Read Kadazan Dusun YOHANIS 1 Bible Online

YOHANIS 1 - Kadazan Dusun bible

YOHANIS 1

¹Di nopo di timpuun i' dit a' po nowonsoi iti pomogunan, om hino mantad no i Boros. Iri nopo Boros diri om poinsugku' do Kinorohingan, om miagal nopo kopio'd Kinorohingan i Boros diri.

²Mantad poddi timpuun i' om poinsugku' mantad no iyau do Kinorohingan.

³Om iyau no o pinawayaan do Kinorohingan do minomonsoi do koinsanai'd nunu nopo, om aiso' i' o tiso' piya di songinwonsoi do winonsoi dot a' pinawaya' dau.

⁴Iri nopo Boros diri om tudan do koposion,[1] om iri no koposion diri o manahak do tanawau dot id tulun.

⁵Iri nopo tanawau'ddi om tumitiu dot id totuong, om a' i' kopisok o totuong di tanawau'ddi.

⁶Om porikoto' nod Kinorohingan i susuhuon dau, dot i Yohanis o ngaran.

⁷Kinorikatan nopo dau om minongoi poposusui do pasal di tanawau'ddi, om otumbayaan ngai' indo o tulun do korongou di habar diri.

⁸Okon i' ko' iyau i tanawau'ddi; tu' iyau nopo om ruminikot no do minongoi poposusui do pasal di tanawau'ddi.

⁹Iri nopo tanawau dit otopot, om ruminikot do hiti'd pomogunan om tuminitiu dot id koinsanai'd tulun.

¹⁰Hiti no daa'd pomogunan i Boros diri nga' mulong piya dot iyau o pinawayaan do Kinorohingan do minomonsoi'dti pomogunan, nga' a' i' iti pomogunan nokotutun dau.

¹¹Rikot no iyau do hiri'd pomogunan dau nga' a' i' iyau rinamit di bansa' dau.

¹²Nga' haro iddi o piro-piro tulun do ruminamit dau om notumbayaan dau; om onuwai noddi dau iyolo' do kosorupayan do sumiliu'd tangaanak do Kinorohingan.

¹³Om okon i' ko' miagal di kowoyo-woyoo' di koubasanan o kinosilihan diyolo' do tangaanak do Kinorohingan, do miagal di tangaanak do pogkosusuon do tulun, tu' tulun i' o tapa'; nga' tadon nopo di koposion do wagu om Kinorohingan i'.

¹⁴Om iri nopo i Boros diri om suminiliu'd tulun, om nokoiyon dot id pogialatan toko', om nokokito toko' i' di kagayaan dau. Iri nopo kagayaan dau'ddi om naanu dau do mantad id Tapa' dau, tu' iso' no iyau o tanak di Tapa'. Om id dau no o kokitanan toko' do Kinorohingan om i kosianan do Kinorohingan dot id dati'.

¹⁵Om i Yohanis no o suminiliu do sasi' dau, om i pinopopinsunud do poingkaa, “Ilo' no i komoyon ku di pinoboros ku do poingkaa: Rumikot nondo iyau do kosusuhut doho', nga' iyau nopo om agayo i' o kuasa' ko' iyoho', tu' di nopo dit a' oku po hino, om hino mantad no iyau,” ka.

¹⁶Iyau nopo om poimponu' do kosianan; om aiso' o kotingkadan dau do mamarakat dati'.

¹⁷Iri nopo Tourat om pinatahak do Kinorohingan do pinawaya' di Musa. Nga' kosianan nopo om kotorodoko' do Kinorohingan om i Yesus Kristus i' o pinopointalang.

¹⁸Aiso' i' o nokoumbal do nokokito do Kinorohingan, do suwai ko' iri no i tanak di Tapa' dit iso' noo, i miagal kopio di Tapa' om i poingulud kopio dau. Iyau no i pinopointalang di Tapa' dot id dati'.

¹⁹Om suhuo' no di piro-piro boyoon do tulun do Yohudi di hilo'd Yorusalim i piro-piro imam om i tulun do Liwi do mongoi ponguhot di Yohanis ondung isai kopio iyau.

