Read Kadazan Dusun ISRA 5 Bible Online

ISRA 5 - Kadazan Dusun bible

ISRA 5

¹Tontok nopo do maso'ddi nga' tuminimpuun do mimboros dot id suang do ngaran do Kinorohingan dot Israil o duwo o nabi do kumaa id tulun do Yohudi di poingiyon do hilo'd Yohuda om hilo'd Yorusalim. Iyolo' nopo nga' i Hagai om i Sakaria, i tanak di Ido.

²Om korongou poddi iyolo' do boros di duwo o nabi diri, om timpuun no i Sorubabil i tanak di Sialtiol, om i Yosua i tanak di Yosadak, do mamaal kawagu di Walai'd Sasambayangan dot Agayo di hilo'd Yorusalim. Om nuhupan nogi' iyolo' di duwo o nabi diri.

³Nga' olomus nopo do ruminikot i Tatnai, i gobunor do watas dot Iprat di ponong id Kotonobon do miwoyo' di Sitar Bosnai om i piro-piro o tambalut diyolo' do hilo'd Yorusalim do minongoi solowot di tulun do Yohudi. Om ponguhot no iyolo', “Isai o minonuhu' dokoyu do mamaal om monukup do koburu-buruon diti Walai'd Sasambayangan diti?” ka.

⁴Om boros ka kawagu diyolo',[10] “Isai ngai' o ngaran di tulun di muhup do mamaal diti Walai'd Sasambayangan dot Agayo diti?” ka.

⁵Nga' piantangan id Kinorohingan om intirungan dau o koinsanai di boyoon do Yohudi gisom dot a' iddi i piro-piro o pagawai do Porsia minomonsoi do nunu-nunu dot a' po iyolo' koponulis do surat dot id di Darius, om a' po kaanu dot isimbar dau.

⁶Iti no o surat di pinokirim diyolo' dot id di Raja' Darius:

⁷“Kumaa dot id di Raja' Darius. Maha' daa om osimbayan o Raja' do momorinta'!

⁸Popoilo iyahai do Tuan Raja' do minongoi iyahai do hilo'd watas do Yohuda om nokito dahai do maan no kawagu waalo' i Walai'd TUHAN, i Kinorohingan dit Agayo, do watu dit angagayo o pomonsoi om linopisan do kayu i limput. Om sonongon tomod diyolo' o pomomonsoi'ddi om a' i' diyolo' opitingkad-tingkadan do momonsoi.

⁹Om uhoto' ngai' no dahai i boyoon do bansa'ddi ondung isai o minonuhu' diyolo' do mamaal kawagu di Walai'd Sasambayangan diri, om monukup di koburu-buruon do hiri.

¹⁰Om pinokianu ngai' nogi' dahai o ngaran diyolo' om osunudan i' dahai o Tuan Raja' ondung isai ngai' o boyoon do mamaal diri.

¹¹Om boros ka diyolo'd suminimbar, ‘Iyahai nopo om susuhuon do Kinorohingan do tawan om pomogunan om koinsanai do nunu nopo. Om waalon kawagu dahai iti Walai'd Sasambayangan dot Agayo, i pinoingkakat om sinukup do koburu-buruon dot iso' o raja' dot Israil dit abantug kopio di piro-piro nohopod o toun do nakatalib.

¹²Nga' pinopotogod iddi do Kinorohingan do surga, i taki-aki dahai, om pologoso' noddi dau iyolo' do naala' di Raja' Nobukadnisar, i raja' do pomogunan do Babil, i sinakagon do Kasdim. Om raago' no di raja' iti Walai'd Sasambayangan dot Agayo om tanggayai no i bansa' dahai do hilo'd pomogunan do Babil.

¹³Om kosiliu noddi i Koris do raja' do Babil om tontok di koiso' nogid toun do momorinta' iyau, om pomoros no iyau do monuhu'd mamaal kawagu diti Walai'd Sasambayangan dot Agayo.

¹⁴Om i koburu-buruon do mantad id Walai'd Sasambayangan dot Agayo, i tamas om pirok do winonsoi, i nanu di Raja' Nobukadnisar do mantad hiti'd Yorusalim om i pinosuang dau do hiri'd walai'd tingolig do hilo'd Babil, nga' pinoguli' i' di Raja' Koris. Om patahako' no di Raja' Koris i koburu-buruon diri dot id di Sisbasar, i siniliu dau do gobunor do Yohuda.

¹⁵Om suhuo' no iyau di raja' do mongigit ngai' di koburu-buruon diri om popoguli' do hiri'd Walai'd Sasambayangan dot Agayo di hilo'd Yorusalim, om mamaal kawagu di Walai'd Sasambayangan dot Agayo'ddi.

¹⁶Om ongoi noddi i Sisbasar do hilo'd Yorusalim om powonsoyo' no dau i poimpahan di Walai'd Sasambayangan dot Agayo. Om mantad poddi om gisom do baino' om wonsoi-wonsoyon nori, nga' a' poddi ma nopongo,’ ka diyolo'.

¹⁷Om iyo nopoddi om ondung kotumboyo' o Tuan Raja' om osonong do sorisidon kopio do mogontong o hiri'd potutulisan do pasal do pomorinta' do hilo'd Babil, ondung otopot ko' amu' do nokoponuhu' i Raja' Koris do mamaal kawagu di Walai'd Sasambayangan di hiti'd Yorusalim. Om poiloon nondo iyahai ondung poingkuro ot osorou do Tuan Raja' do pasal do hal diti,” ka.