Read Kadazan Dusun 2 KORINTUS 13 Bible Online

2 KORINTUS 13 - Kadazan Dusun bible

2 KORINTUS 13

¹Iti no o kointolu ku do mongoi do hino'd dokoyu. Nokotulis no dot id Buuk do Kinorohingan o poingkaa, “Ondung haro o papasala' om apatut do duwo ko' tolu o tulun do sasi' do popoboros dot otopot iri om pokotopoton nogi' i papasala'ddi,” ka.

²Iri nopo tulun di nongkowonsoi'd dusa di gulu om koinsanai di tulun do suwai, om nokoinsan mantad ku no di koinduwo ku'd minongoi do hino'd dokoyu. Baino' nodti, do daamot ku po do poinsodu' dokoyu om poinsanon ku po kawagu iyokoyu, dot ondung korikot oku kawagu om aiso' no o tongosongulun piya dot id pogialatan diyolo' do koidu' do mantad id hukuman.

³Om okito nogindo dokoyu o koinsanai di popointalang kopio di korohian dokoyu do popointalang do Kristus kopio o somboros di polombuson ku. Tu' ondung haro o wonsoyon do Kristus dot id dokoyu, om a' i' iyau oluhoi do momonsoi'ddi. Suwai ko' pointalangon i' kopio dau o kuasa' dau dot id pogialatan dokoyu.

⁴Otopot i' do tontok di pinasalib iyau, om oluhoi i' iyau, nga' baino' nopoddi om napasi no iyau do mantad id kapatayon dot i kuasa' do Kinorohingan o minamasi dau. Om iyahai nga' oluhoi nogi' dot id suang do koposion dahai di poingiso' do Kristus, nga' soira' nopondo do kotimbaba' iyahai dokoyu om okoris i' iyahai do kotonggoi do Kristus, do pokorison di kuasa' do Kinorohingan.

⁵Ilaai pogi' kopio dokoyu o koposi-posion dokoyu ondung otopot kopio do poingimpou do kotumbayaan dot id Kristus. Atantu' no dot oilaan i' dokoyu dot id suang dokoyu o Kristus Yesus. Nga' suwai indo ondung a' kopio kou daa otumbayaan.

⁶Mogondos oku do koilo kou i' dot iyahai nopo om okon i' ko' i tulun dit obinluhoi.

⁷Nga' sumambayang iyahai dot id Kinorohingan om uhupan kou i' do Kinorohingan, om a' kou indo momonsoi di kasala'. Okon i' ko' popointalang iyahai dot oilo iyahai do momonsoi di karaja' dahai, suwai ko' mongodsuur iyahai dokoyu do momonsoi di korohian do Kinorohingan do mulong piya dot oluhoi o kokitanan dahai, nga' a' i' monguro.

⁸Tu' a' i' iyahai milo do momonsoi dit a' otopot, suwai ko' mositi' no do tumanud iyahai dit otopot.

⁹Orohian i' iyahai dot oluhoi iyahai om okoris kou po daa iyokoyu. Om sumambayang nogi' iyahai, om aiso' indo o koluhayan dokoyu.

¹⁰Om iri no o kinoponulisan ku do surat diti dot a' oku po koongoi do hino'd dokoyu, om a' indo awagat o wonsoyon ku dot id dokoyu do korikot oku do hino'd dokoyu, do mamakai di kuasa' do tinahak do Tuhan dot id doho'. Tu' kinapatahakan nopod Tuhan di kuasa'ddi dot id doho' om popogirot dokoyu, om okon i' ko' popoluhoi dokoyu.

¹¹Baino' nodti, oi tobpinai-tobpinai, om kongotood kou no om tumotos kou no do sumiliu'd tulun dit ogirot kopio, om it aiso' o koluhayan. Tonudon ngai' no dokoyu i nosihat ku. Om koiso-isoon no dokoyu o ginawo, om mogiuulud kou no kopio. Tu' moyo-woyo' i' dokoyu o Kinorohingan dit obinsianan kopio om i popiulud.

¹²Mogisuwau-suwau kou no do miagal do tulun do Kristian di mogiobpinai. Oinsanan nopo i tulun di nasanganu do Kinorohingan do pokirim do tabi' dot id dokoyu.

¹³Tuhan Yesus Kristus no o mamarakat ngai' dokoyu, om kosianan kou do Kinorohingan, om woyoon kasai' kou di Rusod do Kinorohingan.