Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр Лука 1 Bible Online

Лука 1 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

Лука 1

¹Ди пащхьэм щекӀуэкӀа Ӏуэхухэм я хъыбар ятхыжыным цӀыху куэд хэтащ.

²Абыхэм ятхар а Ӏуэхухэм щӀэдзапӀэм къыщегъэжьауэ зи нэкӀэ зылъэгъуахэмрэ Тхьэм и псалъэхэм хуэлажьэхэмрэ къызэрытхуаӀуэтэжам тетщ.

³Аращи, сэри мы къэхъукъащӀэ Ӏуэху псори я щӀэдзапӀэм къыщегъэжьауэ сыхуэсакъыурэ згъэунэхуа нэужь, уэ, щӀыхь зыхуэфащэ Феофил,[1] зэкӀэлъыкӀуэу пхуэстхын мурад сщӀащ,

⁴уэ узыхурагъэджа Ӏуэхухэм япэжыгъэр пщӀэн щхьэкӀэ.

⁵Иудей хэкум[2] и пащтыхь Ирод[3] и тетыгъуэм Зэчрей зи цӀэ дин пашэ гуэр щыӀащ. Ар АвиекӀэ зэджэ дин пашэ гупым яхэтт. И щхьэгъусэ Елизавет Хьэрун къытехъукӀахэм ящыщащ.

⁶Тхьэуэ Зиусхьэным дежкӀэ щыпкъагъэ ягу илъу, абы и унафэхэмрэ и хабзэхэмрэ тету, щӀагъэкъуэншэн лъэпкъ ямылэжьу псэурт тӀури.

⁷Бын яӀакъым, Елизавет фыз мылъхуэт, тӀури ныбжькӀэ хэкӀуэтати.

⁸Зэчрей зыхэт дин пашэ гупыр Тхьэм и унэшхуэм щылэжьэну пӀалъэр къыщысым, Зэчрей Тхьэм и пащхьэм дин пашэу Ӏуэху щищӀэрт.

⁹Дин пашэхэм я хабзэм тету пхъэидзэ щащӀым, Зиусхьэным и унэшхуэм щӀыхьэу, мэ ӀэфӀ къызыпих удзыр Тхьэм щхьэкӀэ игъэсыну Зэчрейм къылъысащ.

¹⁰Удзыр щагъэсын хуей сыхьэтыр къыщысым, Зэчрейм удзыр игъэсыху, Тхьэм и унэшхуэм и пщӀантӀэм Тхьэ щелъэӀуащ цӀыху псори.

¹¹Удз гъэсыпӀэм ижьырабгъумкӀэ Зиусхьэным и мелыӀыч гуэр Зэчрейм къыщыхуэхутащ.

¹²Ар щилъагъум, Зэчрей къащтэри, шынагъуэшхуэм зэщӀиубыдащ.

¹³МелыӀычым абы къыжриӀащ: — Умышынэ, Зэчрей. Уи лъэӀур Тхьэм зэхихащ. Уи щхьэгъусэ Елизавет къуэ къыпхуилъхунущ, абы цӀэуэ Иуан фӀэпщынущ.

¹⁴Абы гуфӀэгъуэшхуэрэ насыпышхуэрэ къыпхудэкӀуэнущ, ар къызэралъхуам щхьэкӀэ цӀыху куэд гуфӀэнущ.

¹⁵Тхьэуэ Зиусхьэным дежкӀэ ар цӀыхушхуэ хъунущ, санэрэ зыгъэудэфэн фадэрэ ефэнукъым икӀи и анэм и ныбэм щилъам щыщӀэдзауэ Тхьэм и Псэ ЛъапӀэр и гум куууэ хыхьэнущ.

¹⁶Израил цӀыху куэд Зиусхьэну я Тхьэм и гъуэгу къытригъэхьэжынущ.

¹⁷Тхьэм и Псэ ЛъапӀэр Иляс бегъымбарым[4] игу зэрилъам хуэдэу, абыи игу илъу, Иляс лъэкӀыныгъэ зэриӀам хуэдэу лъэкӀыныгъэ иӀэу, Зиусхьэныр къэкӀуэн и пэкӀэ ар къэкӀуэнущ. Адэхэмрэ къуэхэмрэ ягухэр фӀы зэхуищӀыжынущ, Тхьэм емыдаӀуэхэри щыпкъагъэ зигу илъ цӀыхухэм я гъуэгу тригъэхьэнущ. Зиусхьэным хуэфащэ лъэпкъ хъун щхьэкӀэ, абы Израил лъэпкъыр игъэхьэзырынущ.

