Read Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр Апокалипсис 18 Bible Online

Апокалипсис 18 - Kabardian New Testament, Genesis, Psalms – ХъыбарыфӀыр. ЩӀэдзапӀэр. Уэрэд ЛъапӀэхэр bible

Апокалипсис 18

¹НэгъуэщӀ мелыӀыч гуэр уафэм къехыу слъэгъуащ абы и ужькӀэ. Тепщэныгъэшхуэ иӀащ, къыпкърыкӀ нэхушхуэм дунейр къигъэнэхуащ.

²Мыпхуэдэу къыжиӀащ лъэкӀыныгъэ зиӀэ макъкӀэ: «Къалэшхуэр зэхакъутащ! Бабилэн зи цӀэ къалэшхуэр зэхакъутащ! Жинхэм я унэ хъуащ, сыт ищӀыс жин бзаджэ Ӏейхэми къуалэбзу гущыкӀыгъуэ фӀейхэми я псэупӀэ хъуащ,

³сыт щхьэкӀэ жыпӀэмэ а къалэшхуэм и хъуэпсэныгъэ Ӏейхэмрэ и зинэмрэ я фадэмкӀэ лъэпкъ псори игъэудэфащ Дунейм и пащтыхьхэми а къалэшхуэм зинэ дащӀащ. А къалэшхуэр мы дунейм и мылъкухэмкӀэ нэпсейуэ зэрыщытам щхьэкӀэ, дунейм и сатуущӀэхэр бей хъуащ».

⁴Уафэм къиӀукӀыу, нэгъуэщӀ макъ гуэрым мыр жиӀэу зэхэсхащ итӀанэ: «Си цӀыхухэ, а къалэшхуэм и гуэныхьхэмкӀэ Ӏыхьэгъу фымыхъун, икӀи абы гугъуехьышхуэу ишэчынур фымышэчын щхьэкӀэ, а къалэм фыкъыдэкӀ,

⁵сыт щхьэкӀэ жыпӀэмэ а къалэм и гуэныхьхэр зэтелъу уафэм нэсащ, щӀэпхъаджагъэу ищӀар Тхьэм и гум икӀыжынукъым.

⁶А къалэр фэ къызэрыфкӀэлъызекӀуам хуэдэу фэ фыкӀэлъызекӀуэж. Абы Ӏуэху бзаджэу ищӀам хуэдитӀ ефщӀэж. Фи фалъэм къыфхуригъэхъуа фадэм и дыджыгъэм хуэдитӀ фадэ дыдж и фалъэм хуивгъэхъуэж.

⁷ЩӀыхьышхуэрэ беягъэшхуэрэ езым зэрызыхуигъэфэщам хуэдэу, гугъуехь шэчыныгъэрэ гукъеуэрэ евгъэгъуэтыж. Сыт щхьэкӀэ жыпӀэмэ игукӀэ мыпхуэдэу жеӀэ: „Сэ пащтыхь цӀыхубзу мыбдеж сыщысщ. Сэ сыфызабэкъым икӀи сыщыгъуэну зэи къысхуихуэнукъым“.

⁸Абы щхьэкӀэ гугъуехьышхуэхэр зы махуэкӀэ къылъысынущ: лӀэныгъэри, щыгъуэныгъэри, гъаблэри. МафӀэм исынущ, Зиусхьэн Тхьэуэ а къалэм и хьэкумыр къытезыщӀыхьым лъэкӀыныгъэшхуэ иӀэщи».

⁹Дунейм и пащтыхьу абы зинэ дэзыщӀауэ, абы и мылъкум хэпсэукӀауэ пащтыхьхэр, а къалэшхуэр зыс мафӀэм и Ӏугъуэр щалъагъукӀэ, гузэсэнущ икӀи пыхьэнущ.

¹⁰А къалэшхуэм ишэч гугъуехьышхуэм щхьэкӀэ а пащтыхьхэр шынагъуэм хэхуэнущ, мыпхуэдэу жаӀэнущ жыжьэу щыту: «Уэ, лъэкӀыныгъэ зиӀэ Бабилэн къалэшхуэ, гъуэгу мыгъуэ утеуващ, гъуэгу мыгъуэ утеуващ, сыт щхьэкӀэ жыпӀэмэ пхуэфащэр зы сыхьэт закъуэкӀэ уагъэпшыныжащ».

¹¹А къалэшхуэр Тхьэм зэрызэхикъутам щхьэкӀэ, дунейм и сатуущӀэхэр гъынущ икӀи щыгъуэнущ, сыт щхьэкӀэ жыпӀэмэ абыхэм ящэр зыми ищэхужыркъым.

