Read Kadazan Dusun NOHOMIA 13 Bible Online

NOHOMIA 13 - Kadazan Dusun bible

NOHOMIA 13

¹Tontok di binasa' i Tourat di Musa dot id tulun dot ogumu' om kabantalai no diyolo' i bohogian di minomoros dot a' kopio koino-ino do kopiamung o tulun dot Amon om tulun do Muab do tulun di songonuon do Kinorohingan.

²Koiya-iyaan nopodti nga' a' minanahak do taakanon om waig i tulun dot Amon om Muab dot id tulun dot Israil do tontok di hiri iyolo'd tanga'd ralan di kososoliwan diyolo' do mantad hilo'd Masir. Tu' ginodsian nogi' daa diyolo' i Biliam do momopol di tulun dot Israil nga' siniliu id Kinorohingan do barakat i popol diri.

³Om soira' di norongou di tulun dot Israil it tourat diri do binasa' om potongkiado' no diyolo' o koinsanai di tulun do bansa'd suwai do mantad hiri'd pogialatan do tulun dot Israil.

⁴I Iliasib nopo, it Imam diri om mongilo-ilo di bilik do poopian do hiri'd Walai'd Sasambayangan dot Agayo, om laid no do monokiambalut di Tobia.

⁵Om patahako' no di Iliasib dot id di Tobia ot iso' di bilik dit agayo. Iti nopo daa bilik diti om maan do poopian do porsombahan do gandum om kominyan, om i piro-piro o pakakas do pakayon do hiri'd Walai'd Sasambayangan dot Agayo, om i porsombahan do dong imam, om i porsombahan do sompihopod do gandum, om waig dot anggur, om tumau do saitun do potikidon di tulun do Liwi, om potikidon di tulun di modsisinding, om i madtatamong di wawayaan di Walai'd Sasambayangan dot Agayo.

⁶Tontok nopo di nosiliu o miagal diri, om okon oku ko' hilo'd Yorusalim, tu' nopo di kotolu nohopod om duwo do toun di Raja' Artasasta[23] do momorinta' do hilo'd Babil, om guminuli' oku do hilo'd Babil do minongoi posunud di nongowonsoi ku dot id dau. Om alaid-laid poddi om pologoso' oku nogi' dau

⁷do gumuli' do hilo'd Yorusalim, om uli' oku no. Om soira' di nokorikot oku'd hilo' nga' nokotigowo tomod oku do nokoilo do nonuan di Iliasib i Tobia dot iso' o bilik do hiri'd Walai'd Sasambayangan dot Agayo.

⁸Om otogod oku no kopio, om popinsoliwano' ngai' ku nopo i konunu-nunuan di Tobia.

⁹Om ponuhu' oku noddi do momolidang di piro-piro o bilik di hiri'd Walai'd Sasambayangan dot Agayo, om i porsombahan do gandum, om kominyan.

¹⁰Om koilaai ku nogi' do guminuli' ngai' do hiri'd tumo diyolo' i popouni do tuunion do hiri'd Walai'd Sasambayangan dot Agayo, om i tulun do Liwi do suwai, om tuminongkiad iyolo' do mantad hilo'd Yorusalim tu' a' iyolo' di rayat onuan do maan do diyolo'd kaakan-akanan.

¹¹Om togodo' ngai' ku no i pagawai tu' pinologos i' diyolo' dot a' nogompi' i Walai'd Sasambayangan dot Agayo. Om ongoyo' ku no pogulio' do hiri'd Walai'd Sasambayangan dot Agayo i tulun do Liwi om i popouni do tuunion om suhuo' ku no kawagu iyolo' do maganu-anu'd hiri.

¹²Om oinsanan nopoddi i tulun dot Israil do tuminimpuun kawagu do pinapaatod do porsombahan do sompihopod do gandum, om waig dot anggur, om tumau do saitun, do hiri'd bilik di poopian do hiri'd Walai'd Sasambayangan dot Agayo.

¹³Om suhuo' ku no iti tulun diti do mongilo-ilo di piro-piro o bilik di poopian diri: i Solomia it Imam, i Sadok it oilo kopio di Tourat, om i Podaya, i tulun do Liwi. I Hanan, i tanak di Sakur, i manangaki di Matania o sinuhu' ku do monguhup diyolo'. Oilaan ku i' do milo ngai' ku do ponongkuyaan i tulun diri tu' otulid i' o popotikid diyolo' di kaakan-akanan dot id kongoombolutan diyolo' di maganu-anu'd hiri.

¹⁴Oi Kinorohingan ku, soroho' no o koinsanai di winonsoi ku do bagi' di Walai'd Sasambayangan dot Agayo om i toonuon do hiri.

¹⁵Tontok nopo do maso'ddi om haro o nokito ku do piro-piro tulun do hilo'd Yohuda do mamaga' dot anggur do tontok do tadau'd Sabat. Om tulun nod suwai om papagandar do gandum, om anggur, om tua' dot anggur, om tua' dot ara, om konunu-nunuan do suwai dot id kaladai diyolo' dot igitan diyolo' do hilo'd Yorusalim. Om oduhai ku no iyolo'd papadagang do nunu nopo do tontok do tadau'd Sabat.

