Read Kadazan Dusun YOHANIS 20 Bible Online

YOHANIS 20 - Kadazan Dusun bible

YOHANIS 20

¹Tontok dit otuong-tuong po di kosuabon do tadau'd Minggu', om ongoi no i Maria Magdalina do hiri'd lobong. Om kokito no dau do nokoimpit no i watu di pinonompon daa di luang di lobong.

²Om panangkus noddi iyau do minongoi pogihum di Simun Pitrus om i tumatanud di kosianan kopio di Yesus, om boro-boros nod, “Noongoi no diyolo' i Tuhan do mantad hiri'd lobong om a' oku no koilo ondung hinonggo diyolo' iyau,” ka dau.

³Om ongoi no i Pitrus om i tumatanud di tiso' do hiri'd lobong.

⁴Om panangkus goduwo nopo iyolo', nga' osiau i' ko' i Pitrus i tumatanud di tiso', om nokopogulu iddi iyau do nokorikot do hiri'd lobong.

⁵Om liing no iyau do hiri'd lobong om kokito no dau i kain di pinomorilit di rata' do poingiliu'd hiri, nga' a' iddi iyau suminuang.

⁶Om kosusuhut nogiddi i Simun Pitrus, om pitilombus nopo iya'd suminuang do hiri'd lobong. Om kokito no dau i kain di pinomorilit do poingiliu'd hiri.

⁷Nga' iri nopo kain di pinokogos dot id tulu di Yesus om okon i' ko' hiri'd toning di pinomorilit, suwai ko' posuwai-suwai do poillopi.

⁸Om suang noddi i tumatanud di nokopogulu do nokorikot do hiri'd lobong. Om kokito poddi dau iri om kotumbayaai no iyau.

⁹(Om gisom piya'ddi nga' a' po iyolo' kosuhut do komoyon di nokotulis dot id suang do Buuk do Kinorohingan do mositi' nod apasi kawagu iyau do mantad id kapatayon,ka.)

¹⁰Om uli' noddi i tumatanud di Yesus diri.

¹¹Om poingkakat diri i Maria Magdalina do mihad-ihad do hiri'd soliwan di lobong. Om liing no iyau do hiri'd lobong do mikuwo'd mihad-ihad.

¹²Om kokito no dau o duwo o moloikat do kipakayan dot opurak. Om poirikau i duwo o moloikat diri do hiri'd pinoilihan di rata' di Yesus, dot iso' o hiri'd ponong id tulu, om iso' o hiri'd ponong id gakod.

¹³Om ponguhot no i duwo o moloikat diri, “Nokuro tu' mihad ko, oi inan?” ka.

¹⁴Om koboros poddi dau o miagal diri, om koili no iyau do hiri'd dotolikudan dau om kokito no dau i Yesus do poingkakat do hiri. Nga' a' po dau oilaan dot i Yesus iri.

¹⁵Om uhoto' no iyau di Yesus, “Inan, nokuro tu' mihad ko? Isai o tihumon nu?” ka dau. Om ondos daa di Maria om i tukang kabun i minoro-boros, om boros ka dau, “Aman, ondung iya' i pinapawaliu dau do mantad hiti, om sunudai oku po ondung hinonggo nu, om oongoi ku i' iyau,” ka dau.

¹⁶Om boros ka di Yesus dot id dau, “Maria!” ka. Om koili no i Maria di Yesus om boro-boros no dot id suang do boros dot Ibrani dot, “Rabuni!” ka. (Komoyon nopoddi nga', “Guru!” ka.)

¹⁷Om boros ka di Yesus dot id dau, “Kada' po igit doho', tu' a' oku po nokoinsawat do hilo'd di Tapa'. Nga' ongoi nogi' solowot di piro-piro tobpinai ku, om sunudan no iyolo' do minsawat oku noddi do hilo'd Tapa' ku, i Tapa' dokoyu iyokoyu, om i Kinorohingan ku, om i Kinorohingan dokoyu iyokoyu,” ka dau.

