Read Kadazan Dusun NOHOMIA 4 Bible Online

NOHOMIA 4 - Kadazan Dusun bible

NOHOMIA 4

¹Om soira' di nokorongou i Sanbalat do nokotimpuun no iyahai, i tulun do Yohudi, do momonsoi kawagu di tolig di bandar om kotogod no tomod iyau om timpuun no do momohingi-hingi dahai.

²Om boros ka dau dot id toguang di koombolutan dau, om id toguang di piro-piro o soudor do Samaria, “Nunu daa ot osorou-sorou diti tulun do Yohudi di nongorutum diti, do wonsoyon diyolo'? Osorou tuu daa diyolo' do momonsoi kawagu diti bandar? Ondos tuu daa diyolo' om opongo no diyolo' ilo karaja' do sangadau noo do momongo, do papatahak iyolo'd porsombahan di sorobon? Milo i' kaka iyolo' do manganu do watu do mantad hiri'd kinotimungon di nongosorob do maan do pomonsoi kawagu?” ka.

³Om i Tobia nga' poingkakat i' do hiri'd toning dau. Om boros ka dau iyau, “Okuro-kuro kaka o tolig do wonsoyon diyolo'? Toni-toni nopo nga' kahaba' nobo'ddi!” ka.

⁴Om sambayang oku nod poingkaa, “Oi Kinorohingan, pokinongoho' no ilo pomohingi-hingi diyolo' dahai! Om pologoso' no dot ogulian iyolo' dilo pomohingi-hingi diyolo'. Pologoso' no dot apanakahan iyolo' do koinsanai di haro dot id diyolo', om pologoson no iyolo' dot atangkap om atanggayan do pisangod dot id pomogunan do suwai.

⁵Kada' no ompunai i winonsoi diyolo' dot araat om kada' kolihuwai i dusa diyolo' tu' nokopongindaraat no kopio iyolo' dahai, iyahai i momonsoi diti tolig,” kangku.

⁶Om wonsoyo' nopo dahai i tolig, om a' po alaid om songintanga' no o kasawato' di tolig do mantad ko' i kasawato' mantad, tu' ongorohian kopio i' o koinsanai di tulun do momonsoi di tolig.

⁷Om soira' di nokorongou i Sanbalat, om i Tobia, om i tulun dot Arab, om Amon, om Asdod dot a' dahai notingkadan do momonsoi kawagu i tolig do Yorusalim, om nosombol ngai' dahai i nongoposu, om a' noddi ogina-gina' o kototogod diyolo'.

⁸Om pogipapakat noddi iyolo' do mongoi panangod om mongoi pamagangau do Yorusalim,

⁹nga' sambayang no iyahai dot id Kinorohingan dahai om ponuhu' no iyahai do tongokusai do tumamong do sumaap diyolo' do tadau om totuong.

¹⁰Om iti no o sinding do sininding di tulun do Yohudi, “Ongoluhoi no iyahai do mamabo diti binabo; ogumu' kopio o kinaraagan do maan iduwo'. A' no iyahai kogoos do momonsoi kawagu diti tolig do baino',” ka.

¹¹Ondos daa di pisangod dahai om a' iyahai kokito diyolo' om a' iyahai koilo di wonsoyon diyolo' dot id dabantalan dot a' po iyolo' korikot do mongoi pamatai dahai om mongoi poningkod di karaja' dahai.

¹²Nga' mongoi kasai' nopo i tulun do Yohudi di poingiyon dot id rolot di pisangod do popoinsan dahai dit osorou daa di pisangod dahai do wonsoyon diyolo' dot id dahai.[7]

¹³Om onuwai ngai' ku noddi i tulun do rapo-rapo do don sumasangod. Nonuan ku iyolo' do gayang om tandus om pana'. Om potomongo' ku no iyolo' do tumanud di pinuruan do sompiiyon diyolo' do hiri'd tolikud do hinonggo nopo o tolig dit a' po nopongo.

¹⁴Om okito ku'ddi do moddosi ngai' i tulun. Om boros kangku dot id diyolo' om id koinsanai di boyoon om i pagawai diyolo', “Kada' kou poddosi dilo pisangod toko'. Sorohon toko' no do TUHAN nopo om okoris i' om agayo o kuasa', om sangod toko' no do bagi' do bansa' toko', om bagi' do tangaanak toko', om sawo toko', om bagi' diti walai toko',” kangku.

¹⁵Om korongou noddi di pisangod dahai do noilaan dahai it osorou daa diyolo' do wonsoyon diyolo' dot id dahai, om kopurimanai noddi diyolo' do naantaban id Kinorohingan it osorou mantad diyolo' do wonsoyon. Om oinsanan nopoddi iyahai do guminuli' do minongoi pomonsoi kawagu di tolig.

¹⁶Om mantad poddi om songintanga' nopo di tulun ku om momonsoi di tolig om songintanga' no om madtamong do kipinakai do rasuk do basi' om ongkitandus om ongkikolid, om ongkipana'. Om iso-iso' ngai' nopo o ginawo di boyoon dahai do sumokodung do koinsanai di tulun

¹⁷di momonsoi kawagu di tolig. Om iri i tulun dot ongkiinigit di pakakas do pomonsoi o tiso'd longon nga' kiinigit po do rapo-rapo do don sumasangod o longon do tiso'.

¹⁸Om koinsanai di momonsoi di tolig nga' ongkiabil ngai' nopod gayang. Om iri nopo tulun di popouni do torumpit do popoinsan nga' moyo-woyo' ngai' nopo doho'.

¹⁹Om sunudai ngai' ku no i tulun om i pagawai om i boyoon diyolo' do poingkaa, “Iti nopo karaja' diti nga' agayo kopio o kinotongkopon om mogiinsodu-odu' toko'ddi do momonsoi diti tolig.

²⁰Nga' soira' nopo dot orongou dokoyu i torumpit om tumimung kou no do hiti'd posorili' ku. Om sumaap indo o Kinorohingan do bagi' dati',” kangku.

²¹Gowoi poddi om pointikid-tikid nopod tadau do mantad poddi numawau nogi' om gisom do koulai i rombituon do dongotuong do kumaraja' o songintanga' dahai do momonsoi di tolig om songingkakat o songintanga' dahai do madtamong dot ongkiinigit do tandus.

²²Om maso nodti do sinunudan ku i tongokusai di momohuruan om i mongunguhup diyolo' do mundorong do hilo'd Yorusalim do dongotuong om atamangan i' dahai i bandar om kakaraja' pondo do dangadau.

²³Om a' ku i' iduwon i rasuk ku do dongotuong piya, om i piro-piro o tambalut ku om i piro-piro o susuhuon ku om i piro-piro o madtatamong doho' nga' aiso' i' o mongidu'd rasuk. Om ongkiinigit kasai' nopo iyahai di rapo-rapo dahai do don sumasangod.[8]