Read Kadazan Dusun MATIUS 27 Bible Online

MATIUS 27 - Kadazan Dusun bible

MATIUS 27

¹Osuab poddi, om oinsanan nopo i boyoon dot imam om i piro-piro boyoon do tulun do Yohudi do minogiupakat do mamatai di Yesus.

²Om kagasai no diyolo' iyau, om suhuo' nod minamanau, om patahako' noddi diyolo' iyau dot id di Pilatus, i gobunor do pomorintaan do Rum.

³Om kokito poddi di Yudas i pinapadagang di Yesus diri, do nohukuman i Yesus, om ponosol noddi iyau. Om ngoyo' noddi dau pogulio' i tolu nohopod o tusin do pirok diri dot id piro-piro boyoon dot imam om id boyoon do tulun do Yohudi.

⁴Boros ka dau, “Nokowonsoi oku no kopio'd dusa do pinapadagang do tulun dit aiso' o sala', om gowoi poddi om hinukuman iyau'd kapatayon!” ka dau. Nga' boros ka diyolo', “Nunu daa o kopodulan dahai'ndo? Ino nopo om diya' nod tonggungan!” ka.

⁵Om pataamo' nopoddi di Yudas i tusin diri do hiri'd suang di Walai'd Sasambayangan dot Agayo, om pamanau no do minongoi giis.

⁶Om ngoyo' no di piro-piro boyoon dot imam i tusin diri, om boros ka diyolo', “Iti nopo tusin diti om gatang do ginawo'd tulun. Om tumanud nopod Tourat toko' om a' i' koino-ino iti tusin diti do posuangon do hiri'd poiiyanan do porsombahan do hilo'd Walai'd Sasambayangan dot Agayo,” ka.

⁷Om pogipapakat noddi iyolo' do popoboli di tusin diri dot iso' o kinoiyonon do tana' di roitan do Tana' di Gompomonsoi'd Kuron. Om iri nopo tana'ddi nga' numaan do kalabangan do tulun di bansa'd suwai.

⁸Om iri no o kinopomungaranan di tana'ddi do “Tana'd Raha'” do gisom piya'd baino'.

⁹Om kabayaai noddi i pinoboros di Nabi Yoromia do poingkaa, “Om kaanu no iyolo' do tolu nohopod o tusin do pirok, tu' iri no o gatang di nookunan di bansa'd Israil do maan do pambayar dau.

¹⁰Om pakayo' noddi diyolo' i tusin diri do pomoli'd tana' di Gompomonsoi'd Kuron, do miagal di pinonuhuan do Tuhan dot id doho',” ka.

¹¹Tontok di pinotimbaba' i Yesus di Pilatus, i gobunor do pomogunan diri, om uhoto' no iyau di Pilatus. Boros ka dau, “Raja' ko nogi' do tulun do Yohudi?” ka. Om boros ka di Yesus do suminimbar, “Ino nondo ino boros nu,” ka.

¹²Nga' di nopoddi minimboros i piro-piro boyoon dot imam om i boyoon do bansa'd Yohudi do papasala' di Yesus, om a' i' i Yesus suminimbar diyolo'.

¹³Om boros kaddi di Pilatus dot id dau, “A' nu toi orongou ngai' ilo boros diyolo' do papasala' diya'?” ka dau.

¹⁴Nga' a' i' i Yesus suminimbar dot ongoiso' piya o boros. Om gisom dot osuayan tomod diri i gobunor.

¹⁵Pointikid-tikid do Tadau'd Agayo do Paska, om koubasan no di gobunor do papalabus do songulun di songinggiil do tumanud do pokionuon di tulun dot ogumu'.

¹⁶Om tontok nopoddi nga' haro o songulun do poinggiil di nabantug no o karaato'. Ngaran nopo do tulun diri om i Yesus Barabas.