¹⁸Om ngoyo' noddi di Maria sunudai i piro-piro tumatanud di Yesus do nokokito iyau di Tuhan om i Tuhan o pinopoboros ngai'ddi dot id dau.

¹⁹Om totuong i' do tadau'd minggu'ddi do tuminimung i piro-piro tumatanud di Yesus dot id iso' o walai. Om nontiilan ngai' diyolo' i wawayaan, tu' moddosi iyolo' di piro-piro boyoon do tulun do Yohudi. Om sigog i' do rikot i Yesus do poingkakat do hiri'd pogialatan diyolo', om boro-boros nod, “Ongosimbayan kou po,” ka dau.

²⁰Om koboros poddi dau o miagal diri, om pokitono' no dau iyolo' di palad om tobik dau. Om ongotood tomod diri iyolo' do nokokito di Tuhan.

²¹Om boros kaddi kawagu di Yesus dot id diyolo', “Ongosimbayan kou po. Om poingkuro nopo i Tapa' ku do minonuhu' doho' om iyo oku no iyoho'ddi do monuhu' dokoyu,” ka dau.

²²Om poobuso' noddi dau o pinuhobo dau dot id diyolo' om boro-boros nod, “Romito' no dokoyu o Rusod do Kinorohingan.

²³Ondung mangampun kou do dusa dot isai nopo o tulun, om Kinorohingan nga' mangampun no di dusa dau'ddi. Nga' ondung a' kou mangampun do dusa dot isai nopo o tulun, om Kinorohingan nga' a' no mangampun di dusa dau'ddi,” ka dau.

²⁴I Tumas nopo (i roitan do “Miapid”), i tiso' di hopod om duwo o tumatanud di Yesus, om a' hino do tontok di ruminikot i Yesus.

²⁵Om boros kaddi di tumatanud di Yesus di suwai dot id di Tumas, “Nokokito iyahai di Tuhan!” ka diyolo'. Nga' boros kad Tumas, “Ondung a' oku po kokito di pilat di linantak do hiri'd palad dau, om a' ku po kotudu' o tonturu' ku do hiri'd pilat di linantak diri, om a' ku po kakama' o palad ku do hiri'd tobik dau, om a' oku po kopio monongkuyaan,” ka dau.

²⁶Om sominggu' noddi do mantad diri om hiri po kawagu'd kinoiyonon diri i tumatanud di Yesus, om i Tumas nga' hino i' do tontok diri. Om nongoontiilan ngai' nopo i wawayaan. Nga' korikot i' i Yesus om ongoi no iyau ingkakat do hiri'd pogialatan diyolo', om boro-boros nod, “Ongosimbayan kou po,” ka dau.

²⁷Om boros kaddi di Yesus dot id di Tumas, “Ontong diti palad ku, om potuduwon' ino tunturu' nu'd hiti. Om ngoyo' pakamao' ino palad nu'd hiti'd tobik ku. Kada' no pikoduwo o ginawo, nga' ponongkuyaai nogi' kopio!” ka dau.

²⁸Om boros kad Tumas dot id di Yesus, “Oi Tuhan ku, i Kinorohingan ku!” ka.

²⁹Om boros ka di Yesus dot id dau, “Otumbayaan ko nopo om nokokito ko doho', koii? Olumaag no i tulun dit otumbayaan nopo dot a' piya kokito doho'!” ka dau.

³⁰Om ogumu' po o kongoimayaan do suwai do winonsoi di Yesus dot id toguang di tumatanud dau, nga' a' i' iri nokotulis dot id buuk diti.

³¹Nga' iti ngai' noo o nokotulis, om otumbayaan[43] kou i' dot i Yesus no i Raja' do Gampamasi, i Tanak do Kinorohingan, om iyokoyu nopondo it otumbayaan dau om kaanu nod koposion.