Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр Уэрэд 73 Bible Online

Уэрэд 73 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

Уэрэд 73

¹Тхьэм и лъэпкъыр къригъэлын папщӀэ тхьэлъэӀу. Асаф и уэрэд Сыт щхьэкӀэ, ди Тхьэ, дыхыфӀэбдзэжыпа? Уи хъупӀэм ит мэлым уи губжьыр сыт щхьэкӀэ яхузэщӀэбгъэплъа?

²Уи цӀыху лъэпкъыу, къызэрыхэпхрэ бэ щӀауэ, зи щхьэ пщэхужыгъар уи лъэпкъ хъуну уигу къэгъэкӀыж. Цион Ӏуащхьэу уи псэупӀэ зыдэщыӀари уигу къэгъэкӀыж.

³ЛӀэщӀыгъуэбэ зи ныбжь къутахуэхэм нэхъ благъэу екӀуалӀэ: уи унэшхуэм и кӀуэцӀ псори зэхикъутащ бийм.

⁴Бийхэр уи унэшхуэм текӀуэныгъэм ипкъ къикӀыкӀэ щыгъуэхъуащ; я бэракъхэр фӀадзащ абы.

⁵Мэзым щӀэт лӀыуэ жыгхэр джыдэкӀэ изупщӀыкӀым хуэдащ ахэр[54].

⁶Джыдэрэ уадэкӀэ зэ уэгъуэм зэхакъутащ сурэт хэбзыкӀа дахэхэр;

⁷Уи унэшхуэр мафӀэм ирагъэхьащ лъабжьэм нэсыху; Уэ узыщагъэлъапӀэ унэшхуэр яуцӀэпӀащ.

⁸ЯгукӀэ жаӀащ: «ЛъапсэкӀуэдыр къахуэдгъэкӀуэнщ абыхэм». Тхьэм и зэӀущӀапӀэу хэкум итхэр ягъэсащ.

⁹Дызэрыгъуэзэн нэщэнэ щӀагъуэ тлъагъужыркъым, бегъымбари щыӀэжкъым, апхуэдэу зэрыщытынур зыхуэдизыр къыджезыӀэни къытхэтыжкъым.

¹⁰Сыт хуэдизрэ, ди Тхьэ, бийм мыскъарэ узэрищӀынур, Уэ уи цӀэр ягъэпудыну игъащӀэкӀэ?

¹¹Сыт щхьэкӀэ уи Ӏэр, уи Ӏэ ижьыр епхьэкӀрэ? Сыт щхьэкӀэ уи Ӏэр уи гуфӀакӀэ дэбгъэлърэ?

¹²Ди Тхьэ, пащтыхьу удиӀэщ ижь-ижьыж лъандэрэ, ди хэку текӀуэныгъэ куэд къыхуэпхьащ!

¹³Хыр гуащӀэу уиӀэмкӀэ зэгуэпчащ, хым хэс псэущхьэ бзаджэхэм я щхьэхэр яхуэпкъутащ.

¹⁴Левиатыным[55] и щхьэхэр пкъутэри, губгъуэ нэщӀым ис цӀыхухэм гъуэмылапхъэ ящӀыну ептащ.

¹⁵Псы къыщӀэжыпӀэ къэпщӀащ Уэ, псыр къэбутӀыпщащ, Уэ псышхуэхэр ибгъэгъукӀащ.

¹⁶Махуэр ууейщ Уэ, жэщри ууейщ; Дыгъэмрэ къэзыгъэнэхумрэ Уэ къибгъэуващ.

¹⁷Уэ бгъэуващ щӀыгу гъунапкъэхэр, гъэмрэ щӀымрэ бгъэнэхуащ Уэ.

¹⁸АтӀэ уигу къэбгъэкӀыжыркъэ: Зиусхьэныр бийм къеуб, цӀыху акъылыншэхэм уи цӀэр ягъэпуд, Зиусхьэн.

¹⁹Уи цӀыхухэу уи тхьэрыкъуэ Ӏэсэхэр хьэкӀэкхъуэкӀэм яӀэщӀумылъхьэ[56]; Уи цӀыхухэу тхьэмыщкӀэхэр, хуэмыщӀахэр зыщумыгъэгъупщэ.

²⁰ЗэгурыӀуэныгъэу къыдэпщӀылӀам еплъыж, щӀыгу псом и къуапэ кӀыфӀхэм цӀыху залымхэм я псэупӀэхэр из хъуащ.

²¹ЛъэгущӀэт ящӀа цӀыхум и напэр трумыгъэх, тхьэмыщкӀэмрэ хуэмыщӀамрэ уи цӀэр ирегъэлъапӀэ.

²²Зыкъэужьи, ди Тхьэ, хъумэ уи Ӏуэхухэр, цӀыху акъылыншэхэм махуэ къэс узэраубыр уигу къэгъэкӀыж;

²³уи бийхэм я кӀий макъи къыппэувхэм зэпымыууэ ягъэӀу макъи зыщумыгъэгъупщэ.