Read Kadazan Dusun YOHANIS 14 Bible Online

YOHANIS 14 - Kadazan Dusun bible

YOHANIS 14

¹Om boros ka di Yesus dot id diyolo', “Kada' kou katangkabo. Kotumbayaai[32] kou nod Kinorohingan om kotumbayaai kou doho'.

²Hilo' nopod walai di Tapa' ku om ogumu' i' o tiyonon. Om mongoi oku'd hilo' do mongoi posodia' do tiyonon dokoyu. Om a' ku i' daa poboroson iti dot id dokoyu ondung a' daa iti otopot kopio.[33]

³Om koongoi oku pondo koposodia' do tiyonon dokoyu, om gumuli' oku nogindo do mongoi pangangat dokoyu, om hinonggo oku nopondod poingiyon, om hiri kou no iyokoyu.

⁴Om koilo kou i' do ralan do kumaa'd hiri'd kinoiyonon di ngoyon ku,” ka dau.

⁵Om boros kaddi di Tumas dot id di Yesus, “Tuhan, a' i' iyahai koilo ondung honggo o ngoyon nu, om poingkuro nondo iyahai'd koilo do ralan do kumaa'd hilo'?” ka dau.

⁶Om boros ka di Yesus do suminimbar, “Iyoho' no i ralan, i katapatan, om i koposion! Om iso' pod tulun nga' aiso' i' o korikot dot id di Tapa', ondung a' sumusui doho'.

⁷Ondung kotutun kou doho',[34] om atantu' no do kotutun kou no di Tapa' ku. Om nokotutun kou noddi dau, om nokokito kou dau,” ka di Yesus.

⁸Om boros kad Pilipus dot id di Yesus, “Tuhan, pokitono' daa iyahai di Tapa', om a' indo iyahai muhot-uhot,” ka dau.

⁹Nga' boros ka di Yesus do suminimbar, “Alaid oku no do mugku-sugku' dokoyu, om a' ko po kotutun doho' oi Pilipus? Iri nopo tulun di nokokito doho', om nokokito no di Tapa'. Om nokuro tu' momoros ko po dot, ‘Pokitono' daa iyahai di Tapa’ ka?

¹⁰Oi Pilipus! A' ko i' otumbayaan dot iyoho' nopo om i Tapa' om iso-iso' i'? Iti nopo poboroson ku diya'dti om okon i' ko' pimpori-porian ku. Iri i Tapa', i poingiso' doho' o momonsoi ngai'dti.

¹¹Kotumbayaai no doho', dot iyoho' nopo om i Tapa' om iso-iso' i'. Nga' ondung a' ko otumbayaan diri, om kotumbayaai poo dot i nongowonsoi ku o koponongkuyaan.

¹²Otopot no kopio iti poboroson ku do tulun nopo di monongkuyaan doho', om milo no do momonsoi do miagal di winonsoi ku --- om agayo ko' iri nga' milo i' dau do wonsoyon --- tu' mongoi oku no do hilo'd Tapa'.

¹³Om nunu nopo o pokionuon dokoyu dot id suang do ngaran ku, om wonsoyon ku nori dot id dokoyu, om koinggayo i' i Tapa' dot i Tanak o popoinggayo.

¹⁴Nunu nopo i pokionuon dokoyu[35] dot id suang do ngaran ku, om wonsoyon ku no iri,” ka di Yesus.

¹⁵Om boros ka kawagu di Yesus, “Ondung osianan kou doho', om wonsoyon i' dokoyu i ponuhuan ku.

¹⁶Pokionuon ku nondo di Tapa' om onuan kou nondo dau do Gomponguhup do suwai, i poinsugku' kasai' dokoyu do gisom dot alaid.

