Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр Иуан 1 Bible Online

Иуан 1 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

Иуан 1

¹ЩӀэдзапӀэм деж Псалъэр[1] щыӀащ. Ар Тхьэм деж щыӀащ, а Псалъэр Тхьэуэ аращ.

²ЩӀэдзапӀэм къыщегъэжьауэ, а Псалъэр Тхьэм деж щыӀащ.

³Тхьэм а Псалъэм псори къригъэгъэщӀащ. Тхьэм къигъэщӀа псоми ящыщ а Псалъэм къримыгъэгъэщӀауэ зыри щыӀэкъым.

⁴МыкӀуэдыжын гъащӀэ хэлъащ а Псалъэм, а гъащӀэри цӀыхухэм нэху яхуэхъуащ.

⁵Нэхур кӀыфӀыгъэм къыщонэху, кӀыфӀыгъэр нэхум пэлъэщакъым.

⁶Тхьэм къигъэкӀуауэ, лӀы гуэр дунейм къытехьащ. Иуант абы и цӀэр.

⁷Иуан нэхум щыхьэт техъуэну къэкӀуащ, цӀыху псоми а нэхумкӀэ фӀэщхъуныгъэ яӀэ хъун щхьэкӀэ.

⁸Езыр нэхутэкъым, ауэ нэхум щыхьэт техъуэн щхьэкӀэ, Тхьэм къигъэкӀуащ ар.

⁹Нэху пэжу цӀыху псори къэзыгъэнэхур дунейм къытехьэну щытащ.

¹⁰А Псалъэр дунейм къытехьащ. Тхьэм а Псалъэм дуней псори къригъэгъэщӀащ, апхуэдэу щыт пэтми, дунейм и цӀыхухэм ар къацӀыхужакъым.

¹¹Езым и къэралым къэкӀуащ, ауэ абы и цӀыхухэм[2] ар ядакъым.

¹²Ауэ ар зыда цӀыху псоми, езымкӀэ фӀэщхъуныгъэ зиӀэхэм, Тхьэм и бын хъуну хуитыныгъэ къаритащ.

¹³Ахэр Тхьэм и бын зэрыхъуа щӀыкӀэр бын къызэралъху щӀыкӀэм хуэдэукъым. Ахэр Тхьэм и бын зэрыхъуар цӀыхухъур цӀыхубзым зэрехъуапсэм, е лӀыр бын зэрыхуейм щхьэкӀэкъым, атӀэ Тхьэм бын хуэхъуныр къызыбгъэдэкӀар езы Тхьэр арщ.

¹⁴А Псалъэр цӀыху хъуащ, икӀи къытхэтащ. Абы и щӀыхьышхуэри тлъэгъуащ. Ар Адэ лъапӀэм и Къуэ закъуэм и щӀыхьышхуэр арщ. НэфӀ щыхуэныгъэрэ щыпкъагъэрэ абы игу илъу щытащ.

¹⁵Иуан абы щыхьэт техъуащ. Мыпхуэдэу жиӀащ макъ хэӀэтыкӀакӀэ: — Мыращ жыхуэсӀар: «Си ужькӀэ къэкӀуэнур сэр нэхърэ нэхъ лъапӀэщ, сыт щхьэкӀэ жыпӀэмэ сэ сыкъэхъун и пэкӀэ ар щыӀащ».

¹⁶Езым и фӀыгъуэшхуэм щыщу зы нэфӀ щыхуэныгъэр адрей нэфӀ щыхуэныгъэм къыкӀэлъыкӀуэу къытлъигъэсащ.

¹⁷Торэт хабзэр Тхьэм и унафэкӀэ къытхуэзыгъэнар Мусэ бегъымбарыр арщ, ауэ нэфӀ щыхуэныгъэмрэ щыпкъагъэмрэ къызыбгъэдэкӀар Хьисэ Мэссихьыр арщ.

¹⁸Тхьэр и нэкӀэ зыми илъэгъуакъым игъащӀэм. Къуэ закъуэу Адэ лъапӀэм деж щыӀэм Тхьэр зыхуэдэр къытхуигъэнэхуащ.