¹⁶Om haro o piro-piro tulun do mantad hilo'd bandar do Tirus di poingiyon do hilo'd Yorusalim do mongigit do sada' om mogisuwai-suayan nopo o dagangon diyolo' do hiri'd bandar do Yorusalim do padagangon dot id tulun dot ogumu' do tontok do tadau'd Sabat.

¹⁷Om togodo' ngai' ku no i boyoon do tulun do Yohuda. Boros kangku, “Antangai pogi' iti kararaat do wonsoyon dokoyu! Monosomu' kou do tadau'd Sabat.

¹⁸Iti nogi' kopio o dusa do kinopomohukuman do Kinorohingan di taki-aki toko' om pinologos dau'ddi do rinaag iti bandar. Om poporikot kou po daa kawagu do kototogod do Kinorohingan dot id tulun dot Israil tu' sosomuon i' dokoyu o tadau'd Sabat?” kangku.

¹⁹Om ponuhu' oku noddi do modtobon ngai' di wawayaan di bandar do pointikid-tikid do koimpuunon do tadau'd Sabat,[24] di tuminimpuun nogi' do sumodop, om a' no iwangan dot a' po atalib o tadau'd Sabat, dit otonob o tadau do tontok do tadau'ddi. Om suhuo' ku no piro-piro di tulun ku do tumamong do hiri'd piro-piro o wawayaan om aiso' i' o dagang-dagangon dot oigitan do sumuang do hiri'd bandar do tontok do tadau'd Sabat.

²⁰Nga' haro dot insan ko' induwo do minodop daa do hiri'd soliwan di tolig di bandar do tontok di totuong do tadau'd kolimo i tulun do dumagang do mogisuwai-suayan o dagangon.

²¹Om poinsano' ku no iyolo'. Boros kangku, “Aiso' i' ot aanu-anu dokoyu do mandad do hino do gisom do kosuabon. Ondung mumbal kou kawagu do momonsoi do miagal diti om awagat no moti' o wonsoyon ku dot id dokoyu,” kangku. Om mantad poddi om a' noddi iyolo' insan ongoi do hiri do tontok do tadau'd Sabat.

²²Om suhuo' ku no i tulun do Liwi do momolidang do tinan diyolo' om mongoi padtamong ngai' di wawayaan om pusohon indo do tulun o tadau'd Sabat. Om sambayang oku no do poingkaa, “Oi Kinorohingan, soroho' oku no dot iti hal diti o kopomusarahan, om kosianai no doho' do miontok di kosianan nu dit agayo kopio,” kangku.

²³Om tontok nogiddi do noilaan ku dot ogumu' o tongokusai do Yohudi do nakapanansawo do tongoondu' do bansa'd Asdod, om Amon om Muab.

²⁴Om songintanga' nopo di tangaanak diyolo' nga' dong Asdod nod boros ko' boros do bansa'd suwai o boros diyolo' om a' no iyolo' koilo do momoros do boros dahai.

²⁵Om togodo' ku no i tongokusai'ddi om papalai ku no iyolo'. Om haro nogi' o binobog ku, om nundat ku o tobuk. Om suhuo' ku no iyolo' do sumumpa' dot id suang do ngaran do Kinorohingan dot a' iyolo' om i tangaanak diyolo' mumbal kawagu do manansawo do bansa'd suwai.

²⁶Boros kangku, “Minamayayat nopo di Raja' Suliman do minomonsoi'd dusa om i tongoondu' do bansa'd suwai. Iyau nopo daa om songulun o raja' dit agayo po ko' mantad di piro-piro o raja' do bansa'd suwai do hiti'd pomogunan. Om kinosianan i' iyau do Kinorohingan gisom do siniliu iyau'd raja' do koinsanai dot Israil, nga' naratu' iddi iyau dot id dusa do nabayayat iyau di tongoondu' di bansa'd suwai.

²⁷Araat no kopio o winonsoi dokoyu! Kasaap kopio kou daa do sumaap do Kinorohingan tu' minanansawo kou i' do tongoondu' do bansa'd suwai!” kangku.

²⁸I Yoyada nopo nga' tanak i' di Iliasib, i Boyoon dot Agayo dot Imam, nga' haro i' o tiso' di tanak dau'd kusai do minanansawo di tanak do tondu' di Sanbalat, i mantad hilo'd bandar do Bait-Horon. Om uyungo' ku noddi i Yoyada do mantad hilo'd Yorusalim.

²⁹Om sambayang oku nod poingkaa, “Oi Kinorohingan ku, soroho' no o pinonosomu' diti tulun di karaja' do dong imam om i tumpongo do winonsoi nu dot id piro-piro ot imam om id tulun do Liwi!” kangku.

³⁰Om iyo noddi o pinomolidang ku di tulun dot Israil do mantad id koinsanai di dong bansa'd suwai. Om tontuo' ku no o buruon di piro-piro ot imam om i tulun do Liwi om koilo ngai' i' iyolo' do buruon diyolo'.

³¹Om tontuo' ku no o maso do kapaatadan di siduwon do pogudung di porsombahan do sumbolion. Om tinantu' ku nogi' o maso do kapaatadan diyolo' di porsombahan diyolo' do tua' do gandum om tua-ua' do suwai dit id gulu koonsok. Om id tohuri noddi om sambayang oku nod poingkaa, “Soroho' ngai' no iti, oi Kinorohingan ku, om kosianai no doho',” kangku.