Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр Уэрэд 77 Bible Online

Уэрэд 77 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

Уэрэд 77

¹Асаф и усэ КъедаӀуэ, си цӀыху лъэпкъ, ныбжесӀэм, си жьэ къыжьэдэкӀ псалъэхэм фи тхьэкӀумэр къыхуэвгъазэ.

²Пасэрей псалъэ къыхэздзэн сфӀэигъуэщ, пасэрейм хъыбар щэхуу жаӀахэр къэсӀуэтэнщ —

³зэхэтхауэ, дэ зэдгъэщӀауэ, ди адэжьхэм къытхуаӀуэтэжауэ.

⁴Ди сабийхэм ящыдущэхункъым Зиусхьэным илэжьауэ, щытхъу зыпылъ Ӏуэху щӀагъуэхэр. Абы и гуащӀэ, и ӀэщӀагъэ гъэщӀэгъуэнхэр ди ужь къихъуэну щӀэблэм яхуэтӀуэтэжынщ.

⁵Екъуб къытехъукӀахэм[59] псалъэ гъуазэ къахуигъэнэхуащ Абы. Израил лъэпкъым хабзэ яхуигъэуващ. Ди адэжьхэм унафэ къахуищӀащ ахэр я сабийхэм хуаӀуэтэжыну —

⁶къэхъуну щӀэблэхэм иджыри къамылъхуа сабийхэм ящӀэнщи, пӀалъэр къэсмэ, дяпэкӀэ къалъхунухэм хуаӀуэтэжынщ абыхэми.

⁷Я гугъэ хуагъэзэнщ Тхьэм итӀанэ, Тхьэм и Ӏуэхухэр ящымыгъупщэу, и унафэхэр ягъэзэщӀэнщ.

⁸Я адэжьхэми хуэдэнкъым — ерыщхэу, Тхьэм пэувхэу, теубыдагъэ зимыӀэхэу, зигу — зи псэкӀэ Тхьэм хуэмыщыпкъэхэм.

⁹Эфраим дзэлӀхэр шабзэкӀэ зэщӀэузэдауэ, зауэ махуэм къикӀуэтащ.

¹⁰Тхьэм ядищӀа зэгурыӀуэныгъэм текӀащ ахэр, Абы и хабзэкӀэ псэун ядакъым.

¹¹Ящыгъупщащ и Ӏуэхухэри, телъыджэу къаригъэлъэгъуахэри.

¹²Мысыр щӀыгум ит Цоан губгъуэм, я адэжьхэм ялъагъуу, Абы телъыджащэхэр къыщигъэлъэгъуащ;

¹³Хыр зэгуихури, псыр блыну игъэуври, зэпришащ ахэр;

¹⁴махуэм — пшэр, жэщ псом мафӀэм и нэхур япэ иту, къришэкӀащ ахэр.

¹⁵Губгъуэ нэщӀым бгыр щикъутэри, лъащӀэ куу дыдэм кърихри, псы иригъэфащ загъэнщӀыху.

¹⁶Бгым псы къыщӀигъэжри, псы уэр къриутӀыпщхьэхащ.

¹⁷Ауэ гуэныхь щӀэныр Абы и пащхьэм щызэпагъэуакъым. Псоми Я Нэхъ Лъагэм пэуву, губгъуэ нэщӀым зыщагъэкъейгъащ.

¹⁸Ягу ирихь гъуэмылым щӀэдэууэ, ягукӀэ зэдащӀэурэ Тхьэр ягъэнэхуащ.

¹⁹Тхьэм игу хагъэщӀу, жаӀащ: «Къум нэщӀым Ӏэнэ щигъэувын лъэкӀыну Тхьэм?

²⁰Щыпкъэщ. Ар къырэм еуэри, псы къыщӀигъэжащ, псынэхэри къыщиудащ. ЩӀакхъуэ къыдитын лъэкӀын и цӀыху лъэпкъым, лыкӀэ къахуэупсэфын?»

²¹Ар зэхихри, Зиусхьэныр губжьым зэщӀиубыдащ, Екъуб къытехъукӀахэм мафӀэ яридзри, и губжьыр израил лъэпкъым хуигъэлъэщащ.

²²Тхьэр я фӀэщ хъуртэкъыми, Абы къригъэлыным щыгугъакъым ахэр.