²⁰Om poboroso' nopo kopio di Yohanis o poingkaa, “Okon oku i' ko' i Raja' do Gampamasi,” ka.

²¹Om ponguhot po kawagu iyolo', “Iyo nopondo, om isai kopio ko nanu'? I Ilia ko?” ka. “Okon,” ka di Yohanis do suminimbar. Om ponguhot po kawagu iyolo', “Iri ko tuu i Nabi?”[2] ka. “Okon,” ka di Yohanis.

²²Om boros kaddi diyolo', “Iyo nopondo, om sunudai daa iyahai ondung isai kopio ko. Om milo i' iyahai do momisunud di tulun di minonuhu' dahai. Posunudo' daa ondung isai kopio ko,” ka diyolo'.

²³Om boros ka di Yohanis do suminimbar, “Iyoho' no i komoyon di Nabi Yosaya, do poingkaa, ‘I tulun di mimboros dot opuhod do hilo'd tana' do kowotuan do poingkaa: Potingo' no o ralan do wayaan do Tuhan!’ ka,” ka dau.

²⁴Om iri nopoddi i tulun di sinuhu' di tulun do Parisi'ddi[3]

²⁵nga' minonguhot po dot, “Ondung okon ko ko' i Raja' do Gampamasi om okon ko ko' i Ilia, om okon ko ko' i Nabi om nokuro'ddi tu' mambatis ko?” ka diyolo'.

²⁶Om boros ka di Yohanis do suminimbar, “Waig no o pamatis ku iyoho'. Nga' haro i' o tulun dot id pogialatan dokoyu dit a' dokoyu otutunan.

²⁷Iyau nopo om id tohuri i' ko' iyoho' do rumikot, nga' a' oku i' mando osorupai do mongiad piya di tali do kasut dau,” ka dau.

²⁸Iri ngai' nopoddi om nosiliu do hilo'd Baitani, i ponong id koulayon do mantad id Bawang do Yordan, i kinoiyonon di Yohanis do mambatis do tulun.

²⁹Tadau noddi kawagu, om kokito no di Yohanis i Yesus do rumikot dot id dau. Om boros kaddi di Yohanis, “Ilo' no i Tanak do Dumba' do Kinorohingan di mongidu' do dusa do tulun do hiti'd pomogunan.

³⁰Om ilo' no i komoyon ku do rumikot dot id tohuri ko' iyoho', nga' agayo i' mando o kuasa' dau ko' iyoho', tu' di nopo dit a' oku po nopogkosusu om hino mantad no iyau.

³¹Iyoho' nga' a' i' daa nokotutun ondung isai iyau di gulu po. Om inda' ka do ruminikot oku nogi' do mongoi pamatis do tulun do waig o pamatis om kotutun i' dau i tulun dot Israil,” ka dau.

³²Om poboroso' po di Yohanis i nokito dau. Boros ka dau, “Nokito ku i Rusod do Kinorohingan do miagal do punai o kowoyo-woyoo' do luminintuhun do mantad hilo'd tawan, om undorong no dot id dau.

³³Tontok nopoddi om a' oku po daa koilo ondung isai iyau. Nga' nosunudan oku nod Kinorohingan, i minonuhu' doho' do mamatis do tulun do waig o pamatis do poingkaa, ‘Okito nu nopondo i Rusod do Kinorohingan do lumintuhun om mundorong dot id iso' o tulun, om iri no tulun diri i mamatis do tulun do Rusod do Kinorohingan o pamatis,’ ka dau.

³⁴Om nokito ku no o miagal diri dot iyoho' kopio o nokokito, om poboroson ku no dot iyau no kopio i Tanak do Kinorohingan,” ka dau.

³⁵Tadau noddi kawagu om hiri pod kinoiyonon diri i Yohanis do miwoyo' do duwo di tumatanud dau.

³⁶Om soira'ddi nokito di Yohanis i Yesus do tuminalib, om boro-boros no iyau dot, “Intong kou pogi'! Ilo' no i Tanak do Dumba' do Kinorohingan,” ka.