¹⁹Иуан Хьисэ щыхьэт зэрытехъуар мыращ; Ерусалим щыщ журтхэм дин пашэхэри левитхэри[3] Иуан еупщӀыну ягъэкӀуащ. — Уэ ухэт? — жаӀэу щеупщӀым,

²⁰Иуан, пэжыр имыбзыщӀу, нахуэу жиӀащ: — Сэракъым Мэссихьыр.[4]

²¹— АтӀэ ухэт уэ? — еупщӀащ ахэр. — Уэ у-Иляс бегъымбар?[5] — Хьэуэ, — жиӀащ Иуан. — Бегъымбарыр[6] уэра? — еупщӀащ ахэр. — Хьэуэ, — жиӀащ абы.

²²— АтӀэ ухэт уэ? — еупщӀащ Иуан. — ДыкъэзыгъэкӀуахэм еттыжыну жэуапыр къыджеӀэ. Сыт уэ уи щхьэм щхьэкӀэ къыджепӀэнур?

²³— Ешайа бегъымбарым[7] «Зиусхьэным и гъуэгур занщӀэ фщӀы, жиӀэурэ губгъуэ нэщӀым джэ макъ гуэр къыщоӀу» жыхуиӀэ макъыр сэращ, — жиӀащ Иуан.

²⁴А лӀыкӀуэхэр фарисейхэм[8] ящыщт.

²⁵Ахэр Иуан къеупщӀащ: — Мэссихьыр уэрмырамэ, Илясри уэрмырамэ, бегъымбарри уэрмырамэ, сыт цӀыхухэр щӀэбумэхъыр[9]?

²⁶— Сэ цӀыхухэр соумэхъ, — яжриӀащ Иуан. — Ауэ фымыцӀыху гуэр къыфхэтщ.

²⁷Аращ си ужькӀэ къэкӀуэнур. Ар сэр нэхърэ нэхъ лъапӀэщ. Абы и вакъэ лъэпсхэр хуэстӀэтэнуи схуэфащэкъым сэ.

²⁸А псори къыщыхъуар Вифание жылэращ, Иорданыпсым и адрыщӀу Иуан цӀыхухэр щиумэхъыу щытарщ.

²⁹Хьисэ етӀуанэ махуэм къакӀуэу щилъагъум, Иуан жиӀащ: — Мис Тхьэм и къурмэныпхъэ щынэу дунейм и цӀыхухэм я гуэныхьхэр ятезыхыжыр.

³⁰Мыращ жыхуэсӀар: «Си ужькӀэ къэкӀуэну лӀыр сэр нэхърэ нэхъ лъапӀэщ, сыт щхьэкӀэ жыпӀэмэ сэ сыкъэхъун и пэкӀэ ар щыӀащ».

³¹Ар сэ сцӀыхуртэкъым, ауэ сэ цӀыхухэр сыумэхъыну сыкъыщӀэкӀуар израил цӀыхухэм ар хэтми езгъэщӀэн щхьэкӀэщ. Хьисэ щыхьэт техъуэурэ, Иуан жиӀащ итӀанэ:

³²— Тхьэм и Псэ ЛъапӀэр тхьэрыкъуэм хуэдэу уафэм Хьисэ къыхуехауэ къызэрыщхьэщытыр слъэгъуащ.

³³Езыр сэ сцӀыхуртэкъым, ауэ цӀыхухэр сыумэхъыну сыкъэзыгъэкӀуам къызжиӀащ: «Тхьэм и Псэ ЛъапӀэр къызыхуехауэ, зыщхьэщыт цӀыхур арщ цӀыхухэр Тхьэм и Псэ ЛъапӀэкӀэ зыумэхъынур».

³⁴Апхуэдэу зэрыхъуар сэ слъэгъуащ, ар Тхьэм зэри-Къуэми щыхьэт сытохъуэ сэ.

