Read Kadazan Dusun 1 YOHANIS 1 Bible Online

1 YOHANIS 1 - Kadazan Dusun bible

1 YOHANIS 1

¹Tonsi nopo kopio do surat diti om pasal di Boros di manahak do koposion, iri no i Boros di hino mantad do mantad di timpuun i'. Norongou no dahai iri, om nokito dahai do mato kopio dahai o nokokito. Om nosonsod kopio dahai iri, om noigitan kopio do palad dahai.

²Tontok di pinointalang i koposion diri, om nokito i' kopio dahai iri. Om iri noddi o koponusuyan dahai do pasal diri. Posusuyon dahai dot id dokoyu o pasal di koposion dit otopot kopio om i poingompus, i poinsugku' mantad do Tapa' om i nokointalang no dot id dahai.

³Tu' nunu nopo i nokito om i norongou dahai, om iri no o posusuyon dahai dot id dokoyu, om kopuriman kou i' iyokoyu do kosonongo' di koposion di koiso' dot id Tapa' om id Tanak dau, i Yesus Kristus.

⁴Kinoponulisan nopo dahai'dti om popotood kopio do ginawo toko'.[1]

⁵Iti no o habar di norongou dahai do mantad id Tanak dau, i posusuyon dahai dot id dokoyu: Kinorohingan nopo om tanawau, om aiso' no kopio o totuong dot id suang dau.

⁶Ondung momoros toko' do koposion toko' nopo om nokoiso' no dot id dau, om otuong indo o kowoyo-woyoon toko', om mongudut toko' noddi dot id boros toko' om id wonsoyon toko'.

⁷Nga' ondung poimpasi toko' dot id suang do tanawau do miagal do Kinorohingan tu' id suang do tanawau, om mogiuulud toko' no om ogirot o piuludan toko', om iri no i raha'[2] di Yesus, i Tanak dau, o momolihung dati' do mantad id koinsanai do dusa toko'!

⁸Ondung momoros toko' dot aiso' o dusa toko', om monipu' toko' no do tinan toko'; om a' i' hino o Kinorohingan dot id suang do ginawo toko'.

⁹Nga' ondung okunon toko' dot id Kinorohingan o koinsanai di dusa toko', om sulungon i' dau i batos dau om wonsoyon dau it otulid. Om ompunan i' dau o koinsanai di dusa toko' om lihungan toko' dau do mantad id koinsanai di nowonsoi toko' di kasala'.

¹⁰Nga' ondung momoros toko' dot aiso' o dusa toko', om roitan toko' no do goudut o Kinorohingan om a' toko' pinoopi' dot id suang do ginawo toko' i boros do Kinorohingan.