Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр Еврейхэм яхуэгъэза тхылъ 7 Bible Online

Еврейхэм яхуэгъэза тхылъ 7 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

Еврейхэм яхуэгъэза тхылъ 7

¹Мелхиседек[35] Салим къалэм[36] и пащтыхьу икӀи Тхьэуэ я нэхъ Лъагэм хуэлажьэ дин пашэу щытащ. Ибрэхьим пащтыхь куэдым ятекӀуауэ къыщигъэзэжым, Мелхиседек абы пежьэри, Тхьэм и нэфӀ къыщригъэхуащ.

²Ибрэхьим зауэм къыхиха мылъкум и Ӏыхьэ пщӀанэр Мелхиседек иритащ абы щыгъуэ. Мелхиседек и цӀэм къикӀыращи, япэщӀыкӀэ «щыпкъагъэ зигу илъ пащтыхьщ», итӀанэ Салим къалэм и пащтыхьщ, абы къикӀыр «цӀыхухэр зэзыгъэкӀуж пащтыхьыщ».

³Ади ани, лъэпкъ зытепщӀыкӀ имыӀэу, и махуэхэм ублапӀэ ямыӀэу, и гъащӀэми ухыпӀэ имыӀэу, Тхьэм и Къуэм хуэдэу, Мелхиседеки игъащӀэкӀэ дин пашэщ.

⁴Мелхиседек зэрыиным феплъ: Ди адэшхуэ Ибрэхьим зауэм къыхиха мылъкум и Ӏыхьэ пщӀанэр абы иритащ.

⁵Левий[37] къытехъукӀа цӀыхухэм ящыщу дин пашэ хъуахэм израил цӀыхухэм къалэжьам и Ӏыхьэ пщӀанэр къыӀахыну Торэт хабзэм унафэу итщ. НэгъуэщӀу жыпӀэмэ, а Ӏыхьэ пщӀанэр къызыӀахыр я къуэш Ибрэхьим къытехъукӀа цӀыхухэрщ.

⁶Мелхиседек, Левий къытехъукӀа цӀыхухэм ящымыщами, Ибрэхьим зауэм къыхиха мылъкум и Ӏыхьэ пщӀанэр къыӀихащ. Абы нэмыщӀ, Мелхиседек Тхьэм ӀыхьэфӀкӀэ къигъэгугъэгъа Ибрахьим Тхьэм и нэфӀ къыщригъэхуащ.

⁷Шэч хэмылъу, нэгъуэщӀ цӀыхум Тхьэм и нэфӀ къыщызыгъахуэ цӀыхур нэфӀ зыщигъахуэм нэхърэ нэхъ инщ.

⁸ЦӀыхухэм Ӏыхьэ пщӀанэр къеӀызых дин пашэхэм я Ӏуэхум уеплъмэ, ахэр уахъты зиӀэ цӀыхущ. Ауэ Ибрэхьим Ӏыхьэ пщӀанэр къеӀызыха Мелхиседек и Ӏуэхум уеплъмэ, ар зэрыуахътыншэм Тхьэм и псалъэ тхахэр щыхьэт тохъу.

⁹Левий къытехъукӀа цӀыхухэм Ӏыхьэ пщӀанэр адрей цӀыхухэм мы зэманым къыӀах пэтми, Ибрэхьим Ӏыхьэ пщӀанэр Мелхиседек щритым, Левий Ӏыхьэ пщӀанэр Мелхиседек иритауэ жыпӀэ хъунущ,

¹⁰сыт щхьэкӀэ жыпӀэмэ Мелхиседек Ибрэхьим щыхуэзам, Левий къалъхуауэ щымытами, и адэшхуэ Ибрэхьим и пкъым хэлъу щытауэ плъытэ хъунущ.

¹¹Аращи, Левий и унагъуэ лъэпкъым щыщ дин пашэхэм ялэжьа ӀуэхумкӀэ Тхьэм и мурадыр нэса хъууэ щытамэ, (сыт щхьэкӀэ жыпӀэмэ Мусэ и Торэт хабзэр Левий и унагъуэ лъэпкъым щыщ дин пашэхэм ялэжьа Ӏуэхум епхащи), Хьарун хуэмыдэу, Мелхиседек хуэдэ нэгъуэщӀ дин пашэ къыщӀэкӀуэн щыӀэнтэкъым.

¹²Сыт щхьэкӀэ жыпӀэмэ Тхьэм дин пашэ лъэпкъыр щызэблихъукӀэ, хабзэри зэблэхъуа хъун хуейщ.

¹³Абы нэмыщӀу, мы Ӏуэхухэр зытеуха ди Зиусхьэн Хьисэ нэгъуэщӀ унагъуэ лъэпкъым щыщащ. Езым и унагъуэ лъэпкъым щыщ зыми къурмэн щӀыпӀэм дин пашэу Ӏуэху щищӀакъым.

