Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр Уэрэд 67 Bible Online

Уэрэд 67 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

Уэрэд 67

¹УэрэдыӀуэхэмрэ пшынауэхэмрэ я пашэм папщӀэ. Даут и уэрэд

²Къретэдж Тхьэр, зэбгрырекӀыж Абы и бийхэр. Ар зылъагъу мыхъухэр Абы и пащхьэ ирекӀыж!

³Зэбгрыху Уэ ахэр, Ӏугъуэр зэрыкӀуэдыжым хуэдэу; Тхьэм и пащхьэ щрекӀуэд бзаджащӀэхэр, мафӀэм шэхур зэригъэткӀум хуэдэу.

⁴Тхьэм хуэщыпкъэхэм гукъыдэж ирегъуэтыж, Тхьэм и пащхьэм щрегуфӀэж, ХъеркӀэ гуфӀэгъуэшхуэ ирыреӀэ.

⁵Ди Тхьэм уэрэд хужыфӀэ, Абы и цӀэм щытхъу уэрэд хужыфӀэ, Уафэгум щызекӀуэм щӀыхь хуэфщӀ; Абы и цӀэр Зиусхьэнщ; Абы и пащхьэ фыщыгуфӀэ.

⁶Ибэм я адэу, фызабэм я хъумакӀуэу, Тхьэр и псэупӀэ лъапӀэм щыӀэщ.

⁷Зи закъуэхэр Тхьэм унэм щегъэпсэу, Ӏэхъулъэхъур ярехыж, гухуит-щхьэхуит ещӀыж хьэпсым исхэр, зызыгъэкъейгъэхэр къум нэщӀ пщтырым къренэ.

⁸Ди Тхьэ! Уи цӀыху лъэпкъым и пэ уиту, къум нэщӀым къыщыщыпкӀухьым,

⁹щӀыр хъеящ, къежэхащ уэшхыр, Уэ, Тхьэуэ, Израилым и Тхьэу — Синай къущхьэм[44] къыщылъэгъуа Тхьэм и пащхьэ.

¹⁰Уэшхышхуэ къебгъэшхащ Уэ, Тхьэм, уи хэгъэгу гуащӀаджэр зэтебгъэувэжащ.

¹¹Абы итӀысхьащ Уэ уи цӀыху лъэпкъыр; Уэ уи фӀыгъэкӀэ, ди Тхьэ, бгъэхьэзыращ тхьэмыщкӀэхэр зыхуэныкъуэ псори.

¹²Зиусхьэным унафэ ищӀащ: Бзылъхугъэбэм текӀуэныгъэм и хъыбар зэрахьащ.

¹³Дзэм я пащтыхьхэм щӀатхъуж, мажэ, ауэ унэм къина бзылъхугъэхэм, чэтым къыщӀэна пэтми, къуентхъыр ягуэш:

¹⁴зи дамэхэр дыжьыныпс егъэфауэ, зи къабзийхэр дыщэ къабзэкӀэ псыхьауэ тхьэрыкъуэ анэм хуэдэ пкъыгъуэхэр.

¹⁵ЛъэкӀыныгъэ псори зиӀэ Тхьэм, пащтыхьхэр щызэбгрихужым, Цалмон къущхьэм уэс къыщригъэсащ.

¹⁶Тхьэм и къущхьэщ — Башан къущхьэр! Щыгубэ зиӀэ къущхьэщ — Башан къущхьэр!

¹⁷Сыт уэ, шыгубэ зиӀэ къущхьэр, уехъуапсэу ущӀеплъыр Тхьэм псэупӀэкӀэ игу ирихьа къущхьэм[45] — Зиусхьэныр игъащӀэкӀэ зыщыпсэунум?

¹⁸Тхьэм и хьэрыгъажэхэр бэ дыдэщ, миным къыщызэтенэркъым. Абыхэм яхэту, Зиусхьэныр Синай къущхьэм къехри, и унэшхуэ лъапӀэм щӀыхьащ.

