Read Kadazan Dusun Winonsoi Di Rasu 7 Bible Online

Winonsoi Di Rasu 7 - Kadazan Dusun bible

Winonsoi Di Rasu 7

¹Om uhoto' noddi di Boyoon dot Agayo dot Imam i Stipanus, “Otopot ngai' i' i pinoboros di tulun diri?” ka.

²Om boros kad Stipanus do suminimbar, “Oi tobpinai-tobpinai, om i molohing-lohingon! Pokinongou kou daa diti poboroson ku. Tontok dit a' po nokoundaliu i Abraham i taki-aki toko' do kuminaa do hilo'd Haran di poundorong po iyau do hilo'd Misopotomia, om intalang no o Kinorohingan i kikagayaan dot id dau.

³Om boros ka dau, ‘Tongkiadai noti pomogunan nu om koobpinayan nu. Om mongoi i' do hilo'd pomogunan do potudukon ku diya',’ ka.

⁴Om tongkiad noddi i Abraham di pomogunan do Kasdim, om ongoi noddi iyau do hilo'd Haran. Om kapatai poddi i tapa' di Abraham om poundoliho' nogid Kinorohingan i Abraham do pinakaa do hilo'd pomogunan di nokoiyonon dokoyu'd baino'.

⁵Tontok nopo do maso'ddi om aiso' i' o tongosongkoiyonon piya'd tana' do pinatahak do Kinorohingan dot id di Abraham do sumiliu'd dau'd songonuon dot id pomogunan diti. Nga' pamatos noddi o Kinorohingan dot id di Abraham do papatahak diti tana' diti do sumiliu do songonuon dau om songonuon di sinakagon dau. Om tontok nopoddi om aiso' po o tanak di Abraham.

⁶Nga' minoro-boros i' o Kinorohingan dot id dau do poingkaa, ‘Koundorong nondo o sinakagon nu dot id pomogunan do bansa'd suwai, om silihon nondo iyolo'd tulun do hiri'd pomogunan diri do turipon, om inggoriton nondo iyolo' do solinaid dot apat nahatus o toun.

⁷Nga' hukuman ku nondo i bansa' di monguripon diyolo', om kosoliwan nondo iyolo' do mantad id pomogunan diri om sumambayang dot id doho' do hiti'd pomogunan diti,’ ka.

⁸Om pogiroto' noddi do Kinorohingan i tumpongo dau'ddi do sunat o pinomogirot. Om sunatai noddi di Abraham i Isak i tanak dau di walu' nogi' o tadau do tumur. Om i Isak nga' minonunat nogi' di Yakub i tanak dau. Om i Yakub nga' minonunat nogi' di hopod om duwo o tanak dau, om iri no o nosiliu do taki-aki do bansa'd Yohudi.

⁹Om iri nopo i taki-aki toko' nga' nosolon di Yusup, gowoi poddi om dagango' no diyolo' i Yusup do sumiliu do turipon do hilo'd Masir. Nga' moyo-woyo' i' o Kinorohingan dau,

¹⁰om pinoidu' id Kinorohingan i Yusup do mantad id koinsanai di kosusaan dau. Om nonuan iyau'd Kinorohingan do kowoyo-woyoon dot osonong om toilaan do tontok di pinotimbaba' iyau di Piraun, i raja' do Masir. Om siliho' noddi di Piraun i Yusup do gobunor do hiri'd pomogunan do Masir, om mongilo-ilo do hiri'd walai di Raja' Piraun.

¹¹Om pononglous noddi dot adalaan kopio o pointongkop do pomogunan do Masir om Kanaan gisom dot ongoinggorit tomod poo o tulun. Om aiso' noo o takanon di taki-aki toko'.

¹²Om tontok di nokorongou i Yakub do haro o gandum do hilo'd Masir om suhuon' no dau i tangaanak dau, iri no i taki-aki toko' do mongoi'd hilo'. Om koinsan nogi' diyolo'ddi do minongoi'd hilo'.

¹³Om koinduwo poddi diyolo' do minongoi'd hilo', om posunudo' nogi' di Yusup di tongotobpinai dau dot i Yusup iyau. Om koilaai nogiddi di raja' do Masir i sompiiyon di Yusup.