³⁵Иуан езым и гъуэгу ирикӀуэ лӀитӀ и гъусэу, а щӀыпӀэм деж щытащ етӀуанэ махуэми.

³⁶Хьисэ къакӀуэу щилъагъум, Иуан жиӀащ: — Мис Тхьэм и къурмэныпхъэ щынэр.

³⁷Иуан и гъуэгу ирикӀуэ лӀитӀым абы ар жиӀэу щызэхахым, Хьисэ и ужь иуващ.

³⁸Хьисэ къызэплъэкӀри, ахэр езым и ужь иувауэ щилъагъум, яжриӀащ: — Сыт фэ фызыхуейр? — Равви, дэнэ ущыпсэур? — къеупщӀащ ахэр. (Раввим къикӀыр «Дин ЕгъэджакӀуэщ».)

³⁹— ФыкъакӀуи, флъагъунщ, — яжриӀащ Хьисэ. Ахэр кӀуэщ, зыщыпсэур ялъагъури, а махуэр Хьисэ деж щагъэкӀуащ. Ар сыхьэтыр плӀым дежт.[10]

⁴⁰Иуан Хьисэ теухуауэ жиӀар зэхэзыхыу, Хьисэ и ужь иува лӀитӀым я зыр Симон Петр и къуэш Индрисщ.

⁴¹Индрис и къуэш Симон япэщӀыкӀэ къигъуэтри жриӀащ: — Мэссихьыр къэдгъуэтащ. (Мэссихьым къикӀыр «Христосыр» арщ.)

⁴²Индрис Хьисэ деж Симоныр къишащ. Симон щилъагъум, Хьисэ къыжриӀащ: — Уэ у-Симону Иуан урикъуэщ. КифэкӀэ къоджэнущ. (Кифэм къикӀыр «Мывэщ».)

⁴³Хьисэ Галилей хэкум кӀуэну триубыдащ етӀуанэ махуэм. Хьисэ Филипп хуэзри, жриӀащ итӀанэ: — Си ужь къиувэ.

⁴⁴А Филиппыр Индрисрэ Петррэ зыдэс Вифсайдэ къалэм[11] щыщт.

⁴⁵Филипп кӀуэщ, Нафанаил къигъуэтри, жриӀащ: — Торэт хабзэм иту Мусэ бегъымбарми адрей бегъымбархэми зи гугъу ящӀар къэдгъуэтащ. Ар Исуф и къуэу Назарет къалэм[12] щыщ Хьисэр аращ.

⁴⁶— Назарет фӀыгъэ зыхэлъ гуэр къыдэкӀын? — къеупщӀащ Нафанаил. — КъакӀуи, еплъ! — жриӀащ абы Филипп.

⁴⁷Нафанаил къакӀуэу щилъагъум, абы теухуауэ Хьисэ жиӀащ: — Мис Израил щыщ цӀыху щыпкъэу гъэпцӀагъэ гуэри зыхэмылъыр.

⁴⁸— Дэнэ сыкъыщыпцӀыхурэ? — къеупщӀащ Нафанаил Хьисэ. — Филипп къоджэн и пэкӀэ, ахъуо жыгым и щӀагъым ущыщӀэтым, услъэгъуащ, — жиӀащ Хьисэ.

⁴⁹— Равви, уэ Тхьэм ури-Къуэщ, Израилым урипащтыхьщ, — къыжриӀащ Нафанаил.

⁵⁰— Ахъуо жыгым и щӀагъым ущӀэту услъэгъуащ зэрыбжесӀам щхьэкӀэ, уи фӀэщ хъуащ, — жиӀащ Хьисэ. — Абы нэхърэ нэхъ гъэщӀэгъуэныщи плъагъунущ.

⁵¹Хьисэ Нафанаил жриӀащ итӀанэ: — Пэж дыдэр нывжызоӀэ, уафэр зэӀухауэ, ЦӀыху Лъэпкъым и Къуэм[13] деж мелыӀычхэр дэкӀуейуэ икӀи къехыу[14] флъагъунущ.