¹⁷Om kongotimung ngai' poddi i tulun dot ogumu', om uhoto' no iyolo' di Pilatus. Boros ka dau, “Isai o korohian dokoyu do polobuson ku? I Yesus Barabas ko' i Yesus i roitan do Kristus?” ka.

¹⁸Om pinoboros pogi' di Pilatus o miagal diri, nga' oilaan i' dau do kinapatahakan nopo di piro-piro boyoon do Yohudi di Yesus dot id dau nga' osolon i' toomod iyolo'.

¹⁹Om tontok di poirikau i Pilatus do hiri'd tiyonon do momisara', om posunudai no iyau di sawo dau do boros do poingkaa, “Kada' nogi' kopio hompit do hal di tulun dit aiso' o sala'ddi, tu' iyau no o nokoipi-ipi ku do nipi di korolosi tomod di tadau baino',” ka.

²⁰Nga' a' nopo otingkod-tingkod i piro-piro boyoon dot imam om i boyoon do tulun do Yohudi do mamayayat di tulun dot ogumu' do mokilabus di Pilatus di Barabas om hukuman nondo do kapatayon i Yesus.

²¹Om uhoto' po iyolo' di gobunor, “Isai o pokilobusan dokoyu doho' dot id pialatan diti duwo o tulun?” ka dau. Om boros ka diyolo' do suminimbar, “I Barabas,” ka.

²²Om boros kaddi di Pilatus do minonguhot diyolo', “Iyo nopoddi, om kukuroyon ku nondo i Yesus i roitan do Kristus?” ka dau. Om boros ka diyolo', “Posolibon nopo iyau!” ka.

²³“Nga' nunu toi o kasalaan dau?” ka kawagu di Pilatus do minonguhot. Nga' okon nogi' dot opuhod tomod iyolo' do mininggiak do, “Posolibon nopo iyau!” ka.

²⁴Om alaid noddi om kopurimanai no di Pilatus dot aiso' no o milo dau'd wonsoyon, om ooris iyau do sumaap dotindo i tulun dot ogumu'. Om ongoi noddi iyau'd waig, om ougai no dau o palad dau dot id toguang di tulun dot ogumu', om boro-boros nod, “A' oku no monongkuro-kuro do kapatayon do tulun diti! Iyokoyu no o monongkoilo!” ka dau.

²⁵Om oinsanan nopoddi i tulun dot ogumu' do suminimbar do, “Ba, pologoson nopo iyahai om i tangaanak dahai do mamabo do hukuman do kapatayon dau!” ka diyolo'.

²⁶Om polobuso' noddi di Pilatus i Barabas do tumanud di pinokianu diyolo', om ponuhu' no iyau'd tulun do minomikot di Yesus; om patahako' nogiddi dau i Yesus dot id soudor do maan posolibo'.

²⁷Om posuango' noddi di soudor di Pilatus i Yesus do hiri'd walai di gobunor, om oinsanan nopo i soudor do tuminimung do hiri'd posorili' di Yesus.

²⁸Om iduwo' no diyolo' i pakayan di Yesus om pakayai no diyolo' iyau do rasuk dit anaaru dit otomou daragang-ragang.

²⁹Om pomonsoi no iyolo'd iso' o tupi' do raan-raan di kirugi o winonsoi, om posigaro' no di Yesus, do maan do ponokotupi' di don raja'. Om poigitai no diyolo' di longon dau'd wanan o tiso' o sukud, om motud nogindo iyolo' dot id toguang dau do momohingi-hingi dau. Om mimboros nondo iyolo' do, “Tabi', oi Raja' do tulun do Yohudi!” ka no.

³⁰Om pindulaan diyolo' iyau. Om ngoyon nondo diyolo' i sukud diri om pobobogon no di tulu di Yesus.

³¹Om kohingi-hingi poddi diyolo' i Yesus, om iduwo' no diyolo' i rasuk dit otomou daragang-ragang om porosukai no diyolo' kawagu i rasuk mantad di Yesus. Om posoliwano' noddi diyolo' i Yesus do ngoyon posolibo'.

