Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр Уэрэд 79 Bible Online

Уэрэд 79 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

Уэрэд 79

¹Пшынауэхэмрэ уэрэдыӀуэхэмрэ я пашэм папщӀэ. «Шошаним-Эдут» уэрэдым и макъамэр щӀэлъу. Асаф и уэрэд

²Израилым и мэлыхъуэ! КъэдаӀуэ; Мэлым хуэдэу Исуф къезышэкӀым, мелыӀычым ящхьэкӀэ тесым зыкъегъэлъагъу

³Эфраим, Бин-Ямин, Мэнашэ. Уи гуащӀэ къехьэжьи, ди бийм даӀэщӀэпхыжыну къытхуэкӀуэ.

⁴Уэ, ди Тхьэ! Зыпкъ дигъэувэж; уи нэгум и нэху къыттегъапсэ, дымыкӀуэду дыкъелыну!

⁵Зиусхьэн, лъэкӀыныгъэ псори зиӀэ ди Тхьэ! Уи цӀыху лъэпкъым и тхьэлъэӀум сыт хуэдизрэ хуэпщӀыну губжьыр?

⁶Уэ нэщхъеягъуэ щӀакхъуэкӀэ дыбгъэшхащ, нэпс бэ дыдэ щӀэдбгъэгъэкӀащ.

⁷Гъунэгъухэр къыдоныкъуэкъу, ягукӀэ къытщодыхьэшх ди бийхэр.

⁸ЛъэкӀыныгъэ псори зиӀэ ди Тхьэ! Зыпкъ дигъэувэж. Уи нэгум и нэху къыттегъапсэ, дымыкӀуэду дыкъелыну!

⁹Мысырым санащхьэ бжьалэр къипхащ, цӀыху лъэпкъхэр ипхури, ар хэпсащ;

¹⁰Абы папщӀэ щӀапӀэ бгъэкъабзэри, и къуэпсхэм куууэ зыщадзым, щӀыгум тезыбзэ хъуащ.

¹¹Абы и ныбжьыр бгыхэм тридзащ, и бжьалэхэм я ныбжьыр — ашэ жыг лъагэхэм.

¹²Абы и бжьалэхэм хым[64] нэс задзащ, и къудамэхэр псым[65] нэсащ.

¹³Санащхьэм къещӀэкӀа бжыхьыр сыт щхьэкӀэ бгъэуа? Абы къыпыкӀэр блэкӀ псоми пач абы къыхэкӀкӀэ.

¹⁴Мэзыкъуэм къыщӀетӀыкӀ ар, губгъуэ хьэкӀэкхъуэкӀэ псоми яшх.

¹⁵ЛъэкӀыныгъэ псори зиӀэ ди Тхьэ! Зыкъытхуэбгъазэркъэ, уафэм къеплъыхи, къыдэплъ, мы санащхьэми уи нэӀэ тегъэт —

¹⁶уи Ӏэ ижьым игъэтӀысам.

¹⁷Бийхэм ар мафӀэкӀэ зэхагъэсхьащ, зэхаупщӀэтащ; губжьым ухэту яхэплъи, гъэкӀуэд.

¹⁸Уэ хэпха хъулъхугъэм уи Ӏэ тешиящ, цӀыхум и къуэу Уэр папщӀэ лэжьэн зылъэбгъэкӀым, гуащӀэ епту.

¹⁹Апхуэдэу щытмэ, игъащӀэкӀэ дэ удбгынэнкъым; дыкъэгъэпсэужи, уи цӀэм щӀыхь хуэтщӀынщ.

²⁰Зиусхьэну лъэкӀыныгъэ псори зиӀэ ди Тхьэ! Зыпкъ дигъэувэж; уи нэгум и нэху къыттегъапсэ, дымыкӀуэду дыкъелыну!