¹⁸— Ар зэрыпэжыр дауэ къызэрысщӀэнур? — еупщӀащ Зэчрей мелыӀычым. — Сэ лӀыжь сыхъуащ, си щхьэгъусэм и ныбжьри хэкӀуэтащ.

¹⁹— Тхьэм и пащхьэм ит ДжэбрэӀил мелыӀычыр сэращ, — къыжриӀащ мелыӀычым. — Мы хъыбарыфӀыр ныбжесӀэн щхьэкӀэ, сынопсэлъэну Тхьэм сыкъигъэкӀуащ.

²⁰Аращи, си псалъэхэр уи фӀэщ зэрымыхъуам щхьэкӀэ, а бжесӀа Ӏуэхухэр къэхъуху, умыпсэлъэфу, бзагуэу ущытынущ. ПӀалъэр къыщыскӀэ, ахэр къэхъун хуейщ.

²¹Зэчрей Тхьэм и унэшхуэм къызэрыщӀэмыкӀыжыр ягъэщӀагъуэу, цӀыхухэр абы пэплъащ апщӀондэху.

²²Зэчрей Тхьэм и унэшхуэм къыщыщӀэкӀыжым, цӀыхухэм епсэлъэн хузэфӀэкӀакъым. Тхьэм и унэшхуэм зыгуэр абы къызэрыщыхуэлъэгъуар къагурыӀуащ цӀыхухэм. Зыхуейр ӀэпэтэрмэшкӀэ къагуригъаӀуэу, Зэчрей бзагуэ хъуащ.

²³Тхьэм и унэшхуэм Ӏуэху щищӀэн щыхуей махуэхэр блэкӀа нэужь, Зэчрей и унэм игъэзэжащ.

²⁴И щхьэгъусэ Елизавет лъэщыджэ хъуащ куэд мыщӀэу, цӀыхухэм мазитхукӀи къахыхьакъым.

²⁵«Зиусхьэным мыр сэ къысхуищӀащ», жиӀащ абы. «Мы махуэхэм абы и нэфӀ къысщыхуэри, си мыгъуагъэр цӀыхухэм я пащхьэм щыстрихащ».

²⁶Елизавет мазихкӀэ лъэщыджауэ, Тхьэм и мелыӀыч ДжэбрэӀил Галилей хэкум[5] щыщ Назарет къалэм[6] къигъэкӀуащ.

²⁷Ар къызыхуигъэкӀуар Мэрием зи цӀэ хъыджэбз гуэрщ. Исуф зи цӀэу Даут пащтыхьым къытехъукӀа цӀыхухэм ящыщ лӀым а Мэрием къишэну къыхихауэ щытащ.

²⁸Мэрием здэщыӀэм къакӀуэри, мелыӀычым жиӀащ: — ГуфӀэ уэ, Тхьэм и нэфӀ зыщыхуар. Зиусхьэныр уи гъусэщ.

²⁹МелыӀычым жиӀам Мэрием хуабжьу къигъэгузэващ икӀи а фӀэхъус псалъэу къыжриӀам къикӀым егупсысащ.

³⁰— Умышынэ, Мэрием, — къыжриӀащ мелыӀычым абы, — Тхьэм и нэфӀ къыпщыхуащ.

³¹Уэ лъэщыджэ ухъунурэ къуэ къэплъхунущ. Абы цӀэуэ фӀэпщынур Хьисэщ.

³²Ар цӀыхушхуэ хъунущ, Тхьэуэ Лъагэм и КъуэкӀэ еджэнущ. И адэшхуэ Даут и тахътэр Зиусхьэну Тхьэм абы къритынущ.

³³МыкӀуэдыжын тепщэныгъэ Екъуб и лъэпкъым хуиӀэнущ абы. И тепщэныгъэшхуэм зэи кӀэ иӀэнукъым.

³⁴— Ар дауэ зэрыхъунур? — еупщӀащ Мэрием мэлэӀычым. — Сэ сыхъыджэбздэсщ.

³⁵— Тхьэм и Псэ ЛъапӀэр къыпхуехынущ, Тхьэуэ Лъагэм и лъэкӀыныгъэри уи гъусэнущ, — къыжриӀащ мелыӀычым абы. — Аращи, щӀалэ лъапӀэу къалъхунум Тхьэм и КъуэкӀэ еджэнущ.