¹⁴Om pomilin noddi i Yusup do popoongoi di Yakub i tapa' dau, om koinsanai di sompiiyon di tapa' dau do mongoi'd hilo'd Masir. Kogumuon' nopo diyolo'ddi do kuminaa do hilo'd Masir om turu' nohopod om limo o tulun.

¹⁵Om undaliu noddi i Yakub do kuminaa do hilo'd Masir, om hilo' no o kinapatayon dau om i komolohingan toko'.

¹⁶Nga' iri nopo i rata' diyolo' om nigitan i' kawagu do pinakaa do hilo'd Sikim, om lobongo' no do hiri'd pamalabangan di binoli di Abraham do mantad id bansa' do Himor di hilo'd Sikim, do tusin o pinomoli dau.

¹⁷Om tontok dit oruhai noddi o kapamayaan do Kinorohingan di nabatos dau dot id di Abraham, om nokoinggumu' noddi o bansa' toko' do hilo'd Masir.

¹⁸Om alaid noddi om haro'ddi ot iso' o raja' do suwai do momorinta' do hilo'd Masir dit a' nokotutun di Yusup.

¹⁹Om mongulok-ulok diri i raja'ddi di bansa' toko' om orongit tomod iyau dot id taki-aki toko'. Gisom do minononsog iyau diyolo' do papataam do tangaanak diyolo' di wagu po kosususu, om apatai indo.

²⁰Om tontok nogi' do maso'ddi do nosusu i Musa; i Musa nopoddi om olumis kopio o kinaanak-anako'. Om tolu no o tulan dau do poinggompi' iyau di molohing dau do hiri'd walai dau.

²¹Om tontok di nakataam iyau, om ngoyo' no iyau di tanak di Piraun do tondu', om gompio' no dau iyau do siniliu'd tanak kopio dau.

²²Om tudukai noddi diyolo' i Musa do koinsanai di toilaan do bansa' do Masir, gisom do nosiliu iyau'd tulun di kikuasa' kopio o boros om wonsoyon.

²³Om tontok dit apat noddi nohopod o toun do tumur di Musa, om kosorou'ddi iyau dot orohian do mongoi ontong do koiyon-iyono' di tulun dot Israil i bansa' dau.

²⁴Om kokito noddi dau o songulun o bansa' dot Israil dot inggoriton do tulun do Masir, om patayo' no dau i tulun do Masir diri, tu' minogobi' iyau di tulun dit inggoriton diri.

²⁵Ondos nopo daa di Musa om kosuhut i bansa' dau do pakayon iyau'd Kinorohingan do popoidu' diyolo'. Nga' a' i' iyolo' kosuhut.

²⁶Om sinuabon noddi om kokito po dau o duwo o tulun dot Israil do miodu om tumotos no daa i Musa do popiulud diyolo'. Boros ka dau, ‘Iyokoyu nopondo om miobpinai i'. Nokuro tu' miodu kou?’ ka dau.

²⁷Nga' sudsuro' nogi' di tulun di minomobog di tambalut dau i Musa, om boro-boros nod, ‘Isai o minomili' diya' do sumiliu'd boyoon om minomili' do sumiliu'd gompomutus dahai?

²⁸Patayon oku po daa iyoho' diya' do miagal di tulun do Masir di pinatai nu konihab?’ ka dau.

²⁹Om tontok di norongou di Musa i boros di tulun diri, om poggidu' no iyau do mantad hilo'd Masir om ongoi noddi iyau iyon do hilo'd pomogunan do Midian. Om hilo' no iyau do gisom do duwo o tanak dau.

³⁰Apat poddi nohopod o toun do mantad diri, om rikot no o tiso' o moloikat dot id di Musa do hilo'd tana' do kowotuan do hilo'd somok do Nuluhon do Sinai. Iri nopo moloikat diri om ruminikot dot id suang do tapui di molob-ngolob dot id bulungkut.

³¹Om osuayan diri i Musa do nokokito'ddi, om ongoi no iyau insomok do mongoi pogontong ondung nunu kopio iri. Om korongou noddi dau o boros do Tuhan do poingkaa,

³²‘Iyoho' no o Kinorohingan di taki-aki nu; iyoho' no i Kinorohingan di Abraham, om i Isak, om i Yakub,’ ka. Om gagarai nopo i Musa dot opopoddosian, om a' noddi iyau kasaap do montong di bulungkut diri.

