэ псори зиӀэ Тхьэр, Уэращ Израилым и Тхьэр, хамэ лъэпкъхэр бгъэпшынэну къэтэдж, уащымысхь къумал гъэпцӀакӀуэхэм.

⁷Ахэр пщыхьэщхьэкӀэ къокӀуж, хьэхэм хуэдэу пщӀэууэ, къалэ гъунэхэм къыщаджэдыхь.

⁸Убэ псалъэхэр къытраупцӀэ абыхэм я жьэкӀэ; я бзэгухэр джатэм хуэдэщ, сыту жыпӀэмэ иогупсыс: «Хэт дызэхэзыхыр?»

⁹ауэ Уэ, Зиусхьэн, абыхэм уащодыхьэшх, хамэ лъэпкъхэр псори мыскъарэ уощӀ.

¹⁰Уэращ гуащӀэ къызэзытыр; Уэращ сызэплъынур, сыту жыпӀэмэ Уэ, ди Тхьэ, быдапӀэу узиӀэщ.

¹¹Лъагъуныгъэ мыкӀуэдыж къысхузиӀэ си Тхьэр къыздеӀэнщ; си бийхэм ятекӀуауэ Тхьэм сигъэлъагъунщ.

¹²Уащымысхь абыхэм, ауэ умыгъэкӀуэдыпэ, си цӀыху лъэпкъым ящымыгъупщэнхэу; икъухь унэншэу; уи гуащӀэкӀэ къедзых, Зиусхьэну ди мэӀуху.

¹³Я жьэм къыжьэдэкӀ гуэныхьым папщӀэ, я Ӏупэм телъ псалъэхэм папщӀэ абыхэм я пагагъэр еудых. Зэрыубэм, пцӀы зэраупсым папщӀэ

¹⁴яхуэгубжьи, гъэкӀуэд, гъэкӀуэд щымыӀэжынхэу; щӀыгу гъунэхэм нэсуи Израилым и Тхьэм тепщэныгъэ зэрахуиӀэр ирещӀэ.

¹⁵Ахэр пщыхьэщхьэкӀэ къокӀуэж, хьэхэм хуэдэу пщӀэууэ, Къалэ гъунэхэм къыщаджэдыхь.

¹⁶Къегъаджэдыхь, яшхыным лъыхъуэу, яшхын щамыгъуэткӀэ мэгъуахъуэ.

¹⁷Нэхущым щегъэжьауэ уи гуащӀэм и щӀыхь уэрэд жысӀэнщ, уи лъагъуныгъэ мыкӀуэдыжым и уэрэд; сыту жыпӀэмэ гузэвэгъуэ сыщыхэт махуэм Уэращ сэ быдапӀэуи щхьэегъэзыпӀэуи сиӀар.

¹⁸Уэращ гуащӀэ сэ къызэзытыр! ЩӀыхь уэрэд пхужысӀэнщ, сыту жыпӀэмэ Уэращ, ди Тхьэ, быдапӀэу сиӀэр, Уэращ Тхьэуэ лъагъуныгъэ мыкӀуэдыж къысхуэзыщӀыр.