Read Kadazan Dusun YOHANIS 5 Bible Online

YOHANIS 5 - Kadazan Dusun bible

YOHANIS 5

¹Om id tohuri noddi ko' iri om haro o tadau'd agayo do tulun do Yohudi, om ongoi noddi i Yesus do hilo'd Yorusalim.

²Hilo' nopod Yorusalim om haro o tiso' o kulam dit id somok[10] di wawayaan di roitan do “Wawayaan do Dumba'”, i pinungaranan do Baitisda[11] dot id suang do boros dot Ibrani. Om hiri nopoddi nga' haro o limo nokoiyonon do tinaapan.

³Om hiri nopod tinaapan diri nga' ogumu' o tulun do sumakit do songillii; haro o bolou, om haro o kimpo', om haro it a' koundaliu. [Om mandad ngai' nopo iyolo' do lingguon i waig.

⁴Tu' haro i' o maso do lumintuhun o moloikat do Tuhan dot id kulam diri do mongoi pomolinggu' di waig. Om iri nopondo tulun di sumakit di kopogulu do tumabung do hiri'd kulam di ngoyon lingguo' i waig om olingasan no do mantad id nunu nopo o toruol dau.][12]

⁵Om hiri nopod kinoiyonon diri nga' haro o kusai di tolu no nohopod om walu' o toun do sumakit.

⁶Om kokito no di Yesus i tulun diri do poinglii do hiri, om oilaan no dau do laid no kopio'd sumakit i tulun diri. Om uhoto' noddi di Yesus i tulun diri, “Orohian ko i' dot olingasan?” ka dau.

⁷Om boros ka di tulun do sumakit diri do suminimbar, “Tuan, aiso' i' o tulun do hiti do mongoi patabung doho' do hilo'd kulam do tontok di ngoyon lingguo' ilo waig. Om daamot ku pondo do mongoi'd hilo'd kulam, om osoguluanan oku nod tulun do suwai,” ka dau.

⁸Om boros kaddi di Yesus dot id dau, “Tungag no, om igitan i' ino galam nu om mamanau nondo,” ka dau.

⁹Om diiri iddi om diiri do nolingasan i tulun diri. Om saano' nopo dau i galam dau om pamanau no. Nga' tadau nopoddi om tadau'd Sabat.

¹⁰Om iri noddi o nokoboro-boros di piro-piro boyoon do tulun do Yohudi dot id tulun di kolilingasai'ddi do, “Baino' nopo moti' om tadau'd Sabat. Om pogoduhan i' di Tourat toko' do manaan dino galam nu,” ka diyolo'.

¹¹Nga' boros ka di tulun diri, “Iri tulun di minomolingos doho' di tiinu' o minonuhu' doho' do manaan diti galam ku om minonuhu' doho'd mamanau,” ka dau.

¹²Om ponguhot po iyolo' dau, “Isai i minonuhu' diya' do manaan dino galam nu om i minonuhu' diya'd mamanau?” ka.

¹³Nga' a' no i tulun di nolingasan diri nokoilo ondung isai i tulun di minonuhu' dau do momonsoi'd miagal diri, tu' nokorolot no i Yesus di tulun dot ogumu'.

¹⁴Om kosolowot noddi di Yesus i tulun diri do hiri'd suang di Walai'd Sasambayangan dot Agayo, om boro-boros no iyau dau do poingkaa, “Nolingasan ko noddi. Om kada' nondo pomonsoi kawagu'd dusa, om a' ko i' oontok dit araat ko iri,” ka dau.

¹⁵Om pamanau no i tulun diri om ngoyo' no dau sunudai i piro-piro boyoon do bansa'd Yohudi dot i Yesus o minomolingos dau.

¹⁶Om iri noddi o kinoimpuunon di tulun do Parisi do monusa' di Yesus tu' minomolingos i' iyau'd tulun do tontok do tadau'd Sabat.

¹⁷Nga' boros ka di Yesus dot id diyolo', “Kumaraja' kasai' i' i Tapa' ku do gisom do dinondo, om iyoho' nga' kumaraja' i',” ka dau.

¹⁸Om iri no boros di Yesus do miagal diri o nokobinsuhu' kawagu di piro-piro boyoon do Yohudi do mogihum do ralan do mamatai dau. Om iyo pogi' iyolo'ddi nga' okon nopo ko' i nokotolibamban i Yesus di toturan do tugama' do pasal do tadau'd Sabat o kokuwaan nga' iri po nokoboros iyau do Tapa' dau o Kinorohingan; tu' komoyon nopoddi nga' miyo iyau do Kinorohingan.

¹⁹Om boros kaddi di Yesus do suminimbar di tulun diri, “Ponongkuyaai kou no, dot a' i' i Tanak milo do mimpori-pori do momonsoi'd nunu nopo. Iri no it okito dau do wonsoyon di Tapa' dau o wonsoyon dau. Tu' nunu nopo i wonsoyon di Tapa', om iri no i wonsoyon di Tanak.

²⁰Tu' osianan i' i Tapa' om potudukon dau dot id Tanak o koinsanai di wonsoyon dau. Om potudukon po di Tapa' dot id Tanak o piro-piro o wonsoyon dit agayo ko' iri, om gisom dot ongosuayan ngai' kou nondo.

²¹Iri nopo Tapa' om mamasi i' do tulun di napatai, om manahak diyolo'd koposion dit otopot kopio om i poingompus; om iri nogi' i Tanak nga' manahak i' do koposion dit otopot kopio om i poingompus dot id tulun di korohian dau do manahak do koposion.

