Read Kadazan Dusun YOHANIS 13 Bible Online

YOHANIS 13 - Kadazan Dusun bible

YOHANIS 13

¹Di nopo di sangadau po dot a' orikot i Tadau'd Agayo do Paska, om oilaan no di Yesus do norikot noddi i maso dau do tumongkiad diti pomogunan, om gumuli' nondo iyau dot id Tapa' dau. Om osianan i' iyau di tulun do hiti'd pomogunan, i nosiliu do dau'd songonuon, om osianan kasai' i' iyau diyolo' do gisom do kopupuson.

²I Yesus nopo om i tumatanud dau om maso no diyolo' do makan do dongotuong. Om nokosuang no di Rogon o korohian dot araat dot id suang do ginawo di Yudas, i tanak di Simun Iskariot, do mongoi papadagang di Yesus.[30]

³Om oilaan di Yesus do nakatahak ngai' no di Tapa' o koinsanai'd kuasa' dot id dau. Om oilaan dau do mantad iyau dot id Kinorohingan om gumuli' kawagu iyau dot id Kinorohingan.

⁴Om iri noddi o kinoingkakatan dau, mikuwo'd minongidu' di rasuk dau dit id soibau, om poogkoso' no dau o tuala' dot id tawak dau.

⁵Om potungu noddi iyau do waig dot id iso' o mimpun, om timpuun no do mongoug do lapap di tumatanud dau. Om i tuala do poingagkos dau o pomihid dau.

⁶Om korikatai noddi dau i Simun Pitrus do mongoug, om boro-boros no i Simun Pitrus, “Tuhan, nokuro tu' iya' nogi' o mongoug do gakod ku?” ka.

⁷Om boros ka di Yesus do suminimbar, “A' ko po kosuhut diti wonsoyon ku do dinondo poo, nga' kosuhut ko indo do koimbagu,” ka.

⁸Nga' boros ka di Pitrus, “Atuuk, Tuhan, kada' nogi' kopio pongoug do lapap ku!” ka. Nga' boros ka di Yesus do suminimbar, “Ondung a' ku iya' ougan, om okon ko no ko' tumatanud ku,” ka.

⁹Om boros ka di Simun Pitrus, “Iyo nopoddi, oi Tuhan, om okon nopo ko' lapap o pokiowugan ku nga' longon po om tulu ku!” ka dau.

¹⁰Om boros ka di Yesus dot id di Pitrus, “Tulun nopo di nokopodsu' om opulang ngai' no o tinan. Om a' no minog do pulangan kawagu; suwai ko' iri po lapap dau[31] ot ougan. Ongopulang kou nodti, nga' a' po mando oinsanan,” ka dau.

¹¹(Oilaan no di Yesus i tulun di papadagang dau. Om iri no o kinapabarasan dau dot, “Ongopulang kou nodti, nga' a' po mando oinsanan,” ka.)

¹²Om koougai poddi di Yesus o lapap diyolo', om pakayo' no kawagu dau i rasuk dau dit id soibau om irikau no iyau kawagu. Om boros kaddi dau dot id diyolo', “Kosuhut kou i' di winonsoi ku dot id dokoyu di tiinu'ddi?

¹³Roitan oku dokoyu'd Guru om Tuhan. Om iyo nogi' kopio'ddi.

¹⁴Om ondung mongoug oku do lapap dokoyu, iyoho' i Tuhan om Guru dokoyu, om iyokoyu nga' apatut nogi' do mogioug-oug do lapap.

¹⁵Om winonsoi ku o miagal diri do maan dokoyu'd omitanan, om momonsoi kou indo iyokoyu do miagal di winonsoi ku dot id dokoyu.

¹⁶Otopot i' kopio iti poboroson ku dot id dokoyu do poingkaa: turipon nopo om a' i' agayo ko' i tuan dau, om i sinuhu' nga' a' i' agayo ko' i minonuhu'.

¹⁷Ondung nongoilaan ngai' dokoyu iti, om olumaag kou no ondung wonsoyon dokoyu o miagal diti.

¹⁸Iti nopo poboroson ku'dti om okon i' ko' koinsanai dokoyu o komoyon ku. Oilaan ku i' ondung isai ngai' i nongopili' ku. Nga' haro i' o nokotulis dot id suang do Buuk do Kinorohingan, di mositi' dot abayaan do poingkaa, ‘Iri nopo tulun di potorungak doho'd makan, om sumaap indo doho',’ ka.

¹⁹Om poboroson mantad ku iti dot id dokoyu dot a' po osiliu iti, tu' osiliu nopondo o miagal diri, om monongkuyaan kou nondo dot iyoho' i roitan dot IYOHO' I HINO KASAI'.

