Read Kadazan Dusun YOHANIS 15 Bible Online

YOHANIS 15 - Kadazan Dusun bible

YOHANIS 15

¹Om boros ka kawagu di Yesus, “Iyoho' no o miagal do guas dot anggur dit otopot kopio, om i Tapa' ku o gompomogompi' di guas dot anggur.

²Pointikid-tikid do raan dit a' mongua', om tutuon no dau, om pointikid-tikid do raan di mongua' om piralapan dau o roun, om pillanggaan dau i raan om sumapou indo o tua'.

³Ongolidang kou no tu' i ponudukan do pinotuduk ku dokoyu o nokolidang.

⁴Miso' kasai' kou no doho' om poingiso' kasai' oku indo iyoho' dokoyu. Iri nopo raan om a' i' milo do mongua' dot ondung a' poindokot kasai' di guas. Om iyokoyu nga' milo nopod mongua' om poingiso' kasai' kou doho'.

⁵Iyoho' no i guas dot anggur om iyokoyu i raan di guas dot anggur. Iri nopo tulun di poingiso' kasai' doho' om poingiso' oku iyoho' dau om mongua' no dot asapou; tu' ondung potongkiad kou doho', om aiso' i' o milo dokoyu'd wonsoyon.

⁶Iri nopondo tulun dit a' poingiso' doho' om pataamon no do miagal di raan, om rumiou nondo. Om iri nopo raan do miagal diri om timungon nondo om pataamon do hiri'd tapui do tutudan.

⁷Ondung poingiso' kasai' kou doho' om poingopi' dot id suang do ginawo dokoyu i ponudukan ku, om pokianu kou no di Tapa' do nunu nopo i korohian dokoyu; om patahakon indo dau i pokionuon dokoyu'ddi.

⁸Ondung ogumu' o tua' dokoyu, om koinggayo no i Tapa' ku; om osiliu kou nondo kopio do tumatanud ku.

⁹Om poingkuro nopo i Tapa' dot osianan doho', om iyo oku no iyoho'ddi dot osianan dokoyu. Om mositi' no do miagal di kowoyo-woyoo' do tulun di kosianan ku o kowoyo-woyoo' dokoyu.

¹⁰Ondung mumboyo' kou di ponuhuan ku, om ogirot kasai' kou no dot id kosianan ku, do miagal doho' tu' ogirot kasai' dot id kosianan di Tapa' tu' mumboyo' oku i' di pinonuhuan dau.

¹¹Posunudon ngai' ku nopo iti dot id dokoyu, om haro i' o kataadan di mantad id doho' dot id suang do ginawo dokoyu, om otood kou indo kopio om aiso' o koiyo di kataadan dokoyu'ddi.

¹²Iti no o ponuhuan ku: pogiinsian-sian kou no do miagal doho' tu' nosianan dokoyu.

¹³Tulun nopo dit osianan kopio do tambalut dau om uhang no dot iyau ot apatai ko' apatai po i tambalut dau.

¹⁴Iyokoyu no o tambalut ku ondung momonsoi kou no di ponuhuan ku dokoyu.

¹⁵A' ku no iyokoyu roitan do susuhuon, tu' susuhuon nopo om a' i' koilo ondung nunu i wonsoyon di tuan dau. Roitan ku no iyokoyu do tambalut tu' nokosunud ngai' ku no dokoyu i nongorongou ku do mantad id di Tapa'.

¹⁶Okon i' ko' iyokoyu o minomili' doho', suwai ko' iyoho' o minomili' dokoyu, om iyoho' o monuhu' dokoyu do mongua'd asapou --- i tua' dit a' rumaag. Om onuan kou indo di Tapa' do nunu nopo i pokionuon dokoyu dau dot id suang do ngaran ku.

¹⁷Iti no o ponuhuan ku dokoyu: Pogiinsian-sian kou no,” ka di Yesus.

¹⁸Om boros ka kawagu di Yesus, “Soira' nopo do karaatan kou'd tulun do hiti'd pomogunan, om soroho' no dokoyu dot iyoho' i' o nokopogulu do kinaraatan diyolo'.

¹⁹Ondung posokodung kou diti tulun do hiti'd pomogunan, om kosianan kou i' daa diyolo' do miagal di tulun di kosokodung diyolo'. Nga' nopili' ku no iyokoyu om a' kou i' posokodung di tulun do hiti'd pomogunan, om a' kou noddi kosokodung diyolo'. Om iri no o kokuwaan dot araatan dokoyu iti tulun do hiti'd pomogunan.

²⁰Soroho' no dokoyu i nokoboros ku dokoyu dot, ‘Iri nopo susuhuon om a' i' agayo ko' i tuan dau,’ kangku. Ondung minonginggorit iyolo' doho', om iyokoyu nga' inggoriton i' diyolo'. Ondung tuminanud iyolo' di ponudukan ku om tumanud no iyolo' do ponudukan dokoyu.

²¹Om wonsoyon indo diyolo' o koinsanai'ddi dot id dokoyu tu' tumatanud kou i' doho', tu' a' iyolo' kotutun di minonuhu' doho'.

²²Ondung a' oku daa ruminikot om a' oku pinopoboros ngai'ddi dot id diyolo', om a' i' daa iyolo' nokowonsoi'd dusa. Nga' baino' nopoddi om a' no iyolo' milo do momoros do poingkaa, ‘A' i' iyahai koilo do dusa i winonsoi dahai,’ ka.

²³Iri nopo tulun dit araatan doho' om araatan no di Tapa' ku.

²⁴Ondung a' ku daa winonsoi dot id pogialatan diyolo' it a' insan kowonsoi do tulun do suwai, om a' i' daa iyolo' nokowonsoi'd dusa. Nga' nokokito no iyolo' di winonsoi ku, om araatan iddi iyolo' doho' om araatan di Tapa' ku.

²⁵Nga' a' no milo dot a' osiliu o miagal diri, om abayaan i' i nokotulis do hiri'd Tourat diyolo' do poingkaa, ‘Araatan iyolo' doho' dot aiso' o paantakan,’ ka.

²⁶Nga' suhuon ku indo do rumikot dot id dokoyu i Gomponguhup, i mantad id di Tapa'. Om iyau no i Rusod di popointalang dit otopot do pasal do Kinorohingan. Om korikot nopondo iyau, om popoilo indo iyau do pasal doho'.

²⁷Om iyokoyu nga' mositi' no do popinsusui do pasal doho', tu' nokopitanud-tanud kou i' doho' do mantad di timpuun i'.