¹⁹Ар Ӏуащхьэ лъагэм дэкӀащ, гъэрхэр зыдришеящ, цӀыхухэм тыгъэхэр къратащ, Тхьэр къизымыдзэ къейгъэшыхэри яхэту. Зиусхьэну Тхьэр абы щыпсэунущ.

²⁰ЩӀыхьышхуэр ейщ Зиусхьэну ди къинхэр махуэ къэси зезыхьэм; Езыращ дыкъезыгъэлыр.

²¹Тхьэр дэркӀэ Тхьэ къегъэлакӀуэщ; Зиусхьэну ди Зиусхьэныращ ажалым дыӀэщӀэзыхыжыр.

²²Тхьэм икъутэнщ и бийхэм я щхьэр, щхьэщыгу бацэхэу хабзэншэ гъуэгум щыкъейгъэхэр.

²³Зиусхьэным жиӀащ: «Башан къыщезгъэгъэзэжынщ, къыщӀэсшыжынщ хым и щӀэм уи бийхэр,

²⁴уи хьэхэр зэрыхэфым хуэдэу бийм и лъым уи лъакъуэхэр хэбгъэувэну».

²⁵Тлъэгъуащ узэрызекӀуэр, Уэ, си Тхьэуэ си Пащтыхь, Унэшхуэ лъапӀэм узэрыщызекӀуэр;

²⁶уэрэдыӀуэхэр япэ итащ, пшынауэхэр я ужькӀэ кӀуащ, фэнтӀрыпӀхэр зыӀыгъ пщащэхэр яку дэтащ:

²⁷«Фэ, Израил къытекӀахэр, зэхуэсышхуэм фыхэту Тхьэуэ Зиусхьэным щӀыхь щыхуэфщӀ!»

²⁸Бин-Ямин лӀакъуэу я нэхъ цӀыкӀур япэ итщ; Иудэ пщыхэр я гупым хэту, Зэбулон пщыхэри Нафталый пщыхэри къакӀэлъокӀуэ.

²⁹Зэхэугъуае уи гуащӀэ, си Тхьэ, къэгъэнаӀуэ гуащӀэу къытхуэбгъэлъэгъуар.

³⁰Ерусалим дэт унэшхуэм ущыӀэу, Уэ къыпхуахь пащтыхьхэм я тыгъэхэр.

³¹ГъэӀурыщӀэ Мысырырэ къамылым хэс хьэкӀэкхъуакӀэхэр, гъэӀурыщӀэ цӀыху лъэпкъхэу шкӀэхэр зыхэт вы хъушэхэм хуэдэхэр; абыхэм псоми щхьэщэ къыпхуащӀу я дыжыныр къыпхуахьыху, икъухь зауэм щӀэхъуэпс цӀыху лъэпкъхэр.[46]

³²ЦӀыху лъэрыхьхэр къикӀынщ Мысырым; Тхьэм трашэщӀэнщ я Ӏэхэр — Ефиопием[47] щыщ цӀыхухэм.

³³ЩӀыгум и пащтыхьыгъуэхэм Тхьэм уэрэд хужыфӀэ, уэрэдкӀэ фӀуатэ Зиусхьэным и щӀыхьыр —

³⁴уафэгум я уафэгужым игъащӀэкӀэ къыщызыкӀухьым. Абы Езым и макъ къеӀэт — гуащӀэшхуэ зиӀэ макъыр.

³⁵Тхьэм щӀыхьыр ефпэс! Тепщэныгъуэшхуэ хуиӀэщ Абы Израилым, гуащӀэ ин дыдэу Абы хэлъыр пшэм хыболъагъуэ.

³⁶Уи унэшхуэм, ди Тхьэ, щынагъуэшхуэ щыуиӀэщ. Израилым и Тхьэм и цӀыху лъэпкъым гуащӀэрэ лъэкӀыныгъэрэ кърет. Тхьэм щӀыхьышхуэ хуэфщӀ!