³⁷Om korongou no di duwo o tumatanud di Yohanis i boros dau'ddi, om ongoi noddi iyolo' tanud di Yesus.

³⁸Om koili no i Yesus, om kokito no dau iyolo' do manud-tanud dau. Om uhoto' no dau iyolo', “Nunu o tihumon dokoyu?” ka dau. Om boros ka diyolo'd suminimbar, “Rabi, hinonggo o tiyonon nu?” ka diyolo'. (Komoyon nopod “Rabi” om guru.)

³⁹Om boros ka di Yesus, “Kainou pogi' mongoi ontong,” ka dau. Om woyo' no iyolo' dau om kokito no diyolo' i tiyonon dau. Tontok nopoddi nga' jam kaapat no do dongsosodopon, om undorong nopoddi iyolo' do hiri'd di Yesus do tadau'ddi.

⁴⁰Iri nopo tiso' di duwo o tulun di nokorongou di pinoboros di Yohanis om i tuminanud diri di Yesus nga' i Andarias, i tobpinai di Simun Pitrus.

⁴¹Om olomus nopoddi i Andarias do minongoi pogihum di Simun, i tobpinai dau, om sunudai no dau do, “Nokosolowot no iyahai di Mosias!” ka. (Komoyon nopo do Mosias om Kristus, i Raja' do Gampamasi.)[4]

⁴²Om pootodo' no di Andarias i Simun dot id di Yesus. Om sonsodo' no di Yesus i Simun om boro-boros nod, “Iya' nopondo oi Simun, i tanak di Yona, om roitan nondo dot i Kipas,” ka. (Komoyon nopod Kipas om miagal i' do komoyon do Pitrus, tu' komoyon nopo om pampang.)

⁴³Tadau noddi kawagu om korohiai no i Yesus do mongoi do hilo'd Galilia. Om kosolowot noddi dau i Pilipus om boro-boros nod, “Kaino, tanud doho',” ka.

⁴⁴I Pilipus nopoddi nga' mantad hilo'd Baitsaida, i kinoiyonon di Andarias om i Pitrus.

⁴⁵Om kosolowot no di Pilipus i Natanil om sunudai no dau iyau, “Nosolowot no dahai i tulun di noroitan di Musa dot id suang di Tourat, om i pinoboros di piro-piro o nabi. Iri nopo tulun diri om i Yesus, i mantad hilo'd Nasarit, i tanak di Yusup,” ka dau.

⁴⁶Nga' boros ka di Natanil, “Haro kopio tuu ot osonong do mantad hilo'd Nasarit?” ka. Om boros ka di Pilipus do suminimbar, “Kaino pogi' mongoi nogi' kopio ontong,” ka dau.

⁴⁷Om kokito no di Yesus i Natanil do rumikot, om boros kaddi dau dot i Natanil o komoyon, “Ilo' no o tulun kopio dot Israil. Om a' i' mongudut iti tulun diti,” ka.

⁴⁸Om uhoto' no di Natanil i Yesus. Boros ka dau, “Poingkuro ko do nokotutun doho'?” ka. Om boros ka di Yesus do suminimbar, “Di nopo dit a' ko po noongoi kolohou di Pilipus om nokito tiya' no di hiri ko'd sahau di guas dot ara,” ka.

⁴⁹Om boros ka di Natanil, “Oi Guru, iya' no kopio i Tanak do Kinorohingan! Iya' no i Raja' do bansa'd Israil!” ka dau.

⁵⁰Om boros ka di Yesus, “Monongkuyaan ko no, om minomoros oku nogi' do nokito tiya' do hilo'd sahau di guas dot ara? Nga' kokito ko indo dit angagayo ko' mantad diri!” ka dau.

⁵¹Om boros ka kawagu di Yesus, “Ponongkuyaai no dot otopot i' kopio do kokito ko nondo dilo tawan dot oiwangan, om songindakod-dakod om songingkurus-kurus o moloikat dot id Tanak do Tulun,” ka dau.