³²Hiri noddid tanga'd ralan om kosolowot no diyolo' o songulun i mantad hilo'd Kirini. Ngaran nopo di tulun diri nga' i Simun. Om sansagai noddi diyolo' i tulun diri do sumaan di salib di Yesus.

³³Om korikot noddi iyolo' dot id iso' o kinoiyonon di roitan do Gulguta. Komoyon nopod ngaran diri nga' “kinoiyonon do korulung do tulu”.

³⁴Om hilo' no do pinoinum diyolo' i Yesus do waig dot anggur di rinalatan do tompodu. Nga' koumbalai poddi di Yesus iri, om minada' iddi iyau do minonginum diri.

³⁵Om posolibo' noddi diyolo' iyau, om pogiduwo-duwoo' no diyolo' i pakayan dau, do nundi' do minomiduwo.

³⁶Om irikau noddi iyolo'd hiri do minadtamong di Yesus.

³⁷Om palantako' no diyolo' do hiri'd sawa-sawat di tulu di Yesus i pinotulisan di pinotondos dot id dau do poingkaa, “I Yesus i Raja' do Tulun do Yohudi,” ka.

³⁸Om pinapasalib po iyolo' do duwo o tulun di mananakau do pinaandad di Yesus. Om iri nopo tiso' nga' id dawananan di Yesus, om iri no tiso' om id dogibangan dau.

³⁹Om songbingog-bingog pod tulu[39] i tulun di katalib do hiri do momohingi-hingi di Yesus.

⁴⁰Om boros ka no diyolo', “Iya' no i minomoros do mamaraag di Walai'd Sasambayangan dot Agayo, om owonsoi i' kaka'ndo do tolu no tadau do momonsoi! Ondung Tanak ko'd Kinorohingan, om lintuhun pogi' do mantad hino'd salib, om posion i' o tinan nu!” ka.

⁴¹Om i piro-piro boyoon dot imam om i guru do Tourat om i boyoon di tulun do Yohudi nga' momohingi-hingi nogi' di Yesus. Boros ka no diyolo',

⁴²“Mamasi i' iyau'd tulun do suwai, om a' indo milo do mamasi do dau'd tinan! Ondung raja' iyau dot Israil, om lumintuhun nopo daa iyau do mantad hilo'd salib do dinondo, om monongkuyaan nogindo iyahai dau.

⁴³Monongkuyaan i' iyau'd Kinorohingan, om momoros do Tanak iyau'd Kinorohingan. Om antangai toko' daa ondung posion kopio iyau'd Kinorohingan do baino',” ka diyolo'.

⁴⁴Om i tulun di mananakau di pinasalib do tandad di Yesus nga' momohingi-hingi i' di Yesus do miagal diri.

⁴⁵Om pitangaadau noddi, om tuong nopo o pointongkop do pomogunan diri do solinaid do tolu o jam.

⁴⁶Om pomogiak noddi i Yesus dot opuhod di jam kotolu do sosodopon. Boros ka dau, “Iloi, Iloi, lama sabaktani,” ka. Komoyon nopoddi nga', “Oi Kinorohingan ku, oi Kinorohingan ku, nokuro tu' tinongkiadan oku diya'?” ka.

⁴⁷Om haro'ddi o piro-piro o tulun do nokorongou di giniakan dau'ddi. Om boros ka diyolo', “Momolohou iyau di Ilia!” ka.

⁴⁸Om osiau nopoddi o tiso' diyolo' do minongoi panganu di koiyo-iyo'd rongilut. Om poobugo' nori do waig dot anggur dit oonsom. Om posuluho' no dau iri do hiri'd tompok dot iso' o kayu om poinsawato' nogiddi do pinopotopis do munung di Yesus.

⁴⁹Nga' boros ka di tulun do suwai, “Kada' po, antangai toko' po ondung rumikot i Ilia do mongoi pamasi dau!” ka.

