Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр Апостол. 28 Bible Online

Апостол. 28 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

Апостол. 28

¹Псэууэ къыщынэм, а хытӀыгум МелиткӀэ[173] зэреджэр Паул и гъусэхэм къащӀащ.

²ХытӀыгум щыпсэухэр гуфӀэгъуэшхуэкӀэ къытпежьащ. Уэлбанэшхуэу икӀи щӀыӀэу зэрыщытым щхьэкӀэ, мафӀэ ящӀри, псори драгъэблэгъащ.

³Паул чы гъур куэд зэхуихьэсу мафӀэм щытрилъхьэм, хуабэм зы блэ чыхэм къыхихущ, Паул и Ӏэм къеуэри, кӀэрылэлу къыкӀэрынащ.

⁴Блэр Паул и Ӏэм кӀэрылэлу щалъагъум, хытӀыгум щыпсэухэм жаӀащ: — Мыр лӀыукӀ гуэру къыщӀэкӀынущ; сыту жыпӀэмэ хым псэууэ къыхэкӀыжами, Тхьэм и щыпкъагъэм ар псэуну хуит ищӀыркъым.

⁵Паул и Ӏэр игъэсысри, блэр мафӀэм хидзащ. Абы и зэран Паул къригъэкӀакъым.

⁶«А лӀыр бэгынущ е напӀэзыпӀэм къытехуэнурэ лӀэнущ», жаӀащ, ауэ куэдрэ пэплъэу, Паул зыри къыщымыщӀауэ щалъагъум, «Мыр зы тхьэ гуэрщ», — жаӀащ, зызэблахъужри.

⁷А щӀыпӀэм пэмыжыжьэу, хытӀыгум и тепщэ Публий зи цӀэм щӀышхуэ щиӀэт. Абы дригъэблагъэри, махуищкӀэ хьэщӀагъэшхуэ къыдихащ.

⁸Публий и адэр плъыржьэрымрэ ныбэузымрэ зэщӀаубыдауэ пӀэм хэлът. Паул сымаджэм деж щӀыхьэщ, Тхьэм хуелъэӀущ, и Ӏэхэр трилъхьэри игъэхъужащ.

⁹Апхуэдэу щыхъум, хытӀыгум щыпсэу нэгъуэщӀ сымаджэхэри Паул деж къакӀуэурэ, ахэри игъэхъужащ.

¹⁰Абыхэм пщӀэшхуэ къытхуащӀащ, дызыхуэныкъуэхэри къытхуахьащ дыкъыщежьэжым.

¹¹Мазищ щыдэкӀым, Александрие къалэм къикӀауэ «Тхьэ зэтӀолъхуэныкъуэхэр»[174] жыхуаӀэ кхъухьым, щӀымахуэм псом а хытӀыгум щыӀам, дитӀысхьэри дежьащ.

¹²Сиракуз къалэм десылӀэри, абы махуищкӀэ дыщыӀащ.

¹³Абы дыкъыщежьэри, Ригие къалэм дынэсащ. Зы махуэ дэкӀауэ, ипщэрабгъу лъэныкъуэмкӀэ къикӀыу жьы къепщэу щӀидзати, Путеол къалэм дыщынэсар етӀуанэ махуэрщ.

¹⁴Абы къуэш зыкъом къыщыдгъуэтщ, абыхэм я деж махуиблкӀэ дыщыӀэну къыдэлъэӀури драгъэблэгъащ. Абы и ужькӀэ Рим къалэшхуэм дыкӀуэну гъуэгум дытехьэжащ.

¹⁵Рим дэс къуэшхэм дызэрыкӀуэр зэхахати, къытпежьэри, «Аппий ЗэхуэсыпӀэ»[175] зи цӀэ къалэмрэ «ХьэщӀэщищ»[176] зи цӀэ къалэмрэ нэс къэкӀуащ. Ахэр щилъагъум, Паул Тхьэм фӀыщӀэ хуищӀри, къэгушхуэжащ.

¹⁶Рим дыщынэсым, абы тепщэныгъэ щызиӀэхэм Паулрэ абы и хъумакӀуэ зауэлӀымрэ я закъуэ а къалэм дэсыну хуит ящӀащ.

¹⁷Махуищ дэкӀа нэужь, Паул журтхэм я пашэхэр къригъэшащ. Ахэр къыщызэхуэсым, яжриӀащ: — Си къуэшхэ, сэ ди лъэпкъым мыхъун зыри езмыщӀауэ, ди адэжьхэм я хабзэхэм сытемыкӀауэ щыт пэтми, Ерусалим сыщаубыдри, рим цӀыхухэм сыӀэщӀалъхьащ.