²²Iri nopo Tapa' om a' i' momutus dot isai nopo o tulun. Tu' nakatahak ngai' no dau dot id Tanak dau i kuasa' do momutus.

²³Om winonsoi pogi' di Tapa' o miagal diri nga' monuhu' iyau'd koinsanai'd tulun do momusou di Tanak diri do miagal do pomumusou diyolo' di Tapa'. Iri nopo tulun dit a' momusou di Tanak om a' no momusou di Tapa', i minonuhu' di Tanak diri.

²⁴Otopot no kopio iti poboroson ku do poingkaa: Tulun nopo di mokinongou'd boros ku, om monongkuyaan no di minonuhu' doho', om kaanu no do koposion dit otopot kopio om i poingompus. Om a' no iyau ohukuman; tu' nokoidu' no iyau do mantad id kapatayon om nakaanu no do koposion.

²⁵Ponongkuyaai kou no: Rumikot indo o maso, om otopot nopo kopio om nokorikot no, do korongou nondo i tulun do napatai di boros do Tanak do Kinorohingan. Om iri nopondo tulun di korongou dau om apasi no.

²⁶Om poingkuro nopo i Tapa' do tudan do koposion, om i Tanak dau nga' silihon nogi' dau do tudan do koposion.

²⁷Om noonuan no dau i Tanak dau do kuasa' do momutus, tu' iyau no i Tanak do Tulun.

²⁸Kada' kou kosuayai do korongou'dti tu' rumikot indo o maso do korongou ngai' do boros dau i tulun di nangapatai.

²⁹Om sumoliwan nondo iyolo' do mantad hiri'd lobong. Om iri nopondo tulun dit osonong o winonsoi om apasi indo do kumaa dot id koposion. Nga' iri nopo tulun di minomonsoi'd araat om apasi nondo do kumaa dot id hukuman,” ka di Yesus.

³⁰Om boros ka kawagu di Yesus, “A' oku i' milo do momonsoi'd nunu nopo do tumanud do doho'd korohian. Pomumutus ku nopo om tumanud no di ponuhuan do Kinorohingan. Om otulid i' o pomumutus ku tu' a' oku i' tumanud do doho'd korohian, suwai ko' i korohian di Tapa' ku, i minonuhu' doho', o tonudon ku.

³¹Ondung iyoho' o popoboros do pasal doho', om a' i' doti' milo do ponongkuyaan i poboroson ku.

³²Nga' haro i' o tulun do suwai do pinopoboros do pasal doho', om oilaan ku i' dot otopot i pinoboros dau.

³³Nokoponuhu' kou nod tulun do minongoi ponguhot di Yohanis, om nokoposunud no iyau dit otopot do pasal doho'.

³⁴Om kapabarasan ku nopo do miagal diti om okon i' ko' sumondiu oku'd boros do mantad id tulun di popoboros di toilaan diyolo' do pasal doho', suwai ko' iyokoyu o pokipoposian ku.

³⁵I Yohanis nopoddi om miagal di lampung di kiapui om i popotitiu do tulinau. Om orohian kou i' do rumamit do daamot di boros dau'ddi, i miagal do tanawau.

³⁶Nga' iri nopo doho'd poboroson om agayo po ko' i pinoboros di Yohanis. Om iti nopo wonsoyon ku'd dinondo, iti karaja' di pinonuhuan doho' di Tapa' ku do momonsoi, om popointalang nogi' kopio dot i Tapa' o minonuhu' doho'.

³⁷Om i Tapa', i minonuhu' doho' nga' pinopoboros i' do pasal doho'. Iyokoyu nopo om a' i' nokoumbal do nokorongou'd boros dau ko' nokokito po do rabas dau.

³⁸Om a' i' poingopi' dot id suang do ginawo dokoyu i boros dau, tu' a' kou i' monongkuyaan doho', i sinuhu' dau.

³⁹Om minsingilo kou pogi' di nokotulis do hiri'd Buuk do Kinorohingan nga' momusorou kou dot iri o kaanu-anu dokoyu'd koposion dit otopot kopio om i poingompus. Om iri Buuk do Kinorohingan nga' pinopoboros i' do pasal doho'.

⁴⁰Nga' a' kou iddi rumikot dot id doho' om kaanu i' do koposion dit otopot kopio om i poingompus.

⁴¹A' oku i' mogihum do karayahan do mantad id tulun.

⁴²Tu' otutunan ku i' iyokoyu om oilaan ku i' dot a' kou osianan do Kinorohingan dot id suang do ginawo dokoyu.

⁴³Ruminikot oku do mikuwo'd kuasa' di Tapa' ku, nga' a' kou i' ruminamit doho'. Nga' tulun nopondod suwai di rumikot do mikuwo'd dau'd kuasa' om romiton i' dokoyu.

⁴⁴Poingkuro kou'ndo do milo'd monongkuyaan, ondung mogihum kou nod karayahan do mantad id sompi' ko' tulun, om a' nogindo tumotos do mogihum do karayahan do mantad id Kinorohingan dit Iso-Iso'?

⁴⁵Kada' dokoyu soroho' dot iyoho' o papasala' dokoyu dot id toguang do Tapa'. Tu' iri nopo papasala' dokoyu om i Musa, i sondihon dokoyu.

⁴⁶Ondung monongkuyaan kou daa di Musa, om monongkuyaan kou no daa doho', tu' pasal i' doho' i tinulis dau.

⁴⁷Nga' ondung a' kou monongkuyaan di tinulis di Musa, om poingkuro kou nogi' daa'ndo do monongkuyaan di poboroson ku?” ka di Yesus.