³⁶Мис, уи благъэ Елизавету фызмылъхуэщ жыхуаӀэу щытар и жьыщхьэ лъэщыджэ хъуащ икӀи мазэ еханэм итщ;

³⁷Тхьэм хузэфӀэмыкӀын Ӏуэху зыри щыӀэкъым.

³⁸— Мис, сэ Зиусхьэным сриӀуэхутхьэбзащӀэщ, — жиӀащ Мэрием. — Уэ зэрыжыпӀам тету къыздрехъу. Мэрием къигъанэри, мелыӀычыр ежьэжащ итӀанэ.

³⁹А махуэхэм Мэрием зигъэхьэзырри, Ӏуащхьэлъэ хэкум щыщу ИудэкӀэ зэджэ унагъуэ лъэпкъыр зыдэс жылэ гуэрым пӀащӀэу кӀуащ.

⁴⁰А жылэм щынэсым, Зэчрей и унэм щӀыхьэри, Мэрием Елизавет фӀэхъус ирихащ.

⁴¹Елизавет Мэрием и фӀэхъус псалъэр щызэхихым, и ныбэм илъ сабийр хъеящ. Тхьэм и Псэ ЛъапӀэр Елизавет игу куууэ хыхьэри,

⁴²Елизавет макъ лъагэкӀэ жиӀащ: — ЦӀыхубз псоми нэхърэ Тхьэм и нэфӀ уэ нэхъ къыпщыхуащ, уи пкъым къыхэкӀыну сабийми Тхьэм и нэфӀ къыщыхуащ.

⁴³Сэ сыхэт, си Зиусхьэным и анэр си деж къэкӀуэну?

⁴⁴Уи фӀэхъус псалъэр щызэхэсхым, си ныбэм илъ сабийм гуфӀэгъуэшхуэкӀэ зыкъигъэхъеящ.

⁴⁵Зиусхьэным къыжриӀар къехъулӀэнкӀэ зи фӀэщ хъуар гъуэгу махуэ теуващ!

⁴⁶Мэрием жиӀащ итӀанэ: «Зиусхьэным и инагъым гурэ псэкӀэ фӀыщӀэшхуэ хузощӀ.

⁴⁷СымыкӀуэду сыкъезыгъэл Тхьэм ину сыщогуфӀыкӀ,

⁴⁸и пщылӀ тхьэмыщкӀэм Зиусхьэныр нэфӀкӀэ къеплъащ. Мис, нобэ щыщӀэдзауэ лъэхъэнэ псоми я цӀыхухэм сэ гъуэгу махуэ сытеувауэ жаӀэнущ,

⁴⁹сыту жыпӀэмэ ЛъэкӀыныгъэшхуэ ЗиӀэм Ӏуэху телъыджэхэр къысхуищӀащ. Абы и цӀэращ лъапӀэр.

⁵⁰Тхьэм езым и фӀэлӀыкӀыр зи гум илъ цӀыхухэм гущӀэгъу яхуещӀ, адэм къыщыщӀэдзауэ и къуэм нэсу.

⁵¹Ӏуэху телъыджэхэр и ӀэкӀэ зэфӀигъэкӀащ. Зи гум пагагъэ илъхэр зэбгрихуащ.

⁵²Тепщэныгъэ зиӀэхэр я тахътэхэм къридзыхащ, зи гум пагагъэ имылъхэр къиӀэтащ.

⁵³ХуэмыщӀахэм тыгъэфӀхэр яритащ, ауэ бейхэр ӀэнэщӀу къигъэнащ.

⁵⁴Езым и пщылӀ Израил лъэпкъым кӀэлъоплъ. Ди адэшхуэхэр зэригъэгугъам тету, Ибрэхьимрэ абы къытехъукӀа цӀыхухэмрэ гущӀэгъу яхуищӀыну игу илъ зэпытщ».

⁵⁵

⁵⁶Елизавет деж мазищкӀэ щыӀа нэужь, Мэрием и унэм игъэзэжащ.

⁵⁷И лъхуэгъуэ махуэр къэсри, Елизавет къуэ къыхуэхъуащ.

⁵⁸Елизавет Зиусхьэным гущӀэгъушхуэ къызэрыхуищӀар щызэхахым, абы и гъунэгъухэмрэ и благъэхэмрэ дэгуфӀащ.

⁵⁹Сабийр сунэт* ящӀыну цӀыхухэр еянэ махуэм щызэхуэсым, абы и адэ Зэчрей и цӀэр фӀащыжын я гугъащ.

⁶⁰Ауэ сабийм и анэм яхуидакъым. — Хьэуэ, Иуанщ абы фӀэтщынур, — жиӀащ.

