Read Kadazan Dusun YOHANIS 2 Bible Online

YOHANIS 2 - Kadazan Dusun bible

YOHANIS 2

¹Duwo noddi o tadau do mantad diri om haro o poginakanan do pikowinan do hilo'd bandar do Kana, i hilo'd Galilia, om i tina' di Yesus nga' minongoi nogid hiri.

²Om i Yesus om i tumatanud dau nga' naalap i' do mongoi rapou di poginakanan diri.

³Soira' di naayi' i waig dot anggur, om boro-boros no i tina' di Yesus dot id dau. Boros ka dau, “Nooyian no iyolo'd waig dot anggur,” ka dau.

⁴Om boros ka di Yesus do suminimbar, “Inan, kada' oku suhuo'. Tu' a' po orikot o maso ku do popointalang ondung isai kopio oku,” ka dau.

⁵Nga' boros ka di tina' di Yesus dot id piro-piro di susuhuon, “Wonsoyon nopo dokoyu i poboroson dau dot id dokoyu,” ka.

⁶Om haro ot onom o luping do hiri do poiiyanan do waig di pongongoug do tumanud di koubasanan do tulun do Yohudi. Orumpos nopo do pointikid-tikid di luping diri om haro i' doti' o hatus o lito.

⁷Om boros ka di Yesus dot id piro-piro susuhuon diri, “Suangai ngai' dokoyu'd waig ilo luping,” ka. Om suangai ngai' no diyolo' i luping diri gisom do nongoponu'.

⁸Om boros kaddi di Yesus dot id diyolo', “Ongoi kou anu dot ongokooro' dilo waig om patahakon i' di mongilo-ilo diti poginakanan,” ka dau. Om ngoyo' no diyolo' patahako' di mongilo-ilo di poginakanan i waig diri.

⁹Om tiimai no dau i waig di nosiliu no do waig dot anggur. (Nga' a' i' iyau koilo ondung honggo o tadon di waig dot anggur diri. Iri no i susuhuon di pinoposuang di waig do hiri'd luping o koilo.) Om lohowo' noddi di mongilo-ilo di poginakanan i kusai di kuminawin,

¹⁰om boro-boros no, “Koubasanan nopo om poguluonon pod moninggarung i waig dot anggur dit osonong kopio, om angabangat pondo do minum i tulun di nalap, om singgorungon nogindo i waig dot anggur di koubasanan. Nga' nokoolu' nu i' iya' i waig dot anggur dit osonong kopio do gisom piya'd dinondo!” ka dau.

¹¹Om iri no o koimayaan di gulu i' kopio di Yesus wonsoyo'. Om winonsoi dau iri do hilo'd Kana, i hilo'd Galilia. Om iri no i koimayaan di winonsoi dau'ddi o pinopointalang do kogoyoo' dau. Om kotumbayaai noddi dau i tumatanud dau.

¹²Om ongoi noddi i Yesus do hilo'd Kapornaum do miwoyo' di tina' dau, om i piro-piro tobpinai dau om i tumatanud dau. Om hilo' no iyolo' do poundorong do solinaid do piro-piro o tadau.

¹³Tontok dit oruhai nod orikot i Tadau'd Agayo do Paska do tulun do Yohudi, om ongoi no i Yesus do hilo'd Yorusalim.

¹⁴Om di nopoddi hiri iyau id Walai'd Sasambayangan dot Agayo di hilo'd Yorusalim, om kokito no dau i dumadagang do sapi' om dumba', om punai, om i tulun do monukar do tusin do songirikau'd hiri.

¹⁵Om pomonsoi no iyau do pipikot do tali o winonsoi om pinguyungo' ngai' noddi dau i tayam-tayam diri: i dumba' om i sapi', do mantad hiri'd Walai'd Sasambayangan dot Agayo. Om pinsomboliko' dau i mija' di tulun di monukar do tusin, om songinsasad poddi i tusin diyolo'.

¹⁶Om boros kaddi di Yesus dot id tulun di padagang do punai, “Igitai ngai' dokoyu iti do sumoliwan do mantad hiti. Kada' dokoyu siliho' do tiiyonon do dumadagang iti walai'd Tapa' ku!” ka dau.

¹⁷Om kosorou noddi di tumatanud dau it ayat dot id suang do Buuk do Kinorohingan do poingkaa, “Iyo pod tapui di molob-ngolob do hiti'd ginawo ku o kosianan ku di Walai nu, oi Kinorohingan,” ka.

¹⁸Om boros kaddi di piro-piro boyoon do tulun do Yohudi do sumongkiwal di Yesus, “Pomonsoi daa do koimayaan do popointalang dot id dahai do haro o kuasa' nu do momonsoi'd miagal diti,” ka.

¹⁹Om boros ka di Yesus do suminimbar, “Raago' pogi' dokoyu iti Walai'dti, om tolu nopo moti' o tadau nga' owonsoi ku no kawagu,” ka dau.

²⁰Om boros kaddi diyolo', “Apat i' nohopod om onom o toun do koloido' do minomonsoi diti Walai'd Sasambayangan dot Agayo, om tolu no daa'ndo tadau nu iya' do momonsoi'dti?” ka.

²¹Nga' iri nopo Walai'd Sasambayangan dot Agayo do komoyon di Yesus om iri i tinan dau.

²²Om id tohuri noddi di napasi kawagu i Yesus do mantad id kapatayon, om kahandamai nogi' di tumatanud dau do nokoboros i Yesus do miagal diri. Om ponongkuyaai noddi iyolo' di nokotulis dot id suang do Buuk do Kinorohingan om i pinoboros di Yesus do miagal diri.

²³Nopo di hilo' i Yesus id Yorusalim di maso do Tadau'd Agayo do Paska om ogumu' o tulun do notumbayaan dau do nokokito di piro-piro o koimayaan do winonsoi dau.

²⁴Nga' a' i' i Yesus monongkuyaan diyolo', tu' koilo i' iyau do kowoyo-woyoo' do koinsanai'd tulun.

²⁵A' i' minog do haro o tulun do momisunud dau do pasal dot isai nopo, tu' koilo i' iyau dit id suang do ginawo'd tulun.