¹⁸Ахэр си Ӏуэхум хэплъа нэужь, укӀ къыщӀыстралъхьэн ямыгъуэту щхьэхуит сащӀыжыну хуеящ.

¹⁹Ауэ рим цӀыхухэм сызэраутӀыпщыжынур журтхэм щамыдэм, кесарым си Ӏуэхум хьэкум трищӀыхьыну сылъэӀуэн хуей хъуащ. Си лъэпкъым седэуэн мурадкӀэкъым апхуэдэу щӀэсщӀар.

²⁰Ӏуэхухэр апхуэдэу зэрыщытым щхьэкӀэщ фыслъагъуну икӀи сынывэпсэлъэну фыкъыщӀезгъэшар. Израил лъэпкъым гугъапӀэфӀу[177] иӀэм щхьэкӀэщ си Ӏэм Ӏэхъулъэхъу щӀралъхьар.

²¹— Уи хъыбарыр зэрыт тхылъ гуэри Иудей хэкум къикӀыу къытхуэкӀуакъым, — къыжраӀащ абыхэм. — Абы къикӀыу мыбы къэкӀуа къуэшхэми уэ птеухуауэ Ӏей лъэпкъ къыдагъэщӀакъым икӀи къыджаӀакъым.

²²Уэ уи гурылъхэр къыджыпӀэурэ, дебгъэдэӀуэну дыхуейщ; сыт щхьэкӀэ жыпӀэмэ диным и гъуэгум тет а гупым[178] цӀыхухэр дэнэкӀи къызэрыщыпэувым дыщыгъуазэщ.

²³Махуэ гуэр хахри, Паул зыщӀэс унэм цӀыху гупышхуэ къэкӀуащ. Пщэдджыжьым щыщӀэдзауэ пщыхьэщхьэ хъуху, Тхьэм и Тепщэныгъэшхуэм* теухуа хъыбарыр ягуригъаӀуэурэ, Паул а тепщэныгъэшхуэм щыхьэт хуэхъуащ. Мусэ бегъымбарым и Торэт хабзэм итхэмрэ бегъымбархэм я тхылъхэм итхэмрэ ящыщ къеджэурэ, Паул Хьисэ теухуауэ жиӀэхэр я фӀэщ ищӀыным хэтт.

²⁴Паул жиӀар зыкъомым я фӀэщ хъуащ, зыкъомми ядакъым.

²⁵А журтхэр зэгурымыӀуэу, зэбгрыкӀыжыну щыхуежьэм, Паул мы псалъэхэр жиӀащ: — Тхьэм и Псэ ЛъапӀэм фи адэжьхэм ятеухуауэ щыпкъагъэр Ешайа бегъымбарым жригъэӀащ:[179]

²⁶«Мы лъэпкъым деж кӀуэи, мыпхуэдэу яжеӀэ: Фэ зэхэфх зэпыту фыщытынущ, ауэ къывгурыӀуэнукъым; фэ флъагъу зэпыту фыщытынущ, ауэ гу лъыфтэнукъым.

²⁷Сыту жыпӀэмэ мы цӀыху лъэпкъыр гулъытэншэ хъуащ. Я тхьэкӀумэхэмкӀи ерагъыу зэхах къудейщ, я нэхэри яуфӀыцӀащ. Апхуэдэу щымытатэмэ, я нэхэмкӀэ ялъагъунт, я тхьэкӀумэхэмкӀи зэхахынт, ягухэмкӀи зыхащӀыкӀынт, си деж къагъэзэжынти, сэ ахэр згъэхъужынт итӀанэ».*

²⁸Аращи, Тхьэм цӀыхухэр мыкӀуэду къызэрыригъэлым и хъыбарыр хамэ лъэпкъхэм Тхьэм къазэрылъигъэӀэсар фэ зэвгъащӀэ. Ахэри а хъыбарым едэӀуэнущ.

²⁹Паул а псалъэхэр щыжиӀэм, хуабжьу зэныкъуэкъуурэ, журтхэр унэм щӀэкӀыжащ.

³⁰И деж къакӀуэ цӀыху псори щригъэблагъэу, пщӀэкӀэ къищта унэм илъэситӀкӀэ щыпсэуащ Паул.

³¹Къыпэрыуэ лъэпкъ щымыӀэу, Тхьэм и Тепщэныгъэшхуэм теухуа хъыбарыр Паул цӀыхухэм яхуиӀуатэрт, Зиусхьэн Хьисэ Мэссихь теухуа хъыбархэри тегушхуауэ цӀыхухэм яригъащӀэрт.