³³Om boro-boros po kawagu o Tuhan dot id dau do poingkaa, ‘Iduwo' ino kasut nu, tu' iti nopo tana' di ningkokoton nu om tana' dit olidang.

³⁴Nokito ku no om nongoilaan ku no o koinggoritan di tulun ku do hilo'd Masir. Om norongou ku no o todoi diyolo', om nokolintuhun oku no do mongoi popoidu' diyolo'. Baino' nopodti om suhuon ku iya' do gumuli' kawagu do hilo'd Masir,’ ka.

³⁵I Musa nopodti om niada' do bansa' dot Israil, om a' diyolo' rinamit tu' minomoros i' iyolo' do poingkaa, ‘Isai o minomili' diya' do sumiliu do boyoon om gompomutus dahai?’ ka. Nga' iyau nogi' kopio i tulun di sinuhu'd Kinorohingan do sumiliu do boyoon om i gampamasi do nuhupan di moloikat di minintalang dot id dau di hiri'd bulungkut di molob-ngolob o tapui.

³⁶Om i Musa no o minomoyo' do bansa' dot Israil do suminoliwan do mantad hilo'd Masir, mikuwo'd minomonsoi do kongosuayan om koimayaan do hilo'd Masir, om hilo'd Rahat dot Aragang, om hilo'd tana' do kowotuan do solinaid dot apat nohopod o toun.

³⁷Om i Musa nogi' o minomoros dot id bansa' dot Israil do poingkaa, ‘Onuan kou nondod Kinorohingan do songulun o nabi di pilion do mantad id pogialatan dokoyu, do miagal di minomili' iyau doho',’[7] ka.

³⁸Om i Musa nogi' i poinsugku' di bansa' dot Israil di hilo'd tana' do kowotuan, i suminiliu do popiromut dot id moloikat om id taki-aki toko' do tontok di minoro-boros i moloikat dot id dau di hilo'd Nuluhon do Sinai. Om iyau nogi' i nakaramit di habar dit a' tumanus do mantad id Kinorohingan, i polombuson dot id dati'.

³⁹Nga' mulong po dot iyo'ddi nga' a' i' minumboyo' dau i taki-aki toko'. Om niada' i' diyolo' i Musa, om siguli' nogiddi iyolo' do hilo'd Masir.

⁴⁰Om boro-boros no iyolo' di Harun do poingkaa, ‘Pamansayai nogi' iyahai do tininganak, om iri indo i tininganak o momoyo' dahai. Tu' a' no dahai oilaan ondung nunu o nosiliu dot id di Musa, i minomoyo' dahai do suminoliwan do mantad hilo'd Masir,’ ka diyolo'.

⁴¹Om pomonsoi noddi iyolo' do tininganak do pinoiyo-iyo do tanak do sapi', om pinapatahak iyolo' do porsombahan di sinumbali' dot id tininganak diri, om minoginakan iyolo' do pamarayou di tininganak di winonsoi diyolo'.

⁴²Om tongkiadai noddi iyolo'd Kinorohingan, om pologoso' no dau iyolo' do tumuku' do rombituon di hilo'd tawan. Iri nopo om miontok nopo kopio di nokotulis dot id piro-piro buuk do nabi do poingkaa, ‘Oi tulun dot Israil! Okon i' ko' id doho' o kinoponumbolian om kinapatahakan dokoyu di tayam-tayam di solinaid dot apat nohopod o toun di hilo'd tana' do kowotuan.

⁴³Om piniigit-igitan dokoyu i kiim di tingolig di Molok, om i tininganak di pinoiyo-iyo do rombituon di roitan do Ripan, om iri no i tininganak di winonsoi dokoyu o maan dokoyu'd tukuon, om iri o kapakayaan ku dokoyu do hilo'd pomogunan do Babil, i hilo'd sodu' kopio,’ ka.

⁴⁴Om haro o kiim di taki-aki toko' do hilo'd tana' do kowotuan, i Koropohon do Kinorohingan do tontok di rumikot iyau dot id tulun. Om pinomonsoi nopoddi kiim diri om tumanud di pinonuhuan do Kinorohingan di Musa, om pinoomit di pinokitanan do Kinorohingan dot id di Musa.

