Read Kadazan Dusun NOHOMIA 2 Bible Online

NOHOMIA 2 - Kadazan Dusun bible

NOHOMIA 2

¹Insan tadau dit apat no o tulan do nakatalib, do tontok di tulan do Nisan, di maso di Raja' Artasasta do makan, om ngoyo' ku no patahako' i waig dot anggur dot id dau, nga' olunggui tomod oku. Om a' oku po nokoumbal dot olunggui dot id toguang dau do miagal di tadau'ddi.

²Om uhoto' oku no dau, “Nokuro tu' tumongob kopio ko, om a' ko i' sumakit? Nga' atantu' nod haro o katangkabaan nu,” ka dau. Om kotigowo oku,

³om boros kangku'ddi do suminimbar, “Maha' daa om otogui o raja'! Poingkuro oku po dot a' tumongob do maso pod poingraag i bandar di pinamalabangan di taki-aki ku om i wawayaan di bandar nga' nongosorob ngai',” kangku.

⁴Om ponguhot no i raja', “Nunu daa'ddi o pokionuon nu?” ka dau. Om sambayang oku no dot id Kinorohingan di momorinta' do surga dot id suang do ginawo ku,

⁵om boro-boros oku nogiddi di raja' do poingkaa, “Ondung ohubayaan o raja' doho' om orohian do papatahak do pokionuon ku om pologoso' oku no do mongoi'd hilo'd pomogunan do Yohuda, i bandar do pinamalabangan di taki-aki ku om owonsoi ku i' kawagu i bandar diri,” kangku.

⁶Om kookunai noddi di raja' i pinokianu ku'ddi. Iri nopo i sawo di raja' nga' poirikau dot id talad dau. Om uhoto' oku no dau ondung songkuro koloido' ku'd poundorong do hilo', om ondung soira' oku'd koguli', om sunudai ku no iyau.

⁷Om pokianu oku nod surat do mantad id raja' do patahakon di piro-piro o gobunor do watas dot Iprat, di ponong id Kotonobon,[3] do momisunud diyolo' do popologos doho' do mamanau do mongoi'd hilo'd Yohuda.

⁸Om minokianu oku nogi' do surat do patahakon dot id di Asap, i madtatamong di puru' do dong porinta, do momisunud dau do manahak doho' do kayu do pomonsoi di wawayaan di tolig di kuta' di mongintirung di Walai'd Sasambayangan dot Agayo, om pomonsoi di tolig di bandar, om pamaal di walai dot iyonon ku. Om patahako' ngai' nopo di raja' i pinokianu ku tu' nuhupan oku i' do Kinorohingan.

⁹Om paatadai oku po di raja' do piro-piro o boyoon do soudor om soudor di poinsakai'd kuda' do momoyo' doho'. Om pamanau oku no do kuminaa do ponong hilo'd watas dot Iprat di ponong id Kotonobon. Om hilo' no do pinatahak ku i surat di raja' dot id piro-piro o gobunor di hilo'.

¹⁰Nga' i Sanbalat nopo, i tulun do mantad hilo'd Bait-Horon, om i Tobia, i tulun dot Amon, nga' araatan tomod do nokorongou do nokorikot oku do mongoi ponulung di bansa' dot Israil.

¹¹Om lombus oku no do minamanau om korikot oku no do hilo'd Yorusalim om undorong oku nod hilo' do solinaid do tolu o tadau.

¹²Solinaid nopoddi om a' oku i' minomisunud dot isai nopo o tulun do pinopoilo o Kinorohingan doho' do momonsoi kawagu di bandar do Yorusalim. Om kosuabon noddi kawagu dit otuong-tuong po om tungag oku no om soliwan oku no di bandar do miwoyo' do piro-piro o tambalut ku. Om a' no iyahai minongigit do tayam-tayam do suwai do maan do sakayon do suwai ko' iri no i kaladai di sinakai ku.

¹³Otuong po do tontok di suminoliwan iyahai di bandar do minaya' di wawayaan di roitan do Wawayaan do Rantai, i hiri'd ponong id kotonobon. Om pakayaai no dahai ponong id salatan, do minaya' di Tudan do Waig do Naga', do pinakayaan dahai do hiri'd wawayaan di roitan do Wawayaan do Rinomos. Om tontok di manau-panau oku om pingantangai ku no i tolig di bandar di nangaraag om i piro-piro o wawayaan di nosorob.

¹⁴Om tontok di hiri iyahai'd bohogian di bandar di ponong id koulayon om pakayaai no dahai ponong id utara do kumaa do hiri'd wawayaan di roitan do Wawayaan do Tudan do Waig om hiri'd Torobong do Raja'. Om aiso' no o wayaan di kaladai di sinakai ku tu' ogumu' kopio i' i kinaraagan.

¹⁵Om poruhukai no dahai do hiri'd Rantai do Kidron om lombus nopo iyahai do minamanau do totuong diri do miningontong di bandar. Om pahamadai no dahai do guminuli' kawagu do hiri'd bandar do minaya' di wawayaan di roitan do Wawayaan do Rantai.

¹⁶Om aiso' i' o tiso' di pagawai do nokoilo do nongoi ku om aiso' o koilo ondung nunu i sorohon ku do wonsoyon ku. Tu' gisom piya'ddi nga' aiso' po nokoboros ku dot id tulun di sompi' ko' Yohudi dot id piro-piro ot imam ko' id piro-piro di boyoon ko' id piro-piro di pagawai, ko' id isai nopo di kouhup do momonsoi di bandar do Yorusalim.

¹⁷Nga' boro-boros oku noddi dot id diyolo' do poingkaa, “Antangai pogi' o koinggoritan toko'. Tu' pogun po o Yorusalim om ilo' ngai' wawayaan diti bandar nga' nongosorob. Kainou wonsoyo' toko' kawagu iti tolig diti bandar om a' toko' i' ointingayam kawagu,” kangku.

¹⁸Om sinunudan ku nogi' iyolo' di kinowoyo-woyoo' do Kinorohingan do minonguhup doho', om i nokoboros di raja' dot id doho'. Om boros ka diyolo', “Kainou tumimpuun do momonsoi kawagu'dti!” ka. Om sodia' ngai' noddi iyolo' do momonsoi di karaja'ddi.

¹⁹Nga' soira' di nokorongou i Sanbalat, om i Tobia, om i Gisim, i tulun dot Arab diri, di maan dahai wonsoyo' om irak-irakai no iyahai diyolo' om nuntotori' iyahai diyolo'. Boros ka diyolo', “Nunu daa ot osorou-sorou dokoyu do wonsoyon dokoyu! Sumaap kou daa di raja'?” ka.

²⁰Om boros kangku do suminimbar, “Poundaron id Kinorohingan di momorinta' do surga iti wonsoyon dahai. Iyahai nopo om susuhuon i' dau, om tumimpuun no iyahai do momonsoi kawagu'dti. Nga' iyokoyu nopo om aiso' i' o kosorupayan do sumanganu do nunu nopo i hiti'd Yorusalim. Om soira' nopo do mogiboro-boros o tulun do pasal do Yorusalim om a' i' oroitan o dokoyu'd ngaran,” kangku.