⁶¹— Апхуэдэ цӀэ зиӀэ уэ уи благъэхэм зыри яхэткъым, — къыжраӀащ абыхэм.

⁶²Сабийм и адэм ӀэпэтэрмэшкӀэ еупщӀащ абы цӀэуэ фӀищыну зыхуеймкӀэ.

⁶³Зытетхыхьын гуэр къахьыну ягуригъэӀуащ адэм. Ар къахьа нэужь, тритхащ: «Абы цӀэуэ иӀэнур Иуанщ». Ар псоми ягъэщӀэгъуащ.

⁶⁴Арыххэу, Зэчрей и бзэгур хъейщ, и бзэр къиутӀыпщыжри, Тхьэм фӀыщӀэ хуищӀурэ псалъэу щӀидзащ.

⁶⁵Ӏэгъуэблагъэм щыпсэу псори шынагъуэшхуэм хэхуащ икӀи Иудей Ӏуащхьэлъэ хэкум дэнэкӀи мы Ӏуэху псори щызэлъащӀысащ.

⁶⁶А Ӏуэхухэр зэхэзыха псоми я гум ахэр ираубыдауэ жаӀэрт: «Мы сабийр сыт зэрыхъунур?» Сыт щхьэкӀэ жыпӀэмэ Зиусхьэным и нэфӀ абы къыщыхуат.

⁶⁷Тхьэм и Псэ ЛъапӀэр а сабийм и адэ Зэчрей игу кууэу хыхьэри, мы псалъэхэр къыжригъэӀащ:

⁶⁸«Зиусхьэну Израил и Тхьэм щӀыхьышхуэр ейщ, сыт щхьэкӀэ жыпӀэмэ езым и лъэпкъ Израил нэфӀкӀэ къеплъри, щхьэхуитыныгъэ къритащ.

⁶⁹Тхьэм и ӀуэхутхьэбзащӀэ Даут пащтыхьым къытехъукӀа цӀыхухэм ящыщу лъэкӀыныгъэшхуэ зиӀэу, дымыкӀуэду дыкъезыгъэлынур къытхуигъэкӀуащ,

⁷⁰пасэрей зэманым къыщыщӀэдзауэ абы и бегъымбар лъапӀэхэм ягу кърилъхьэу, зэрыжригъэӀауэ щытам тету.

⁷¹Абы ди бийхэм дащихъумэурэ, дымыкӀуэду дыкъригъэлынущ, ди жагъуэгъухэми дакъыӀэщӀихыжынущ.

⁷²Апхуэдэу Тхьэм ди адэшхуэхэм гущӀэгъушхуэ къахуещӀ, зэгурыӀуэныгъэ лъапӀэу езымрэ ди адэшхуэу Ибрэхьимрэ я зэхуакум псалъэ быдэкӀэ къыдилъхьари егъэзащӀэ.

⁷³А псалъэ быдэр мыращ:

⁷⁴Дэ ди бийхэм дакъыӀэщӀихыжынущ икӀи шынагъуэ дигу имылъу езым дыхуэлэжьэн тлъигъэкӀынущ,

⁷⁵езым и пащхьэм гукъабзагъэрэ щыпкъагъэрэ игъащӀэкӀэ щыдиӀэу».

⁷⁶ИтӀанэ Зэчрей къыпищащ: «Уэ, си щӀалэ, Тхьэуэ Лъагэм и бегъымбаркӀэ къоджэнущ, Зиусхьэным и гъуэгу хуэбгъэпсыну езым и пэ къихуэу укӀуэнущи.

⁷⁷Уэ Зиусхьэным и лъэпкъым ебгъэщӀэнущ я гуэныхьхэр зэрахуигъэгъумкӀэ ахэр мыкӀуэду къызэрыригъэлыр.

⁷⁸Ди Тхьэм и гущӀэгъур инщ. Дыгъэ къыкъуэкӀым хуэдэу, ар уафэм къикӀынурэ къытхуэкӀуэнущ,

⁷⁹лӀэныгъэм и шынагъуэм хэтхэмрэ кӀыфӀыгъэм хэтхэмрэ ятепсэн икӀи мамырыгъэ гъуэгум дытригъэхьэн щхьэкӀэ».

⁸⁰Сабийр къэхъури, игукӀи и псэкӀи зиужьащ. Израил цӀыхухэм я пащхьэм къыщихьэну махуэм нэсыху, губгъуэ нэщӀым исащ ар.