⁵⁰Om pomogiak poddi kawagu i Yesus dot opuuhod, om koidu' noddi o ginawo dau.

⁵¹Om iri tirai di poinrinding do hiri'd Walai'd Sasambayangan dot Agayo nga' kopiduwo nopo do nohurak do mantad pod hiri'd sawat om gisom do nokosondot do hiri'd siriba'. Om guminuyu' o tana' om nangababak o pampang.

⁵²Om nongoukaban o lobong, om ogumu' o tulun di nangapatai no, i songonuon do Kinorohingan do napasi kawagu.

⁵³Om soliwan no iyolo' do mantad hiri'd lobong di napasi i Yesus do mantad id kapatayon. Om ongoi no iyolo' do hilo'd Yorusalim. Om ogumu'ddi o tulun do nokokito diyolo'd hilo'.

⁵⁴Om minodosi tomod diri i boyoon di soudor om koinsanai di soudor di madtamong daa di Yesus do nokito diyolo' i tana' do guminuyu', om iri ngai' i nongosiliu do miagal diri. Om boros kaddi diyolo', “Otopot no kopio do Tanak iyau'd Kinorohingan!” ka.

⁵⁵Om ogumu' nogi' o tongoondu' do hiri'd sodu' do miontong ngai'ddi. Om iyolo' no i tuminanud di Yesus do minonguhup dau do mantad poddi hilo' pod Galilia.

⁵⁶Id pogialatan nopo diyolo' om i Maria Magdalina, om i Maria i tina' di Yakub om i Yusup, om i tina' di tangaanak di Sabidi.

⁵⁷Om rikot noddi o tiso' o tulun do kaya' do mantad hilo'd Arimatia do totuong diri. Ngaran nopo di tulun diri om i Yusup. Om iyau nga' tumatanud i' di Yesus.

⁵⁸Om ongoi no iyau solowot di Pilatus, om pokionuo' no dau i rata' di Yesus. Om ponuhu' noddi i Pilatus do papatahak di rata' di Yesus dot id dau.

⁵⁹Om ngoyo' no di Yusup i rata'ddi, om lopoto' no dau do kain linan di wagu po.

⁶⁰Om ngoyo' no dau lobongo' i rata' di Yesus do hiri'd lobong di dau mantad daa, i lobong di pinoluang dot id pampang. Om liido' no dau o watu dot agayo do pinonompon di wawayaan di lobong, om pamanau nogiddi iyau.

⁶¹Nga' i Maria Magdalina nopo om i Maria i tiso' om poirikau'd hiri do potimbaba' di lobong.

⁶²Tadau noddi kawagu, di tadau'd Sabat, om ongoi ngai' nopo solowot di Pilatus i piro-piro boyoon dot imam om i tulun do Parisi.

⁶³Om boros ka diyolo', “Tuan, ahandaman diri dahai do di nopo poimpasi po i gomponipu'ddi, om nokoboros iyau dot, ‘Atalib pondo o tolu o tadau om apasi oku no kawagu,’ ka.

⁶⁴Om monuhu' nod tulun do mongoi kopio padtamong di lobong diri do gisom do korikot di tadau'd kotolu, om a' i' di tumatanud dau oongoi kapanakau i rata' dau, om mimboros nondo dot id tulun do napasi no kawagu iyau do mantad id kapatayon. Tu' araat po motindo ko' it id gulu o poninipu' diti sumusuhut,” ka diyolo'.

⁶⁵Om boros ka di Pilatus dot id diyolo', “Panganu kou nopod soudor do popodtomongon, om ngoyon nopo kopio dokoyu tamangai i lobong do gisom dot aayi-ayi' no kogirot o padtatamong,” ka dau.

⁶⁶Om ongoi noddi iyolo' do hiri'd lobong, om saapai no diyolo'd saap i watu di pinonompon di lobong om suhuo' no diyolo' i madtatamong do tumamong do hiri'd dotimbabaan di lobong, om aiso' indo o mongoi ponguro-kuro di lobong.