⁴⁵Om nigitan nogi' di taki-aki toko' i kiim diri do tontok di winoyo' iyolo' di Yosua do minongoi pagahau do pomogunan toko'dti do mantad id kuasa' do piro-piro bansa'd suwai di momorinta' mantad do pomogunan diti, i nuyung do Kinorohingan di ruminikot iyolo'. Om hiri kasai' po i kiim diri do gisom di hino no i Daud.

⁴⁶I Daud nopo om kohubayaan do Kinorohingan. Om pokionuon no dau do pologoson iyau'd Kinorohingan do popoingkakat iyau dot iso' o walai do dong Kinorohingan di tukuon di Yakub.[8]

⁴⁷Nga' i Suliman iddi o pinopoingkakat di walai do Kinorohingan diri.

⁴⁸Nga' a' i' minundorong i Kinorohingan dit Agayo Kopio dot id suang di walai di winonsoi'd tulun; tu' nokotulis no dot id buuk do nabi o poingkaa,

⁴⁹‘Ilo tawan o tirikohonon ku do momorinta', om iti pomogunan o koulokon do lapap ku. Okuro-kuro daa o walai do wonsoyon dokoyu doho'? Hinonggo o tiyonon ku'd mundorong?

⁵⁰Okon toi ko' iyoho' i' o minomonsoi do koinsanai'd nunu nopo?’ kad boros do Kinorohingan.

⁵¹Ongokodou no kopio o ginawo dokoyu oi tobpinai-tobpinai, om apagon kou no kopio do mumboyo' do Kinorohingan! Om iyo kou pod bosukon dot a' korongou di boros do Kinorohingan! Miagal kou nopo di taki-aki dokoyu; i sumaap kasai' do Rusod do Kinorohingan!

⁵²Inggorito' ngai' nopo di taki-aki dokoyu i nabi. Om pinatai diyolo' i susuhuon do Kinorohingan di gulu po i pinopoboros do korikatan di susuhuon do Kinorohingan dit otopot. Om iyokoyu nga' pinapadagang i' om minamatai di susuhuon do Kinorohingan diri.

⁵³Om naramit no dokoyu i Tourat do Kinorohingan, i pinaatod do piro-piro moloikat, nga' a' i' dokoyu tinanud iri!” ka di Stipanus.

⁵⁴Om kongotogod noddi i piro-piro Gompomutus do Don Tugama' diri do nokorongou di boros di Stipanus, om karaatai noddi kopio iyolo' dau.

⁵⁵Nga' tingaha' noddi do hilo'd tawan i Stipanus i noporinta' do Rusod do Kinorohingan. Om kokito no dau o kagayaan do Kinorohingan, om i Yesus do poingkakat do hiri'd dawananan do Kinorohingan i tiyonon di noonuan do kuasa'.

⁵⁶Om boro-boros no i Stipanus do poingkaa, “Intong pogi', okito ku o surga do noiwangan, om poingkakat i Tanak do Tulun dot id dawananan do Kinorohingan!” ka dau.

⁵⁷Om sonsongo' ngai' nopo di tulun di gompomutus diri o tolingo diyolo' do mikuwo'd songgiak-giak, om insan-insan nopo iyolo' bontol do tuminabpo di Stipanus.

⁵⁸Om gayato' no diyolo' iyau do poposoliwan di bandar om pindumpahai no diyolo' iyau'd watu. Om iri nopo i piro-piro tulun di minongoi ontong di nosiliu'ddi nga' pinatamangan diyolo' i pakayan diyolo' do songulun o tanakwagu dot i Saulus o ngaran.

⁵⁹Om di nopo di maso no diyolo' do mindumpau di Stipanus, om pomomoros no i Stipanus dot opuhod do poingkaa, “Oi Tuhan Yesus, romito' no o rusod ku!” ka dau.

⁶⁰Om otud noddi iyau om boro-boros no dot opuhod do poingkaa, “Oi Tuhan, kada' pababaai diyolo' iti dusa diyolo'!” ka. Om koboros poddi di Stipanus o miagal diri om kapatai no iyau.