Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр Апокалипсис 11 Bible Online

Апокалипсис 11 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

Апокалипсис 11

¹МелыӀыч гуэрым къамыл баш, пщалъэм хуэдэу, къызитащ итӀанэ. «КӀуэ, Тхьэм и унэшхуэмрэ къурмэнщӀыпӀэмрэ къэпщ икӀи абы Тхьэр щызыгъэлъапӀэхэр зыхуэдизыр къызэгъащӀэ», къызжиӀащ.

²«Ауэ Тхьэм и унэшхуэм и щӀыбкӀэ щыӀэ пщӀантӀэр къыупщыну упымылъ, Тхьэм а пщӀантӀэр хамэ лъэпкъхэм къахуигъэнащи. Къалэ лъапӀэр мазэ плӀыщӀрэ тӀукӀэ[25] къалэ лъапӀэр[26] лъэгукӀэ яубэнущ абыхэм.

³Си щыхьэтитӀым лъэкӀыныгъэ естынущ икӀи абыхэм щыгъуэ щыгъынхэр ящыгъыу, я гум Тхьэм кърилъхьа псалъэу къэхъуну Ӏуэхугъуэхэм ятеухуахэм цӀыхухэр махуэ минрэ щитӀрэ тӀощӀкӀэ ирагъэдэӀуэнущ абыхэм».

⁴Мы щыхьэтитӀыр щӀылъэм и Зиусхьэным и пащхьэм ит зейтун жыгитӀымрэ[27] уэздыгъэ тегъэувапӀитӀымрэщ.

⁵Зыгуэрым и ягъэ а щыхьэтитӀым яригъэкӀыну хуеймэ, абыхэм я жьэм мафӀэ къыжьэдэкӀыурэ, я бийхэр егъэкӀуэд. Абыхэм зи ягъэ езыгъэкӀыну хэтыр аращ зэрылӀэн хуейр.

⁶А щыхьэтитӀым уафэр ягъэбыдэжыну тепщэныгъэ яӀэщ, Тхьэм абыхэм я гум кърилъхьа псалъэхэм цӀыхухэр щрагъэдаӀуэ махуэхэм уэшх къемышхын щхьэкӀэ; псыр лъы ягъэхъун щхьэкӀэ псыхэми тепщэныгъэ хуаӀэщ икӀи щӀылъэм сыт хуэдэ гугъуехь ирагъэшэчыну дапщэщ хуейми яхузэфӀэкӀынущ.

⁷Абыхэм я щыхьэтыгъэр щаухкӀэ, щӀылъэм и кууупӀэу щӀэ зимыӀэм къыщӀэкӀ хьэщхьэвылъэр[28] абыхэм къебэнынущ икӀи къатекӀуэнурэ къиукӀынущ.

⁸Абыхэм я хьэдэхэр къалэшхуэу[29] цӀыхухэм ди Зиусхьэныр жорым щраӀулӀам и уэрамым дэлъынущ. А къалэшхуэм щхьэкӀэ Содом[30] е Мысыр жаӀэ, нэгъуэщӀ мыхьэнэ кърагъэкӀыурэ.

⁹Къэрал псоми, унагъуэ лъэпкъ псоми, бзэ псоми икӀи лъэпкъ псоми ящыщ цӀыху куэд махуищрэ ныкъуэкӀэ а хьэдэхэм еплъынущ, ауэ щӀалъхьэжын ядэнукъым.

¹⁰А тӀур зэрылӀам щхьэкӀэ гуфӀэнущ икӀи тхъэжынущ дунейм тетхэр. Тыгъэхэри зэхурагъэхьынущ, а бегъымбаритӀым щӀылъэм тет цӀыхухэм гугъуехь ирагъэшэчу щытащи.

¹¹Махуищрэ ныкъуэрэ дэкӀа нэужь, Тхьэм абыхэм гъащӀэм и псэр къахилъхьэжри, тӀури я лъэкӀэ къэувыжащ. Ахэр зылъэгъуа псори шынагъуэшхуэм хэхуащ.

¹²А бегъымбаритӀым[31] уафэм къиӀукӀ макъ гуэрым къажриӀэу зэхахащ итӀанэ: «Моуэ фыкъыдэкӀуей». Я бийхэр еплъурэ, ахэр уафэм дэкӀуеящ пщэм хэту.

¹³ЩӀыр ину хъеящ а сыхьэт дыдэм, къалэм и Ӏыхьэ пщӀанэри зэхэкъутащ. ЩӀыр щыхъейм, цӀыху минибл хэкӀуэдащ. МыкӀуэду къелахэри шынагъуэшхуэм хэхуащ икӀи уафэм щыӀэ Тхьэм щӀыхьышхуэ хуащӀащ.

¹⁴Апхуэдэу блэкӀащ етӀуанэ гъуэгу мыгъуэри. Ещанэ гъуэгу мыгъуэри къэкӀуэным куэд иӀэжкъым.

¹⁵Ебланэ мелыӀычыр и бжьамиишхуэм епщащ итӀанэ. Уафэм макъышхуэхэр къиӀукӀащ абы щыгъуэ: «Ди Зиусхьэнрэ езым и Мэссихьрэ мы дунейм тепщэныгъэшхуэ хуаӀэ хъуащ. Тхьэр арщ тепщэныгъэшхуэр игъащӀэкӀэ зиӀэнур».

¹⁶Тхьэм и пащхьэм ит тахътэхэм тес тхьэмадэ нэхъыжьу цӀыху тӀощӀрэ плӀым нэкӀукӀэ зрадзыхыурэ, Тхьэр ягъэлъапӀэурэ, мыпхуэдэу жаӀащ:

¹⁷«Уэ, лъэкӀыныгъэшхуэ псори зиӀэ Зиусхьэн Тхьэуэ, щыӀауэ, иджыри щыӀэм, щӀыхьышхуэр пхудощӀ, сыту жыпӀэмэ уи лъэкӀыныгъэшхуэр къэпщтауэ, тепщэныгъэшхуэр узэриӀэр къэбгъэлъэгъуащ.

¹⁸Хамэ лъэпкъхэр губжьащ, уэ уи губжьри къэлъэгъуащ. ЛӀахэм хьэкум щатепщӀыхьыну зэманыр къэсащ иджы. Уэ къыпхуэлажьэ бегъымбархэми, уи цӀыху лъапӀэхэми, уи фӀэлӀыкӀ зи гум илъ цӀыхухэм, — цӀыкӀуми, инми, — яхуэфащэ ӀыхьэфӀыр щебгъэгъуэтыну зэманри къэсащ. ЩӀылъэр зыгъэкӀуэд цӀыхухэр уэ щыбгъэкӀуэдыжыну зэманри къэсащ».

¹⁹Тхьэм и унэшхуэу уафэм щыӀэр зэӀуха хъуащ абы и ужькӀэ, икӀи Тхьэм езымрэ и цӀыхухэмрэ яку дилъхьа зэгурыӀуэныгъэр къэзыгъэлъагъуэ пхъуантэри[32] къэнэхуащ. Уафэр къэхъуэпскӀащ итӀанэ, макъышхуэхэри уафэгъуагъуэ макъышхуэхэри къэӀуащ, щӀыри хъеящ, уэшхуэхэри къехащ.