Read Kadazan Dusun 2 KORINTUS 6 Bible Online

2 KORINTUS 6 - Kadazan Dusun bible

2 KORINTUS 6

¹Om iyo nopoddi tu' muhup iyahai do Kinorohingan do kumaraja', om pokionuon no kopio dahai dot a' dokoyu ruba-rubaton i kosonongo' do Kinorohingan diri.

²Minomoros o Kinorohingan dot id Buuk do Kinorohingan do poingkaa, “Tontok di maso do kohubayaan ku, om norongou ku no iya', om notulung ku no iya' do tontok di tadau di kopomosian,” ka. Ilaai no kopio do baino' no i maso di kohubayaan diri. Om baino' i tadau di kopomosian!

³Om a' i' iyahai asanangan do pasalaon iti karaja' dahai. Om ka pogiddi do tumotos kopio iyahai dot a' momonsoi di sumiliu do paantakan do tulun do papasala' diti karaja' dahai.

⁴Suwai ko' nunu nopo o wonsoyon dahai om iri no o maan dahai do popointalang do susuhuon iyahai'd Kinorohingan. Tu' alanut i' o ginawo dahai do tontok di noontok iyahai do mogisuayan o koinggoritan:

⁵tu' nokoumbal i' iyahai do ninggorit, om pinogiil om pinogiuuhupan iyahai'd tulun do mumang; om monotos kasai' i' iyahai do kumaraja' om asaru' dot a' koodop om asaru' dot aiso' o takanon.

⁶Om iri no i kotulido' om i koiloo' om kolonuto' om kosonongo' do ginawo dahai o ralan dahai do pinopointalang do susuhuon iyahai'd Kinorohingan. Om sumondiu iyahai di Rusod do Kinorohingan do monguhup dahai, om mikuwo'd kosianan dahai dit otopot

⁷om popinsusui iyahai di habar do mantad id Kinorohingan om pointalangon dahai do susuhuon iyahai do Kinorohingan dot i kuasa' do Kinorohingan o popointalang. Om poingigit kasai' dahai i korohian do Kinorohingan do maan dahai do ponokorapo-rapo do sumaap. Om maan dahai do pongintirung do tinan dahai.

⁸Om pusohon iyahai nga' indaraaton i', om royohon iyahai nga' pasalaon indo. Om mulong po dot otulid o wonsoyon dahai nga' tondoson i' iyahai do goudut.

⁹Om sorohon piya iyahai'd tulun dot a' abantug nga' kotutun ngai' i' o tulun dahai. Om mulong pod sorohon iyahai'd tulun do napatai no nga' poimpasi kasai' i' iyahai. Om mulong po dot oinggorit iyahai nga' a' i' iyahai apatai.

¹⁰Om mulong po do potongobon o ginawo dahai, nga' otood kasai' i' iyahai, om mulong po do mosikin o kokitanan dahai nga' ogumu' no o tulun do nakakaya' dahai. Om aiso' no o nunu-nunu dahai dot okito'd tulun nga' otopot nopo kopio om iyahai nogi' o kasanganu do koinsanai'd nunu nopo.

¹¹Oi tobpinai-tobpinai di kosianan ku do hiti'd Korintus! Nokoboros ngai' no dahai dot id dokoyu om aiso' no o linisok-lisok dahai. Om nokosunud ngai' no dahai it id suang do ginawo dahai.

¹²Om aiso' no o kosoit-soiton do ginawo dahai dot id dokoyu, nga' iyokoyu nogi' o haro o kosoiton do ginawo dot id dahai.

¹³Dinondo nodti om pologoso' oku no do moro-boros dot id dokoyu do miagal do pomomoros ku'd tangaanak kopio ku. Om poboroso' ngai' no dokoyu iyokoyu dot id dahai it id suang do ginawo dokoyu.

¹⁴Kada' kou sokodung di tulun dit a' otumbayaan di Yesus; dot a' i' apatut o miagal diri. A' no kopio milo do miiso' ot osonong om it araat! Om a' milo do misugku' o tanawau om totuong.

¹⁵Om a' milo o Kristus do monokisokodung do rogon. Nunu toi o kopiontok-ontok do pomusarahan do tulun do Kristian om i tulun dit okon ko' Kristian?

¹⁶Om a' milo do piisoon o walai do Tuhan om walai do tingolig. Om iyati' no o walai'd Tuhan, i Kinorohingan di poimpasi. Tu' miagal di nokoboros do Kinorohingan do poingkaa, “Mundorong oku nondo dot id pogialatan diyolo', om miyon oku dot id sugku' diyolo'. Om sumiliu oku nondo do Kinorohingan diyolo', om iyolo' nga' osiliu nondo do tulun di songonuon ku.

¹⁷Iyo nopoddi, om tongkiad no do mantad id tulun dit a' kotutun do Kinorohingan, om kada' ongoi sugku' diyolo'. Om kada' no ongoi ponongkuro-kuro di sosomu', om romiton ku indo iyokoyu.

¹⁸Om sumiliu oku nondo do Tapa' dokoyu, om sumiliu kou do tangaanak ku, kad Tuhan it Osundu Kopio,” ka.