²³ИщхьэкӀэ щыӀэ пшэхэм унафэ яхуищӀри, уафэгум и бжэхэр къызэӀуихащ;

²⁴мэнн шхыныгъуэр уэшхым хуэдэу къахуригъэхри, къаритащ уафэгу гъуэмылэр.

²⁵МэлыӀыч гъуэмылапхъэр цӀыхум яшхащ, Абы къарита шхынымкӀэ псоми загъэнщӀащ.

²⁶Абы уафэгум къригъэхри, жьыбгъэр къригъэпщащ, Езым и гуащӀэкӀэ жьапщэр кърихужьащ.

²⁷ИтӀанэ, сабэм хуэдэу, лыр абыхэм къахуригъэхащ, хы Ӏуфэ пшахъуэм хуэдэу — къуалэбзури;

²⁸я увыпӀэм, я шэтырхэм деж ахэр къригъэтӀысэхащ.

²⁹Шхащ ахэр, загъэнщӀащ, къаритащ зыщӀэхъуэпсар.

³⁰Ауэ я гъаблэгу имыкӀ щӀыкӀэ, шхыныр я жьэм иджыри жьэдэлъу,

³¹Тхьэм и губжьыр абыхэм къахуэкӀуэри, я нэхъ гуащӀафӀэхэр яхиукӀыкӀащ, израил щӀалэ хэплъыхьахэр Абы игъэкӀуэдащ.

³²ИтӀани гуэныхь лэжьыныр абыхэм зэпагъэуакъым, Абы и телъыджащэхэр ялъэгъуа пэтрэ, я фӀэщ хъуакъым.

³³Абы щхьэкӀэ я махуэхэр зэ жьыкъэшэгъуэкӀэ игъэбзэхащ, я илъэсхэри яригъэхьащ шынагъуэ хэт зэпыту.

³⁴Ящыщ куэд щахиукӀыкӀым, къэнам Абы зыхуагъэзэри, Тхьэм и гъуэгу лъыхъуэу щӀадзащ;

³⁵ягу къэкӀыжащ Тхьэр езыхэм зэряабрэмывэр, Псоми Я Нэхъ Лъагэр щхьэщэхужу зэраӀэр.

³⁶Ягу имылъу щӀыхь хуащӀурэ, пцӀы щаупсащ Абы и пащхьэм.

³⁷Щыпкъагъэ хураӀакъым Абы ягукӀэ. Абы къарищӀылӀэгъа зэгурыӀуэныгъэми хуэщыпкъэжакъым.

³⁸ИтӀани гущӀэгъу къахуищӀри, я бзаджагъэ яхуигъэгъуащ, игъэкӀуэдакъым, и губжьыр куэдрэ ирикъухыжащ, гъунэм нэсу зэщӀимыгъаплъэу.

³⁹Абы щыгъупщатэкъым — ахэр цӀыху къудейщ, жьы къепща нэхъей, кӀуэдыжынущ, абы къыгъэзэжыркъым.

⁴⁰Къум нэщӀым дапщэрэ Абы щыпэува ахэр, загъэкъейгъэуэ, цӀыху зэрымыс хэкум и гуи щыхагъэщӀа!

⁴¹ЩӀэрыщӀэуи Ар ягъэунэхуащ, Израилым и Тхьэ ЛъапӀэм щхьэкӀуэ ирахащ.

⁴²Абыхэм ящӀэжыртэкъым Тхьэм и гуащӀэ здынэсри, бийм къащыӀэщӀихыжа махуэри,

⁴³Мысырым ит Цоан губгъуэм телъыджащэу, нэщэнэ щӀагъуэу къыщигъэлъэгъуахэри.

⁴⁴Япсхэри я псыкъуэжхэри лъы защӀэ ищӀащ абы, ефэ мыхъужыну;

⁴⁵гъудэбадзэр къахуигъэкӀуащ, къедзэкъэнхэу; екӀуэдылӀэну — хьэндыркъуакъухэр;

⁴⁶щӀыгу къыщыкӀхэр — хьэпӀацӀэм, я гъавэр мацӀэм яритащ;

⁴⁷я санэр икъутащ уэфкӀэ, я ахъуо жыгхэр псыдзэм иригъэхьащ;

⁴⁸я былымхэр зэтриукӀащ, я мэл хъушэхэм щыблэр къахидзащ.