¹²Я дыщэр, я дыжьыныр, я мывэ лъапӀэхэр, я налкъутналмэсхэр зыми ищэхужыркъым; чэсей пӀащӀэхэр, щэкӀ плъыжьыбзэхэр, щэкӀ плъыжь-фӀыцӀафэхэр, данэхэр зыми ищэхужыркъым; мэ ӀэфӀ зыпих пхъэхэри, пыл къупщхьэм, пхъэ лъапӀэм, гъуаплъэм, гъущӀым, скъарым къахэщӀыкӀа хьэпшыпхэри зыми ищэхужыркъым;

¹³мэ ӀэфӀ къызыпих удзу синнамон, смирнэ, ладан зи цӀэхэр, мэ ӀэфӀ къызыпих дагъэр, фадэр, зейтун дагъэр,[49] хьэжыгъэ дэгъуэр, гуэдзыр зыми ищэхужыркъым; былымхэр, мэлхэр, шыхэр, гухэр зыми ищэхужыркъым; пщылӀхэри зыми ищэхужыркъым.

¹⁴СатуущӀэхэм а къалэшхуэм мыпхуэдэу жраӀэнущ итӀанэ: «УзыщӀэхъуэпса пхъэщхьэмыщхьэр пфӀэкӀуэдащ. Уи мылъкушхуэ псори, уи щӀыхьышхуэ псори пфӀэкӀуэдащ икӀи зэи бгъуэтыжынукъым».

¹⁵Ахэр къалэшхуэм щащэурэ, бей хъуа сатуущӀэхэр, къалэшхуэм ишэч хьэзабым щхьэкӀэ шынагъуэм хэхуауэ, жыжьэу къыщытынущ. Гъыурэ, щыгъуэурэ, мыпхуэдэу жаӀэнущ:

¹⁶«Уэ, къалэшхуэ, цӀыхубзым хуэдэу, чэсей пӀащӀэри, щэкӀ плъыжьыбзэри, щэкӀ плъыжь-фӀыцӀафэри пщыгъыу, дыщэмкӀи, мывэ лъапӀэхэмкӀи, налкъутналмэсхэмкӀи зыбгъэщӀэрэщӀащ, гъуэгу мыгъуэ утеуващ, гъуэгу мыгъуэ утеуващ.

¹⁷Сыт щхьэкӀэ жыпӀэмэ а мылъкушхуэ псори а къалэм сыхьэт закъуэм фӀэкӀуэдащ». Кхъухьхэм я пашэ псори, кхъухьымкӀэ зекӀуэ псори, кхъухьхэм щылажьэ псори жыжьэу къыщытынущ.

¹⁸А къалэшхуэр зыс мафӀэм и Ӏугъуэр щалъагъукӀэ, жаӀэнущ: «А къалэшхуэм хуэдэ къалэшхуэ зыри щыӀакъым».

¹⁹Гъыурэ, щыгъуэурэ, я гукъеуэм щхьэкӀэ я щхьэхэм мафӀэ сахуэр тракӀутэнущ икӀи гуоунущ: «Уэ, къалэшхуэ, гъуэгу мыгъуэ утеуващ, гъуэгу мыгъуэ утеуващ! Хым кхъухь щызиӀэ псори уи мылъкумкӀэ бей хъуащ. Псори пфӀэкӀуэдащ сыхьэт закъуэм.

²⁰А къалэшхуэр Тхьэм зэрызэхикъутам щхьэкӀэ уафэри, апостолхэри, бегъымбархэри, Тхьэм и цӀыху лъапӀэхэри фыгуфӀэ, бзаджагъэу къывищӀар Тхьэм а къалэм иригъэпшыныжащи».

²¹ИтӀанэ мелыӀыч лъэщ гуэрым щхьэл мывэм хуэдэ мывэшхуэ гуэр къиӀэтщ, хым хидзэри, мыпхуэдэу жиӀащ итӀанэ: «Бабилэн къалэшхуэр апхуэдэ къаруушхуэкӀэ ирадзыхынущ, ар зэи ягъуэтыжынукъым.

²²ШыкӀэ пшынэм, къамылым, бжьамийм я макъхэри, уэрэд макъхэри а къалэшхуэм щызэхахыжынукъым. Сыт хуэдэ ӀэщӀагъэ зиӀэри а къалэшхуэм щылэжьэжынукъым. Щхьэл мывэ макъри абы щызэхахыжынукъым.

²³Уэздыгъэ нэхуи а къалэшхуэм щыблэжынукъым. Щауэмрэ нысащӀэмрэ я макъхэри абы щызэхахыжынукъым. А къалэшхуэм и сатуущӀэхэр мы дунейм и цӀыху инхэм ящыщащ. И удыгъэмкӀэ а къалэшхуэм лъэпкъ псори щигъауэрт.

²⁴Бегъымбархэм ялъри, Тхьэм и цӀыху лъапӀэхэм ялъри, щӀылъэм щаукӀа псоми ялъри а къалэшхуэм къыщагъуэтащ».