¹⁴Ди Зиусхьэныр Иудэ зи цӀэ унагъуэ лъэпкъым зэрыщыщыр ӀупщӀщ. Мусэ бегъымбарыр дин пашэхэм къащытепсэлъыхьым, а унагъуэ лъэпкъым и гугъу ищӀакъым.

¹⁵Мелхиседек хуэдэу, нэгъуэщӀ дин пашэ иджы къызэрылъэгъуам а жыхуэсӀэ Ӏуэхур нэхъ ӀупщӀэу ещӀ.

¹⁶Мелхиседек и унагъуэ лъэпкъ къытепщӀыкӀым теухуа хабзэхэмрэ цӀыху унафэхэмрэкъым ар дин пашэ зыщӀар, атӀэ зыми имыгъэкӀуэдыфын гъащӀэм и лъэкӀыныгъэращ дин пашэ зыщӀар.

¹⁷Тхьэм и псалъэ тхахэм мыпхуэдэу хэтщ:[38] «Мелхиседек хуэдэу, уэри дин пашэу ущытынущ игъащӀэкӀэ».

¹⁸Пасэрей хабзэм лъэкӀыныгъи пщӀэи зэримыӀам щхьэкӀэ Тхьэм ар лъэныкъуэ иригъэзащ.

¹⁹Торэт хабзэм Ӏуэху гуэри нэса игъэхъун лъэкӀакъым. Тхьэм иджы дызыщигъэгугъ Ӏуэхур нэхъыфӀщ, а Ӏуэхум Тхьэм нэхъ пэгъунэгъу дыхуэхъун тлъегъэкӀ.

²⁰Абы нэмыщӀ, Тхьэм псалъэ быдэкӀэ жиӀащ Хьисэ дин пашэ зэрыхъунур.

²¹НэгъуэщӀ цӀыхухэр Тхьэм и псалъэ быдэ хэмылъу дин пашэ хъуащ, ауэ Хьисэ дин пашэ щыхъум, Тхьэм къыжиӀар псалъэ быдэкӀэ игъэпэжащ, сыт щхьэкӀэ жыпӀэмэ Тхьэм мыпхуэдэу къыжриӀащ:[39] «Сэ, Зиусхьэныр, жысӀар псалъэ быдэкӀэ згъэпэжурэ, абы сыхущӀегъуэжынукъым: Уэ дин пашэу ущытынущ игъащӀэкӀэ».

²²Тхьэм езымрэ дэрэ дяку къыдилъхьа зэгурыӀуэныгъэр зэрынэхъыфӀым дыщызыгъэгугъыр Хьисэщ.

²³Абы нэмыщӀу, адрей дин пашэхэр куэд хъуащ, Тхьэм дин пашэу сыт щыгъуи хуэлэжьэну лӀэныгъэм ахэр хуит ищӀакъыми.

²⁴Ауэ игъащӀэкӀэ зэрыпсэунум щхьэкӀэ Хьисэ и дин пашэ Ӏуэхур нэгъуэщӀ гуэрым къыхуигъэнэжынукъым.

²⁵Тхьэм пэгъунэгъу хъуну Хьисэ зылъигъэкӀ цӀыхухэр мыкӀуэду къригъэлын сыт щыгъуи хузэфӀокӀ абы щхьэкӀэ. Хьисэ а цӀыхухэм Тхьэм яхуелъэӀуну игъащӀэкӀэ псэунущи.

²⁶Мыпхуэдэ дин пашэшхуэщ дызыхуэныкъуэр: и гур къабзэу, зыми зэригъэкъуэншэн лъэпкъ бгъэдэмылъу, лажьэ зыри имыӀэу, гуэныхь зыщӀэхэм яхэкӀыжауэ, уафэхэм я щыгу дэкӀуеижауэ.

²⁷Адрей дин пашэшхуэхэм, япэщӀыкӀэ езыхэм я гуэныхьхэр япшыныжын щхьэкӀэ, итӀанэ адрей цӀыхухэм я гуэныхьхэр япшыныжын щхьэкӀэ, махуэ къэс къурмэн ящӀын хуейуэ зэрыщытам хуэдэу, Хьисэ ищӀын хуейуэ щыткъым; езым къурмэныпхъэ зыщищӀам, цӀыхухэм я гуэныхьхэр ипшыныжын щхьэкӀэ, къурмэныпхъэ аргуэру мыхъужыну, а зэмкӀэ зэфӀигъэкӀащ.

²⁸Зигурэ зи псэкӀэ лъэкӀыныгъэ зимыӀэ цӀыхухэр дин пашэшхуэ хъуну Торэт хабзэм и унафэм егъэув; ауэ Торэт хабзэр ува нэужь, Тхьэм жиӀар псалъэ быдэкӀэ къыщигъэпэжым, игъащӀэкӀэ цӀыху нэгъэсауэ щыт и Къуэр дин пашэшхуэ хъуну къигъэуващ.