Read Kadazan Dusun 1 YOHANIS 2 Bible Online

1 YOHANIS 2 - Kadazan Dusun bible

1 YOHANIS 2

¹Oi tangaanak ku! Koponulisan ku nopodti dot id dokoyu om mogodu dokoyu do momonsoi'd dusa. Nga' ondung haro i nokowonsoi'd dusa, om haro i' o mogobi' dati', iri no i Yesus Kristus, it otulid diri; om moro-boros indo iyau dot id Tapa' do mogobi' dati'.

²Om i Yesus Kristus no o popomilo do koinsanai di dusa toko' dot oompunan. Om okon i' ko' iri noo i dati'd dusa ot oompunan, suwai ko' iri nogi' i dusa do koinsanai'd tulun.

³Ondung mumboyo' toko' do koinsanai di ponuhuan do Kinorohingan, om iri no o popointalang do kotutun toko' do Kinorohingan.

⁴Tulun nopo di momoros do, “Kotutun oku do Kinorohingan,” ka, om a' i' iyau mumboyo' ngai' di ponuhuan do Kinorohingan, om oudut i' i tulun diri, om a' i' hino o Kinorohingan dot id suang do ginawo dau.

⁵Nga' tulun nopo di mumboyo' di boros do Kinorohingan, om aayi-ayi' no kopio o ginawo di tulun diri dot osianan do Kinorohingan, om iri no o popointalang do nokoiso' toko' no dot id Kinorohingan.

⁶Isai nopo o tulun do momoros do nokoiso' iyau dot id Kinorohingan, om mositi' no do momit iyau do kowoyo-woyoon do Kristus.

⁷Oi tobpinai-tobpinai di kosianan ku! Iti nopo tulison ku'dti om okon i' ko' ponuhuan do wagu. Iti nopo om ponuhuan i' di laid, i nokosunud no dot id dokoyu do mantad poddi kotumbayaai kou i' di Kristus; iri no i habar do mantad id Kinorohingan, i norongou dokoyu dit id gulu ko' iri.

⁸Mulong piya do miagal diri, nga' iti nopo ponuhuan diti tulison ku om wagu i'; tu' iri nopo i katapatan diti, om okito i' dot id kowoyo-woyoon di Kristus om okito nogi' dot id kowoyo-woyoon dokoyu. Tu' manus-tanus no o totuong om tumitiu no i tanawau dit otopot.

⁹Tulun nopo di momoros dot id suang iyau di tanawau, nga' araatan indo iyau di tobpinai dau, om id suang kasai' pod totuong i tulun diri do gisom piya do dinondo.

¹⁰Tulun nopo dit osianan do tobpinai dau, om poimpasi no iyau'ddi dot id suang do tanawau, gisom dot aiso' no dot id suang do kowoyo-woyoon dau i kobungou do tulun do suwai[3] dot aratu' dot id dusa.

¹¹Nga' tulun nopo dit araatan do tobpinai dau, om id suang po iyau do totuong. Manau-panau po iyau dot id suang do totuong, om a' i' iyau koilo ondung hinonggo o pakayaan dau, tu' iri no i totuong diri o kobungou dau dot a' kokito.

¹²Monulis oku pogi' dot id dokoyu, oi tangaanak ku, nga' noompunan no i dusa dokoyu dot i Kristus o kinopongompunan.

¹³Monulis oku pogi' dot id dokoyu, oi komolohingan do kusai, nga' nokotutun kou no dau, i hino mantad do mantad di timpuun i'. Monulis oku pogi' dot id dokoyu oi tangaanakwagu nga' naala' no dokoyu i Yaraat.

¹⁴Monulis oku pogi' dot id dokoyu, oi tangaanak, nga' nokotutun kou no do Kinorohingan i Tapa'. Monulis oku pogi' dot id dokoyu oi komolohingan do kusai nga' nokotutun kou no di Boros di hino mantad do mantad di timpuun i'. Monulis oku pogi' dot id dokoyu, oi tangaanakwagu nga' ongokoris kou i', om id suang no do ginawo dokoyu i boros do Kinorohingan, om naala' dokoyu i Yaraat.

¹⁵Kada' kou kosianai diti pomogunan, ko' nunu nopo it id suang diti pomogunan. Ondung osianan kou diti pomogunan om a' kou no osianan do Tapa'.

