Read Kadazan Dusun NOHOMIA 5 Bible Online

NOHOMIA 5 - Kadazan Dusun bible

NOHOMIA 5

¹Om alaid-laid noddi do mantad diri om ogumu'ddi o tulun, do Yohudi do tongokusai om tongoondu' do somboro-boros dot a' manangkasanangan di sompi' ko' tulun do Yohudi di suwai.

²Boros ka nod wookon diyolo', “Iyoho' nopo om ogumu' o tanak. Om manu iyahai'd gandum tu' iri poo o koposion dahai,” ka.

³Om boros ka nod wookon om, “A' no milo dot a' pasandaon o tumo, om kabun dot anggur, om walai ku tu' mokiboboli oku'd gandum, om a' i' iyahai olikapan,” ka.

⁴Om suwai nod tulun om somboro-boros dot, “A' no milo dot a' iyahai molos do tusin do maan do pambayar do sukai di pokionuon do raja', do ponukai di tumo om kabun dot anggur dahai.

⁵Iyahai nga' sompi' i' ko' tulun do Yohudi. Om tangaanak dahai nga' iyo i' di tangaanak do Yohudi'd suwai. Nga' dahai nopod tangaanak om a' no milo dot a' osiliu do turipon. Om haro no o piro-piro di tangaanak dahai do tongoondu' do nakadagang do silihon do turipon. Nga' aiso' no o milo dahai'd pokukurayan tu' tumo om kabun dot anggur dahai nga' nangkasanda' ngai' no dahai,” ka.

⁶Om soira' di norongou ngai' ku i boros diyolo'ddi om otogod tomod oku'ddi,

⁷om osorou ku'ddi dot apatut do haro o wonsoyon. Om togodo' ngai' ku no i boyoon om i boyoon do rayat. Om boros kangku dot id diyolo', “Minonginggorit kou do tobpinai dokoyu!” kangku. Om papaharo oku noddi do pitimungan do koinsanai'd tulun do manalasai do kosusaan diri.

⁸Boros kangku, “Nokototos no iyahai do mimboli kawagu di piro-piro koobpinayan toko' di sompi' ko' tulun do Yohudi dit a' no kumukuro dot a' dumagang dot id tulun do bansa'd suwai. Nga' baino' noddi om iyokoyu o mamadsal do koobpinayan dokoyu do padagang do tinan diyolo' do sumiliu do turipon dokoyu, om iyolo' daa nga' sompi' i' ko' tulun do Yohudi!” kangku. Om kada' nopo ungkomi i piro-piro o boyoon tu' aiso' no o milo diyolo'd posimbaron.

⁹Om boros kangku'ddi kawagu, “Iri nopo winonsoi dokoyu'ddi om a' no kopio osonong. Apatut dot oronok kou do Kinorohingan om momonsoi dit otopot. Om a' kou indo kowonsoi do paantakan di pisangod toko', i tulun dot aiso' o Kinorohingan do momohingi-hingi dati'.

¹⁰Nokoolos ngai' ku no i tulun diri do tusin om gandum, om i piro-piro o tobpinai ku om i kongoombolutan ku nga' pinopoolos nogi'. Baino' nopo om kada' toko' no pokionuo' i pambayar daa do tutang diyolo' dot id dati'.

¹¹Tonuson ngai' nopo i tutang diyolo' dot id dokoyu dot iri tuu i tusin ko' i gandum, ko' i waig dot anggur ko' tumau po do saitun. Om lomusan no kopio dokoyu do popoguli' dot id diyolo' di tumo, om i kabun dot anggur, om i kabun do saitun om i walai diyolo'!”[9] kangku.

¹²Om boros kaddi di piro-piro o boyoon, “Wonsoyon i' dahai o miagal di nokoboros nu. Pogulion ngai' i' dahai iri om a' no dahai pokibayaran i tutang diyolo',” ka. Om lohowo' ngai' ku no it imam om suhuo' ku no i piro-piro o boyoon diri do sumumpa' dot id toguang ngai' dit imam do wonsoyon kopio diyolo' o miagal di nokoboros diyolo'ddi.

¹³Om iduwo' ku noddi i tagkos[10] ku di poingagkos ku om poungkarabo' ku no. Om boros kangku'ddi, “Miagal nodti o Kinorohingan do poungkarab dot isai nopo dokoyu it a' sumulung di batos di pinoboros dokoyu'ddi. Om ngoyon nondod Kinorohingan o walai dokoyu om koinsanai do dapu' dokoyu om rumutum kou nondo,” kangku. Om oinsanan nopo i tulun di songintimung do hiri do minomoros dot, “Amin!” ka. Om pamarayou noddi iyolo'd TUHAN. Om wonsoyo' noddi di piro-piro o boyoon i nakabatos diyolo'.

¹⁴Nosiliu oku'd gobunor do Yohuda do solinaid do hopod om duwo o toun, do mantad di koduwo nohopod do toun di Raja' Artasasta do momorinta' om gisom di kotolu nohopod om duwo do toun dau do momorinta'. Om solinaid nopoddi om a' oku i' om i koobpinayan ku insan panganu di taakanon di maan daa do dong gobunor.

¹⁵Nga' pointikid-tikid di gobunor dot id gulu ko' iyoho' om nosiliu ngai' nopod tonggungan di rayat dot awagat tu' minokianu i' iyolo' dot apat nohopod o tusin do pirok do sangadau,[11] do maan diyolo'd pomoli do taakanon om waig dot anggur. Om iri piya i susuhuon diyolo' nga' nokoponginggorit i' di rayat. Nga' iyoho' nopo om a' oku i' minomonsoi do miagal diri tu' ooris oku i' do Kinorohingan.

¹⁶Tuminotos oku nogi' do gisom dot agaas-gaasan ku do minononong di tolig om a' oku i' mininganu do tana' dot ongokooro' piya do maan ku'd doho'. Om iri nogi' i pakaraja' dot id doho' nga' minuhup ngai' i' do minononong di tolig.

¹⁷Om oubas oku nogi' do popoilang do makan do hiri'd walai ku do hatus om limo nohopod o tulun do Yohudi do mogiwoyo-woyo' di piro-piro o boyoon diyolo'. Om paakanon ku po o koinsanai di tulun do rumikot dot id doho' do mantad id bansa'd suwai di hiri'd posorili'.

¹⁸Monikid tadau oku nopo do monumbali' do songinan o sapi' om onom o tinan do dumba' dit ongolomu' om ogumu' o manuk do sumbolion ku. Om pointikid-tikid do tadau'd kohopod om poposodia' oku do waig dot anggur di wagu po kowonsoi. Nga' oilaan ku i' o kawagato' do tonggungan di rayat om a' ku iddi nanu i bohogian do tahakon do maan do dong gobunor.

¹⁹“Om pokionuon ku no, oi Kinorohingan, do sorohon ngai' nu daa i nongowonsoi ku do bagi' diti bansa'dti, om barakatai oku no,” kangku.