²⁰Otopot no kopio iti poboroson ku do poingkaa: Isai nopo o tulun di rumamit do tulun di suhuon ku om rumamit no doho'. Om isai nopo i rumamit doho' om rumamit no di minonuhu' doho',” ka di Yesus.

²¹Om koboros poddi di Yesus o miagal diri, om tumongob tomod diri iyau. Om boros kaddi dau, “Otopot no kopio iti poboroson ku dokoyu do haro nondo o songulun dot id pogialatan dokoyu do papadagang doho',” ka dau.

²²Om pogioontong nopo i tumatanud dau do mikuwo'd osuayan tu' a' i' iyolo' koilo ondung isai o komoyon dau.

²³Iri nopo tumatanud di Yesus di kosianan kopio dau om poirikau do hiri'd toning di Yesus.

²⁴Om bourai no iyau di Simun Pitrus do monuhu' dau do monguhot di Yesus ondung isai kopio o komoyon dau.

²⁵Om topis noddi di Yesus i tumatanud diri, om ponguhot nod, “Isai i komoyon nu'ddi, oi Tuhan?” ka.

²⁶Om boros ka di Yesus do suminimbar, “I tulun dit onuan ku'd roti di potobungon ku do hilo'd mangkuk,” ka dau. Om anu no i Yesus dot iso' o roti om potobungo' no dau do hiri'd mangkuk; om patahako' noddi dau di Yudas, i tanak di Simun Iskariot.

²⁷Om karamit poddi di Yudas i roti, om suang no o Rogon dot id ginawo dau. Om boros kaddi di Yesus dot id dau, “Lomusai nogi' kopio do momonsoi i korohian nu'd momonsoi,” ka dau.

²⁸Om aiso' i' o tiso' diyolo' di makan do hiri do kosuhut ondung nokuro tu' minomoros i Yesus dot iyo'ddi dot id di Yudas.

²⁹Om haro i' o kosorou do minonuhu' i Yesus di Yudas do mongoi pomoli di maan diyolo' dot id poginakanan diri, ko' minonuhu' po do mongoi panahak di tulun do mosikin do tusin dot ongokuuri' --- tu' i Yudas i' o mongingigit di tusin diyolo'.

³⁰Om karamit poddi di Yudas i roti'ddi, om pitilombus nopo iyau do suminoliwan. Om otuong no do tontok diri.

³¹Om kapamanau poddi i Yudas, om boro-boros no i Yesus do poingkaa, “Poinggoyoon noddi do baino' i Tanak do Tulun, om Kinorohingan nga' koinggayo nondo dot iyau o kopoinggayo.

³²Ondung koinggayo o Kinorohingan dot iyau o popoinggayo, om iyau nga' poinggoyoon indo do Kinorohingan, do Kinorohingan o popoinggayo, om oruhai no do poinggoyoon iyau'd Kinorohingan.

³³Oi tangaanak ku, a' oku no alaid do poinsugku' dokoyu. Om ihumon oku no daa'ndo dokoyu, nga' poingkuro nopo i nokoboros ku dot id piro-piro boyoon do tulun do Yohudi, om iyo iddi o poboroson ku dokoyu tu' a' kou indo koongoi do hiri'd kinoiyonon di ngoyon ku.

³⁴Iti no o ponuhuan do wagu do poboroson ku dot id dokoyu: Pogiinsian-sian kou no. Om poingkuro oku nopo do nosianan dokoyu, om apatut dot iyokoyu nga' iyo nogiddi do mogiinsian-sian.

³⁵Ondung mogiinsian-sian kou, om oinsanan nopondo o tulun do koilo do tumatanud kou doho',” ka di Yesus.

³⁶Om boros ka di Simun Pitrus do minonguhot di Yesus, “Honggo o ngoyon nu, oi Tuhan?” ka. Om boros ka di Yesus do suminimbar, “Hilo' nopod ngoyon ku om a' ko po milo'd moyo' do dinondo poo. Nga' kosusuhut ko nopo doho' om koimbagu,” ka.

³⁷Om boros ka kawagu di Pitrus do minonguhot, “Tuhan, nokuro tu' a' oku milo'd moyo' diya' do dinondo poo? Uhang ku i' do patayon oku dot iya' o kapamatayan!” ka dau.

³⁸Om boros ka di Yesus do suminimbar, “Otopot i' toi kopio dot uhang nu'd patayon ko dot iyoho' o kapamatayan? Ilaai no, dot a' po koponingkukuhuk o manuk do tiinu', om intolu nu no poboroso' dot a' ko kotutun doho'!” ka.