Read Kadazan Dusun ISRA 6 Bible Online

ISRA 6 - Kadazan Dusun bible

ISRA 6

¹Om ponuhu' noddi i Raja' Darius do mogihum om monorisid kopio di hiri'd potutulisan do pasal do pomorinta' di poingopi' do hilo'd Babil.

²Nga' hilo'd bandar dot Amita, i hilo'd watas do Midia, om okon i' ko' hilo'd Babil, o kinokitanan dot iso' o surat di linopi do pinotulisan do poingkaa:

³“Tontok di koiso' nogi' do toun di Raja' Koris do momorinta', om ponuhu' no i Raja' do mamaal kawagu di Walai'd Sasambayangan dot Agayo di hilo'd Yorusalim, i tiyonon do tulun do papatahak do porsombahan om tiyonon do monorob do porsombahan di sumbolion. Kasawato' nopo di Walai'ddi om duwo nohopod om turu' o mito om kalaabo' nga' duwo i' nohopod om turu' o mito.

⁴Iri nopo pomolimput om lopisan do kayu o pointikid-tikid do tolu o lapis do watu. Om koinsanai dit apakai do pomonsoi nga' bayaran ngai' i' do mantad id kousinan do dong pomorinta'.

⁵Om iri koburu-buruon do hiri'd Walai'd Sasambayangan dot Agayo, do hilo'd Yorusalim, i tamas om pirok do winonsoi, i tinanggayan di Raja' Nobukadnisar do hiti'd Babil, nga' potondulion kopio do hiri'd pinoiyanan mantad,” ka.

⁶Om pokirimo' no di Darius ot isimbar do poingkaa, “Kumaa dot id di Tatnai, i gobunor do watas dot Iprat di ponong id Kotonobon, om id di Sitar Bosnai, om id piro-piro o pagawai do watas dot Iprat di ponong id Kotonobon. Kada' kou pamagangau di tulun do Yohudi diri,

⁷om kada' kou pomohimpogong do mamaal di Walai'd Sasambayangan dot Agayo diyolo'. Pologoson nopo i gobunor do Yohuda om i piro-piro o boyoon do tulun do Yohudi do mamaal di Walai'd Sasambayangan diri do hiri'd winaalan mantad di gulu po.

⁸Om suhuon ku iyokoyu do muhup diyolo' do mamaal diri. Om koinsanai dit apakai diyolo' do pomonsoi'ddi nga' mositi' no do bayaran dot oruhai do mantad id kousinan dit aanu do mantad id sukai dit otimung do hino'd watas dot Iprat di ponong id Kotonobon, om a' no opiundarang-darangan i waalon.

⁹Om suwai no ko' iri, om kada' no dokoyu kolihuwai do papatahak do nunu nopo i pokionuon di piro-piro ot imam do hilo'd Yorusalim. Sapi' tuu do tontoluhan dit okoro' po ko' dumba' ko' tanak do dumba' do maan do porsombahan di sumbolion dot id Kinorohingan do surga, om gandum om silaon om waig dot anggur om tumau do saitun.

¹⁰Wonsoyon ngai' no o miagal diri, om kapatahak i' iyolo' do porsombahan di sumbolion di korohian do Kinorohingan do surga, om opokionuan oku indo diyolo' do barakat, om i tangaanak ku'd tongokusai nga' opokionuan nogindo do barakat.

¹¹Om momoros oku nogi' dot ondung haro o tulun dot a' mumboyo' diti boros ku om ngoyon nopo iduwo' o tiso' di torigi do walai dau om lohisan no o somputul om posuhakon nopo do tinan di tulun diri do gisom do kolopuson. Om silihon nopo do pataaman do rinomos i walai dau.