¹⁶Koinsanai dit id suang do pomogunan diti --- i korohian do kowoyo-woyoon do tulun di kidusa, it okito do tulun om korohian nondo om i kopinggaya-gayaan do tulun --- koinsanai'ddi om okon i' ko' mantad id Tapa', suwai ko' mantad i' do hiti'd pomogunan.

¹⁷Iti nopo pomogunan om koinsanai di hiti'd pomogunan, i korohian do tulun, om maso no do tumanus. Nga' tulun nopo di tumanud do korohian do Kinorohingan, om poimpasi kasai' i' do gisom do poingompus.

¹⁸Oi tangaanak ku, oruhai no do kopupuson diti pomogunan! Nosunudan mantad kou no do rumikot nondo i Pisangod do Kristus; om dinondo'dti nga' ogumu' no o tulun do nokointalang do sumaap do Kristus. Om iri no o koilaan dot oruhai no o kopupuson do pomogunan.

¹⁹Iri nopo i pisangod do Kristus diri om iri no i tulun di tuminongkiad do mantad id dati', tu' otopot nopo kopio om okon i' ko' id suang iyolo' di sinompuruan do tulun toko'. Ondung id suang daa iyolo' do sinompuruan do tulun toko', om atantu' no do poinsugku' kasai' i' daa iyolo' dati'. Nga' tuminongkiad i' iyolo' dati', om oilaan no kopio dot aiso' i' o tongosongulun piya do mantad id pogialatan diyolo' dot otopot kopio do poinsuang do sinompuruan toko'.

²⁰Nga' iyokoyu nopo om nakaramit no di Rusod do Kinorohingan di pinatahak di Yesus Kristus om iri noddi o nokotutun-tutun dokoyu di ponudukan dit otopot.

²¹Koponulisan ku nopodti dot id dokoyu om okon i' ko' it a' kou nokotutun di ponudukan dit otopot, suwai ko' i nokotutun kou'ddi o kinoponulisan ku, om koilo kou nogi' dot aiso' no o tudut dot id suang di ponudukan dit otopot diri.

²²Iri nopo i goudut om iri no i tulun di momoros dot i Yesus nopo om okon i' ko' i Raja' di Gampamasi di pinabatos do Kinorohingan. Iri nopo tulun diri om Pisangod i' do Kristus; tu' a' i' iyau otumbayaan di Tapa' om a' otumbayaan di Tanak.

²³Tulun nopo dit a' otumbayaan di Tanak, om komoyon nopoddi nga' a' no iyau rumamit di Tapa'. Om tulun nopo dit otumbayaan di Tanak, om komoyon nopoddi nga' rumamit no iyau di Tapa'.

²⁴Iyo nopoddi, om mositi' no do poiyonon kopio dokoyu dot id ginawo dokoyu i habar di norongou dokoyu do mantad di kotumbayaai kou i'. Ondung podulon kopio dokoyu i habar diri, om poingiso' kasai' kou no dot id Tanak om id Tapa'.

²⁵Om iti no o pinabatos di Kristus dot id dati': i koposion dit otopot kopio om i poingompus.

²⁶Om tulison ku dot id dokoyu o pasal di tulun di maso do tumotos do monipu' dokoyu.

²⁷Nga' pasal nopo dokoyu, om nakatahak no di Kristus i Rusod dau dot id dokoyu. Om solinaid nopo di Rusod dau dot id suang dokoyu, om a' no minog do haro o tulun do suwai do monuduk dokoyu. Tu' iri no i Rusod do Kristus o monuduk dokoyu do koinsanai do nunu nopo; om nunu nopo i potudukon dau om ongotopot ngai' no, om okon i' ko' tudut. Iyo nopoddi, om mositi' no do mumboyo' kasai' kou di potudukon di Rusod diri, om poingiso' kasai' kou dot id Kristus.

²⁸Iyo nopoddi, oi tangaanak ku, om mositi' no do poingiso' kasai' kou dot id Kristus, om katama' toko' i' do sumolowot dau do korikot iyau, om a' toko' lumisok dot ointingayaman.

²⁹Nokoilo kou no do Kristus nopo om tumanud i' do korohian do Kinorohingan. Iyo nopoddi, om apatut no do koilo kou do pointikid-tikid do tulun do tumanud di korohian do Kinorohingan om tangaanak nod Kinorohingan.