¹⁷Iri nopo gomponguhup diri nga' i Rusod do Kinorohingan, i popointalang dit otopot do pasal do Kinorohingan. Iti nopo tulun do hiti'd pomogunan dit a' otumbayaan om a' i' milo do rumamit dau, tu' a' i' iyolo' kokito om a' iyolo' kotutun dau. Nga' iyokoyu nopo om kotutun i' dau, tu' poinsugku' i' iyau dokoyu om poingiso' nondo iyau[36] dokoyu.

¹⁸A' ku i' iyokoyu tongkiadan tomod dot iyokoyu-koyu do miagal di tangaanak dot aiso' o molohing; tu' gumuli' oku indo kawagu dot id dokoyu.

¹⁹Oruhai no dot a' kokito doho' iti tulun do hiti'd pomogunan. Nga' kokito kou indo iyokoyu doho'! Om apasi kou indo, tu' poimpasi oku i'.

²⁰Osiliu nopondo o miagal diri, om oilaan nogindo dokoyu dot iyoho' om i Tapa' nga' iso-iso' i', om iyokoyu nga' poingiso' i' doho', om iyoho' nga' poingiso' dokoyu.

²¹Tulun nopo di rumamit di ponuhuan om i momonsoi'ddi, om osianan no doho' o tulun diri. Om i Tapa' ku nga' osianan i' di tulun dit osianan doho'. Om iyoho' nga' osianan i' do tulun diri om mintalang oku dot id dau,” ka di Yesus.

²²Om ponguhot no i Yudas (okon i' ko' i Yudas Iskariot) di Yesus, “Tuhan, nokuro tu' mintalang ko dot id dahai om a' ko indo mintalang dot id tulun do suwai di hiti'd pomogunan?” ka dau.

²³Om boros ka di Yesus do suminimbar, “Tulun nopo dit osianan doho', om mumboyo' i' do ponudukan ku. Om osianan i' i Tapa' ku do tulun diri. Om rumikot nondo iyahai di Tapa' ku dot id dau om mundorong iyahai dot id dau.

²⁴Tulun nopo dit a' osianan doho' om a' no tumanud di ponudukan ku. Om iri nopo ponudukan di norongou dokoyu'ddi om okon i' ko' mantad id doho', suwai ko' mantad i' dot id di Tapa', i minonuhu' doho'.

²⁵Om poboroson ngai' ku nopo iti do solinaid po do poinsugku' oku dokoyu.

²⁶Nga' iri indo i Rusod do Kinorohingan, i Gomponguhup di suhuon di Tapa' dot id suang do ngaran ku o monuduk dokoyu do koinsanai'ddi, om poposorou dokoyu do koinsanai di pinosunud ku dokoyu.

²⁷Poopungan ku iyokoyu do kosimbayanan do ginawo. Om i kosimbayanan do mantad id doho' o patahakon ku dokoyu. Iri nopo patahakon ku'ddi om a' i' miagal di patahakon diti pomogunan dot id dokoyu. Kada' kou katangkabo om kada' kou kooris.

²⁸Nokorongou kou no doho' do minomoros do poingkaa, ‘Mamanau oku nondo nga' gumuli' oku i' kawagu dot id dokoyu,’ kangku. Ondung osianan kou doho', om otood kou i' do mongoi oku do hilo'd di Tapa', tu' i Tapa' nopo om agayo i' ko' iyoho'.

²⁹Om posunudon mantad ku iti dot id dokoyu do dinondo, dot a' po angabayaan ngai' iti; angabayaan ngai' nopondo iti om otumbayaan kou nondo.

³⁰A' ku no ponoruon o poboroson ku dokoyu, tu' norikot no o maso do korikatan di boyoon diti pomogunan. Nga' aiso' i' o kuasa' dau dot id sawat ku.

³¹Nga' a' no kopio milo dot a' ongosiliu ngai' o miagal diri om koilo indo o tulun do hiti'd pomogunan dot osianan oku di Tapa' om momonsoi oku do koinsanai'ddi ponuhuan di Tapa' doho'. Kainou tumongkiad do mantad hiti,” ka di Yesus.