Read Kadazan Dusun 2 KORINTUS 10 Bible Online

2 KORINTUS 10 - Kadazan Dusun bible

2 KORINTUS 10

¹Dinondo no om haro o pokionuon kopio ku iyoho' i Paulus dot id dokoyu. Tu' roitan oku'd tulun dot alamaya' do hiri'd potoguang dokoyu nga' orongit oku i' kaka dot id dokoyu dot a' oku poinsugku' dokoyu. Mantad no di kalamayao' om kosonongo' do Kristus o

²kopokionuan ku kopio, dot a' oku sansagan do rumongit dot id dokoyu do korikot oku'd hino. Tu' kosorou oku no do rumongit dot id tulun di momoros dot iri i korohian do dom pomogunan o kakarajaan dahai.

³Mulong piya do poimpasi iyahai do hiti'd pomogunan, nga' okon i' ko' korohian do dom pomogunan o kobinsuhu' dahai do kumaraja'.

⁴Iri nopo i rapo-rapo do pakayon dahai do monokisangod om okon i' ko' rapo-rapo do dom pomogunan suwai ko' i rapo-rapo do dong Kinorohingan di kikuasa'. Om iri no i rapo-rapo'ddi o milo do mamaraag di kuta' do pogintirungan do tulun, om pananus dahai di pogisosongkiwalan,

⁵om pananus di kasawato'd ginawo do miagal do tolig di mangantob do tulun do mintutun do Kinorohingan. Om alaon dahai i pomusarahan do tulun om mumboyo' indo iyolo' do Kristus.

⁶Om kointalang pondo kopio dokoyu o kotorodoko' dokoyu do mumboyo' om sumodia' nondo iyahai do momohukum do koinsanai di tulun dit a' mumboyo'.

⁷Ilaai no kopio dokoyu i kowoyo-woyoon dit otopot. Tu' ondung haro o tulun do momusorou do natantu' no kopio do nasanganu iyau do Kristus, om mositi' no do sorohon no kopio dau o dau'd tinan, om mositi' dot oilaan dau dot iyahai nga' nasanganu nogi' do Kristus do miagal dau.

⁸A' oku i' ointingayaman dot adala-dalaan oku piya dot oondos di kuasa' di tinahak do Tuhan dot id dahai, tu' iri nopo kuasa'ddi om popogirot i' dokoyu, om okon i' ko' popoluhoi.

⁹Mada' oku i' do sorohon dokoyu do pomorolosi ku dokoyu i piro-piro o surat ku di pinokirim ku dot id dokoyu.

¹⁰Tu' boros kad tulun, “Iri nopo i surat di Paulus om awagat kopio om koronob, nga' potoguang nopo kopio iyau dati' om alamaya' indo kopio iyau om a' korolosi o boros dau!” ka.

¹¹Osonong do kosuhut kopio i tulun di minomoros do miagal diri, do miagal i' di pinotulis dahai dot id surat dahai o wonsoyon dahai do hiri piya iyahai id pogialatan dokoyu.

¹²Atantu' no dot a' i' iyahai katama' do miyo di tulun di momusorou dot asawat iyolo'. Tu' adalaan no kopio o kababasug do tulun do miagal diri. Om momonsoi iyolo' dot oturan diyolo', om iri no it oturan diri o pongilo diyolo' do kowoyo-woyoon diyolo'.

¹³Nga' iyahai nopo om a' i' miagal diri. Ondung oondos iyahai om a' i' iyahai oondos do gisom do katalib dit apatut do kaandasan. Om a' i' iyahai tumolibamban do pinogisaman di karaja' di tinantu' mantad do Kinorohingan do wonsoyon dahai. Om iyokoyu nogi' nga' kosuang id karaja' dahai'ddi.

¹⁴Om tontok di minongoi iyahai do hino'd dokoyu do minongoi poposusui di Habar dot Osonong do pasal do Kristus dot id dokoyu, om a' i' kopio iyahai nakatalib di pinogisaman di karajaon dahai.

¹⁵Om a' i' iyahai mimboros do pasal di karaja' do tulun do suwai dit id soliwan di pinogisaman di natantu' mantad do Kinorohingan do bagi' dahai. Nga' iyahai nopo om hiri id suang di pinogisaman di tinantu' mantad do Kinorohingan do bagi' dahai, om mogondos nopo iyahai do muhang-ruhang o kotumbayaan dokoyu dot id Kristus, om milo i' iyahai do momonsoi do karaja' dit agayo ko' iri dot id pogialatan dokoyu.

¹⁶Om milo i' iyahai do poporongou di Habar dot Osonong dot id piro-piro o pomogunan do suwai dot a' piya minog do minggayo-gayo do kopinggaya-gayaan nopo om i karaja' di winonsoi dot id kinoiyonon di tulun do suwai do kumaraja'.

¹⁷Nokotulis no dot id Buuk do Kinorohingan o poingkaa, “Isai nopo o tulun dot oondos do nunu nopo, om mositi' no dot oondos di nowonsoi'd Tuhan,” ka.

¹⁸Tu' iri nopo tulun dit arayou om i tulun di royohon do Tuhan, om okon i' ko' i tulun di mimpori-pori do mamarayou do dau'd tinan.