¹²Om Kinorohingan no, i minomili' do Yorusalim do tiyonon do tulun do sumambayang dot id dau, o mamatai dot isai nopo o raja' ko' bansa' di kasaap do tumolibamban diti ponuhuan om i mumbal daa do mamaraag di Walai'd TUHAN di hilo'd Yorusalim. Iyoho' no, i Darius, o monuhu' diti. Om mositi' no dot umboyoon ngai' iti!” ka.

¹³Om wonsoyo' ngai' nopo di Tatnai, i gobunor do watas dot Iprat di ponong id Kotonobon, om i Sitar Bosnai om i piro-piro o tambalut diyolo' i pinonuhuan di Raja' Darius diri.

¹⁴Om potilombuso' nopo di piro-piro o boyoon do tulun do Yohudi do mamaal i Walai'd Sasambayangan dot Agayo, om a' no opiundarang-darangan. Om noodsuur nogi' iyolo' di boros di Nabi Hagai om i Nabi Sakaria. Om kopongo no diyolo' do mamaal i waalon do tumanud di pinonuhuan do Kinorohingan dot Israil, om i pinonuhuan di Koris, om i Darius, om i Artasasta, i piro-piro o raja' do pomogunan do Porsia.

¹⁵Om kopongo noddi kopio diyolo' i Walai'd Sasambayangan dot Agayo'ddi di tadau'd kotolu do tulan dot Adar, di koonom do toun do pomorintaan di Raja' Darius.

¹⁶Om sambayangai noddi di tulun dot Israil, om i piro-piro ot imam, om i tulun do Liwi, om koinsanai di tulun di nokoguli' do mantad id pomogunan di pinananggayan do pisangod, i Walai'd Sasambayangan dot Agayo do mikuwo'd ongooropod tomod o ginawo diyolo'.

¹⁷Om tontok no do kinapanambayangan diri do pinapatahak iyolo' do porsombahan do hatus o tinan do sapi' di tontoluhan, om duwo nahatus o tinan do dumba' di tontoluhan, om apat nahatus o tinan do tanak do dumba'. Om hopod om duwo o kambing do maan do porsombahan do pangampun do dusa do toinsanan di tulun dot Israil, do soronginanan o pointikid-tikid di payat dot Israil.

¹⁸Om sinompipi' nogi' diyolo' o sinompuruan di piro-piro ot imam om i tulun do Liwi do maganu-anu do hiri'd Walai'd Sasambayangan dot Agayo do tumanud dit oturan di nokotulis do hiri'd Buuk di Musa.

¹⁹Om ramayo' ngai' no di tulun di nokoguli' do mantad id pomogunan do pinananggayan do pisangod, o Tadau dot Agayo do Paska do tontok di tadau'd kohopod om apat di tulan do koiso', di toun kawagu.

²⁰Om oinsanan nopo it imam om i tulun do Liwi do minomolidang do tinan diyolo', om ongolidang noddi iyolo'. Om sumbolio' noddi di tulun do Liwi i piro-piro o tayam-tayam do maan do porsombahan di sumbolion do tontok do Paska do maan do koinsanai di tulun do guminuli' do mantad id pomogunan di pinananggayan do pisangod, om maan ngai' dit imam, om maan do diyolo'.

²¹Iri nopo porsombahan di sumbolion diri nga' nakan do toinsanan di tulun dot Israil di nokoguli' do mantad id pomogunan do pinananggayan do pisangod, om koinsanai di tulun do poingiyon dot id pomogunan diri, i tuminongkiad do mantad id kowoyo-woyoon do momonsoi'd dusa om rumikot nondo do mongoi sambayang dot id TUHAN, i Kinorohingan do tulun dot Israil.

²²Om rinamai po diyolo' i Tadau'd Agayo do Roti dit A' Kipangambang do solinaid do turu' o tadau, do mikuwo'd ongotood kopio iyolo'. Om ongotood tomod iyolo' tu' pinolisiu id TUHAN i raja' dot Asur[11] dot id diyolo' om minuhup iyau diyolo' do minamaal di Walai'd TUHAN i Kinorohingan do tulun dot Israil.