Read Kadazan Dusun YOHANIS 17 Bible Online

YOHANIS 17 - Kadazan Dusun bible

YOHANIS 17

¹Om koboros poddi di Yesus o miagal diri, om tingaha' no iyau do hilo'd tawan, om boro-boros nod, “Apa', norikot noddi i maso. Om poinggoyoo' no i Tanak nu, om poinggoyoon i' di Tanak i Tapa'.

²Om nakatahak nu no o kuasa' dot id sawat do koinsanai'd tulun dot id Tanak diri, oi Apa', om kapanahak i' iyau'd koposion dit otopot kopio om i poingompus dot id koinsanai'd tulun di patahakon do Tapa' dot id dau.

³Om iti no o komoyon di koposion dit otopot kopio om i poingompus tu' kotutun o tulun di Tapa', i Kinorohingan dit iso' noo dit otopot, om kotutun di Yesus Kristus, i sinuhu' di Tapa'.

⁴Nokoinggayo ku no i Tapa' do hiti'd pomogunan tu' nowonsoi ngai' ku i' i karaja' di pinonuhuan di Tapa' doho'.

⁵Apa'! Poinggoyoo' oku no dot id toguang nu do dinondo, do miagal di pinopoinggayo ko doho' dit a' po nowonsoi iti pomogunan.

⁶Nokointutun ku no o Tapa' dot id tulun do hiti'd pomogunan, id tulun di pinatahak nu dot id doho'. Iya' i' oi Apa', o sanganu diyolo', om nakatahak nu noddi iyolo' dot id doho'. Om natanud no diyolo' i boros nu, oi Apa'.

⁷Om dinondo nopoddi om koilo no iyolo' do koinsanai'ddi patahakon do Tapa' dot id doho' om mantad no dot id Tapa'.

⁸Nokolombus ku no dot id diyolo' i boros di pinosunud nu doho'; om notumbayaan no iyolo'ddi. Om oilaan no kopio diyolo' do mantad oku dot id diya', oi Apa', om monongkuyaan iyolo' dot iya' o minonuhu' doho'.

⁹Om sambayangan ku no iyolo'. Nga' a' ku i' sambayangan ngai' i tulun do hiti'd pomogunan, suwai ko' iri no i tulun di nakatahak nu dot id doho' o sambayangan ku, oi Apa', tu' iyolo' no o nasanganu nu.

¹⁰Koinsanai di doho'd nasanganu om nasanganu nu no iya', oi Apa'; om koinsanai di diya'd nasanganu nga' asanganu ku no iyoho'. Om koinggayo oku dot id pogialatan diyolo'.

¹¹Om mongoi oku noddi dot id diya', oi Apa'. A' oku noddi poundorong do hiti'd pomogunan; nga' iyolo' nopo om hiti pod pomogunan. Oi Apa', dit olidang! Gompio' no iyolo' di kuasa' do ngaran nu, i ngaran di pinatahak nu dot id doho' --- [38] om osiliu i' iyolo' dot iso-iso', do miagal dato tu' iso- iso', oi Apa'.

¹²Tontok di poinsugku' oku po diyolo', om ginompi' ku i' iyolo' dot i kuasa' di ngaran nu o pinomogompi' ku, i ngaran di pinatahak nu doho'.[39] Ginompi' ku i' iyolo' om iso' po diyolo' nga' aiso' i' o natagak do suwai indo ko' i tulun di tumagak no mantad; om abayaan i' i nokotulis dot id suang do Buuk do Kinorohingan.

¹³Dinondo nopodti om mongoi oku no dot id diya', oi Apa'. Om poboroson ngai' ku nopo diyolo' iti do daamot ku po do hiti'd pomogunan, om opurimanan i' kopio diyolo' o kataadan ku.

¹⁴Om nokolombus ku no dot id diyolo' i boros nu, oi Apa'. Om araatan diri diyolo' iti tulun do hiti'd pomogunan tu' a' i' iyolo' kosokodung diti tulun do hiti'd pomogunan, do miagal doho' tu' a' kosokodung diti tulun do hiti'd pomogunan.

¹⁵A' ku i' iyolo' pokiangayan diya' do mantad hiti'd pomogunan, nga' pokigompian ku no diya' iyolo' do mantad id di Yaraat.

¹⁶Om poingkuro nopo dot a' oku iyoho' kosokodung diti tulun do hiti'd pomogunan, om iyolo' nga' a' nogi' kosokodung diti tulun do hiti'd pomogunan.

¹⁷Siliho' no iyolo'd diya' kopio'd songonuon, oi Apa', dot it otopot o poposiliu, iri no i boros nu ot otopot.

¹⁸Om poingkuro ko nopo iya' do minonuhu' doho' do rumikot do hiti'd pomogunan, oi Apa', om iyo oku nogiddi iyoho' do monuhu' diyolo' do hiti'd pomogunan.

¹⁹Iyolo' no o kinapatahakan ku'd tinan ku do sumiliu'd diya' kopio'd songonuon, oi Apa', om osiliu indo iyolo' do diya' kopio'd songonuon, dot it otopot o poposiliu.

²⁰Om okon i' ko' iyolo' noo o sambayangan ku, suwai ko' sambayangan ku po i tulun dit otumbayaan doho' do koimbagu, do korongou iyolo' di posusuyon diyolo'.

²¹Om pokionuon ku no oi Apa', dot osiliu iyolo' dot iso-iso' do miagal dato oi Apa', tu' iso-iso'. Om koiso' indo iyolo' dato om monongkuyaan iti tulun do hiti'd pomogunan dot iya' o minonuhu' doho'.

²²Noonuan ku no iyolo' do kagayaan, dot i kagayaan di nakatahak nu doho' o pinatahak ku, om osiliu i' iyolo' dot iso-iso' do miagal dato tu' iso-iso';

²³do poingiso' oku diyolo', om poingiso' ko doho' om kopogiiso' indo kopio iyolo'. Om koilo indo iti tulun do hiti'd pomogunan dot iya' o minonuhu' doho', om koilo dot osianan ko diyolo' do miagal dot osianan ko doho', oi Apa'.

²⁴Oi Apa', orohian oku no kopio do poinsugku' iyolo' doho' do hiti'd kinoiyonon ku, iyolo' i pinatahak nu dot id doho', om kokito indo iyolo' di kagayaan ku; iri no i kagayaan di pinatahak nu doho', tu' nosianan ko i' doho' dit a' po nowonsoi iti pomogunan, oi Apa'.

²⁵Oi Apa', it otulid! Iti nopo tulun do hiti'd pomogunan om a' i' kotutun diya', nga' iyoho' nopo om kotutun i' diya'; om kongoilo i tulun ku dot iya' o minonuhu' doho', oi Apa'.

²⁶Om pinoilo ku iyolo' ondung isai kopio ko; om poiloon kasai' ku po iyolo' do pasal diya', om koiyon i' dot id suang do ginawo diyolo' i kosianan nu dot id doho', om koiso' oku i' diyolo',” ka di Yesus do suminambayang.