⁴⁹МафӀэлыгъей яридзащ Абы, губжьри, гузэвэгъуэри, тхьэмыщкӀагъэри — зыгъэкӀуэд мелыӀыч гупым хуэдэу.

⁵⁰И губжьым гъуэгур хузэӀуихащ, ажалым щихъумакъым ахэр, емынэм иригъэхьащ.

⁵¹Мысырым, Хьамэ и хэкум, щыпэлъху щӀалэ цӀыкӀухэр щигъэкӀуэдащ;

⁵²и лъэпкъыр, мэл хуэдэ, иришэжьащ, мэл хъушэм хуэдэу къум нэщӀым иришащ;

⁵³Ишащ ахэр шынагъуэ къалъимыгъэӀэсу, ауэ я бийхэр хым щӀригъэлъэфащ;

⁵⁴и хэку лъапӀэм иришащ ахэр, Езым и Ӏэ ижьымкӀэ къызыхуихьыжьам;

⁵⁵цӀыху лъэпкъхэр абы ирихури, я щӀыгур ятригуэшащ абыхэм, Израилым и цӀыху лъэпкъхэр я унэхэм щӀигъэтӀысхьащ.

⁵⁶Ауэ Тхьэуэ Псоми Я Нэхъ Лъагэр ягъэунэхуащ абыхэм иджыри, пэувурэ загъэкъейгъэт, и псалъэ гъуазэхэм едаӀуэртэкъым;

⁵⁷икӀуэтыжащ, я адэхэм хуэдэу, я дуней тетыкӀэ щыпкъагъэ хэлътэкъым, шабзэшэ щхьэрыуа нэхъей, гъуэгум дэхырт.

⁵⁸ЩӀыпӀэ лъагэхэм тхьэ нэпцӀхэм тхьэлъэӀупӀэхэр хутрагъэувэурэ, ягъэгубжащ Ар. Тхьэ нэпцӀ сурэтхэмкӀэ фыгъуагъэ игу кърагъэхьащ.

⁵⁹Абыхэм ящӀар щилъагъум, Ар губжьышхуэм зэщӀищтащ, Израил зэримыпэсу хъуащ.

⁶⁰И псэупӀэр Шило[60] щибгынащ — цӀыхум щахэтам щыгъуэ иӀа унэр.

⁶¹ЗэгурыӀуэныгъэм и пхъуантэр[61] бийм и Ӏэм ирилъхьащ Абы — И лъэкӀыныгъэр, и щӀыхьыр зыдэлъар.

⁶²И цӀыху лъэпкъыр джатэм и щӀагъ ищӀащ, Езым и цӀыхухэм яхуэгубжьащ Ар.

⁶³Я щауэхэр зауэм и мафӀэм ихьагъэххэти, нысашэ уэрэд жаӀэжыртэкъым я пщащэхэм.

⁶⁴Я щоджэнхэр[62] джатэм хигъэщӀащ, я лӀахэр ягъэеин ялъэмыкӀыжу фызабэхэр къызэхэнащ.

⁶⁵Ауэ Зиусхьэныр къызэщыужам хуэдэу, санэм игъэжакъуэ цӀыхум ещхьэу,

⁶⁶зэкӀэщӀихуащ и цӀыху лъэпкъым и бийхэр, емыкӀу мыухыж къахуихьащ.

⁶⁷Исуф къытехъукӀахэм хуэмейуэ, Эфраим лӀакъуэри Абы къыхихакъым,

⁶⁸къахихар Иудэ и лӀакъуэрщ, Цион Ӏуащхьэу фӀыуэ илъэгъуар.

⁶⁹И унэшхуэр игъэуващ уафэ лъагэхэм хуэдэу; щӀыгуу игъэпсам хуэдэу, игъэбыдащ ар игъащӀэкӀэ.

⁷⁰Езым и и ӀурыщӀэ Даут къахихащ, мэлхэр зыдэт пщӀантӀэу

⁷¹хъушэм щакӀэлъыплъым къыдишри, Израилым и пащтыхь ищӀащ, мэлыхъуэм хуэдэу, Тхьэм и цӀыху лъэпкъыр къришэкӀыну.

⁷²Гу къабзэкӀэ абыхэм хуэлэжьащ, И Ӏэ угъурлымкӀэ къришэкӀащ ахэр.