Read Kadazan Dusun NOHOMIA 6 Bible Online

NOHOMIA 6 - Kadazan Dusun bible

NOHOMIA 6

¹Om korongou noddi i Sanbalat om i Tobia, om i Gisim, om i piro-piro o pisangod dahai'd suwai do nopongo no dahai do momonsoi i tolig, om i nongoposu nga' nongosombol no, om iri po i piro-piro o totobon ot a' dahai nokodokot do hiri'd piro-piro o wawayaan di bandar.

²Om posunudai oku no di Sanbalat om i Gisim do mangangat daa doho' do mongoi solowot diyolo' dot id iso' o kawalayan do hilo'd Rantai dot Ono. Nga' oilaan ku i' do popokoruol daa iyolo' doho'.

³Om ponuhu' oku noddid tulun do mongoi pomisunud diyolo' dot a' oku koongoi tu' maso ku do momonsoi'd karaja' dit agayo kopio. Mada' oku i' dot otingkadan i karaja' do mongoi solowot diyolo' o kotingkad-tingkadan.

⁴Om ingapat oku nopo daa diyolo' posunudai do boros do miagal diri nga' iyo kasai' nopoddi o posimbaron ku.

⁵Om suhuo' no di Sanbalat o tiso' di susuhuon dau do mongoi pomisunud doho' di koinglimo no. Nga' iti nopo baino' om tinulis dot id surat di poingukab.[12]

⁶Poingkaa o suang di surat: “Minomisunud i Gisim doho' do haro o pimboroson do tulun di bansa'd suwai do hiti'd posorili' do mumbal kou daa di tulun do Yohudi do sumaap do porinta, om iri noddi o kapananangan dokoyu di tolig di bandar. Om nokoboros nogi' dot osorou-sorou nu daa do sumiliu'd raja' do Yohudi,

⁷om nokopomili' ko no do piro-piro o nabi do poposiliu diya'd raja' do hilo'd Yorusalim. Om pointantu' no do korongou i' i raja' do pasal diti om osorou ku dot osonong nogi' do misolowot to om opibara-barasan no o hal diti,” ka.

⁸Om pokirimai ku no iyau dot isimbar do poingkaa, “Aiso' i' ot otopot di boros nu'ddi. Winonsoi-wonsoi nu i' iri,” kangku.

⁹Om mumbal daa iyolo' do monompurolosi dahai om otingkadan indo dahai i karaja'ddi. Nga' sumambayang oku po do poingkaa, “Oi Kinorohingan, pokoriso' oku no!” kangku no.

¹⁰Om tontok nogiddi do minongoi oku songkoduwo do hiri'd di Somaya, i tanak do kusai di Dolaya, i manangaki di Mihitabiil, tu' a' iyau milo do tumongkiad di walai dau do mongoi solowot doho'. Om boros ka dau dot id doho', “Kaino kama mongoi lisok do hiri'd Bilik dot Olidang do hilo'd Walai'd Sasambayangan dot Agayo om mongontiil to i' tu' haro moti' o tulun do mongoi pamatai diya' do totuong do baino',” ka dau.

¹¹Om boros kangku'd suminimbar, “Okon oku i' ko' tulun dit orohian do mogidu'. Ondos nu daa om mumboyo' oku do mongoi lisok do hiri'd Walai'd Sasambayangan dot Agayo do mokimapasi? A' oku i' kopio momonsoi do miagal diri,” kangku.

¹²Om soira' di minomusorou kopio oku nga' kopurimanai ku no dot okon i' ko' Kinorohingan o minomisunud di Somaya, nga' sinisipan i' daa iyau di Tobia om i Sanbalat do popoboros diri dot id doho'.

¹³Sinisipan daa diyolo' iyau do monompurolosi doho' om kowonsoi oku i' daa'ndo do dusa, om araag i' o ngaran ku om boro-boroson nondo do tulun.

¹⁴Om sambayang oku no do poingkaa, “Oi Kinorohingan, soroho' no i winonsoi di Tobia om i Sanbalat, om hukuman no iyolo'! Om soroho' no i Noaya, i nabi do tondu' diri, om koinsanai di nabi do suwai di mumbal daa do monompurolosi doho',” kangku.

¹⁵Om katalib poddi o limo nohopod om duwo o tadau do kuminaraja' om kopongo ngai' nogi' do momonsoi i tolig do tontok di tadau do koduwo nohopod om limo do tulan dot Ilul.

¹⁶Om soira' di nokorongou ngai' i pisangod dahai dit id pogialatan di piro-piro o bansa'd suwai di hiri'd posorili', om kopurimanai nogiddi diyolo' do nointingayam iyolo' tu' koinsanai di tulun om koilo i' do kinapanga-pangaan nopo di karaja'ddi nga' mantad id nuhupan do Kinorohingan.

¹⁷Om solinaid nopoddi do maso'ddi om mikirim-kirim pod surat i piro-piro o boyoon do tulun do Yohudi om i Tobia.

¹⁸Om ogumu' i' o tulun do Yohudi do mambalut di Tobia tu' monongiwan i' iyau di Sokonia i tanak di Ara. Om kawagu po nga' iri nopo tanak di Tobia di roitan dot i Yohanan nga' minanansawo di tanak do tondu' di Mosulam, i tanak di Borokia.

¹⁹Om popimboroson nopo di tongoulun dot id toguang ku o kosonongo' di Tobia, om posunudon ngai' diyolo' dau o koinsanai di doho'd boros. Om popingkirim po daa iyau'd surat do ponompurolosi doho'.