Read Kadazan Dusun 2 KORINTUS 4 Bible Online

2 KORINTUS 4 - Kadazan Dusun bible

2 KORINTUS 4

¹Momonsoi pogi' iyahai do karaja'dti nga' mantad i' di kosonongo' do Kinorohingan. Om iri noddi ot a' koluhoi-luhoi do ginawo dahai.

²A' i' iyahai momonsoi di kowoyo-woyoo' di dongtotuong, i kointingayam. Om a' iyahai monipu' do kumaraja' om a' dahai somputulon o boros do Kinorohingan. Om Kinorohingan no o sasi' dahai dot iri no it otopot o poboroson dahai, om otumbayaan indo o tulun do suwai do milo iyahai'd ponongkuyaanan.

³Ondung a' kasai' po osuhutan iti Habar dot Osonong di posusuyon dahai, om iri no i tulun di kumaa dot id kapatayon it a' kosuhut diri.

⁴Iri no i ponokokinorohingan dit araat i momorinta' diti pomogunan o monompon do pomusarahan di tulun dit a' notumbayaan diri. Om iyau no o minangantob diyolo' om a' i' iyolo' kokito do tulinau do mantad id Habar dot Osonong diri, i pasal do kagayaan do Kristus i pinopointalang kopio'd Kinorohingan.

⁵Tu' iri nopo i habar di popinsusuyon dahai'ddi om okon i' ko' habar do pasal dahai, suwai ko' iri nopo i habar diri om habar do pasal di Yesus Kristus; om pasal dot iyau no o Tuhan; om iyahai no o nosiliu do susuhuon dokoyu dot i Yesus o nokosilihan dahai.

⁶Kinorohingan i' o minomoros do poingkaa, “Potitihon no o tanawau do mantad id totuong,” ka. Om iyau i' i Kinorohingan di pinopoulai di tanawau'ddi dot id suang do ginawo toko'. Om anawau i' o pomusarahan toko' om kosuhut toko' indo di tanawau do Kinorohingan di kosorong kopio do mulinau do mantad id rabas do Kristus.

⁷Nga' iri nopo i dapu' di don rusod dit olumis diri om id suang do tinan dahai dit aiso' tomod o gatang, i tana' do winonsoi. Om kointalang no dot iri nopo kogoyoo' do kuasa'ddi om mantad i' dot id Kinorohingan, om okon i' ko' mantad id dahai.

⁸Sumaap ngai' nopo dahai it id posorili' dahai, nga' a' i' iyahai aansip. Oborulong piya iyahai nga' a' indo lumuhoi kopio o ginawo dahai.

⁹Om ogumu' o pisangod dahai nga' a' i' iyahai insan dot iyahai-yahai kopio. Om mulong piya dot asaru' no iyahai do pimbabagan do gisom dot ohunduk nga' a' i' iyahai apatai.

¹⁰Om opurimanan kasai' nopo dahai i kinapatayon di Yesus dot id tinan dahai, om kointalang indo i koposion di Yesus dot id tinan dahai.

¹¹Solinaid po dahai do poimpasi, om pokipapatayan kasai' nopo iyahai dot i Yesus o kapamatayan, om kointalang indo o koposion di Yesus dot id tinan dahai diti matai i'.

¹²Komoyon nopoddi om maso po o kapatayon do kumaraja' dot id suang do tinan dahai, nga' otood i' iyahai tu' koposion i' o maso do kumaraja' dot id suang do tinan dokoyu.

¹³Nokotulis no dot id Buuk do Kinorohingan o boros do poingkaa, “Notumbayaan oku no, om iri noddi o koboro-boros ku,” ka. Om iyahai nga' otumbayaan i' do miagal diri kogirot, om iri noddi o kinapamarasan dahai, tu' notumbayaan i' iyahai.

¹⁴Om otumbayaan no kopio iyahai do Kinorohingan i' di minamasi kawagu di Tuhan Yesus o mamasi kawagu dahai do kotonggoi di Yesus. Om iyau o mangangat dokoyu om mangangat dahai dot id toguang dau.

¹⁵Om koinsanai'ddi om maan ngai' do koinsanangan dokoyu. Tu' mumu-gumu' o tulun do kopuriman do kosianan do Kinorohingan nga' mumu-gumu' no o sumambayang do mongunsikou dot id Kinorohingan; om koinggayo indo o Kinorohingan.

¹⁶Om iri no ot a' koluhoi-luhoi do ginawo dahai. Tu' mulong piya do muhang-ruhang o koluluhoi do tinan dahai nga' ginawo nopo dahai om oinwoguan i' do monikid tadau.

¹⁷Om iti nopo kosusaan dit agaan diti dit opurimanan dahai do daamot, om popoimbulai i' do kosimbayanan dot id dahai dit a' ogina-gina' om i poingompus. Om iri nopo kosimbayanan diri om agayo i' kopio ko' mantad di kosusaan diri dot ondung pitaladon.

¹⁸Tu' a' i' iyahai sumokot do montong dit okito, suwai ko' it a' okito o sorohon kopio dahai. Iri nopo it okito om oruhai i' do tumagak, nga' iri nopo it a' okito om a' i' tumagak om hino kasai' do gisom do poingompus.