Read Kadazan Dusun 1 YOHANIS 3 Bible Online

1 YOHANIS 3 - Kadazan Dusun bible

1 YOHANIS 3

¹Antangai toko' pogi' o kogoyoo' do kosianan do Kinorohingan dati', gisom do nakun toko' dau do tangaanak dau. Om otopot i' kopio do tangaanak toko' do Kinorohingan. Iri no ot a' kotutun-tutun dati' diti pomogunan dit araat, tu' a' i' iti pomogunan kotutun do Kinorohingan.

²Oi tobpinai-tobpinai di kosianan ku! Tangaanak toko' noddi do Kinorohingan do baino', nga' iri nopo i koinan-inano' toko' do koimbagu om a' po nokointalang kopio. Nga' oilaan toko' i' do korikot nopo o Kristus, om koiyo toko' nondo dau, tu' okito toko' nondo i koinan-inano' kopio dau.

³Koinsanai'd tulun di haro o soro-sorohon do miagal diti dot id Kristus, om mositi' no do mumbangan-bangan kopio om olidang i' kopio iyau, om olihungan do mantad id dusa do miagal do Kristus tu' olidang.

⁴Tulun nopo di momonsoi'd dusa, om tumolibamban no iyau dit oturan do Kinorohingan; tu' komoyon nopod dusa om i tumolibamban dit oturan do Kinorohingan.

⁵Koilo kou i' do kinorikatan nopod Kristus om mongoi pananus do koinsanai do dusa'd tulun,[4] om aiso' i' o dau'd dusa.

⁶Koinsanai di tulun di nokoiso' dot id Kristus om a' no iyau tumilombus do momonsoi'd dusa. Tu' tulun nopo di tumilombus nopo do momonsoi'd dusa, om a' i' insan kokito do Kristus om a' kotutun dau.

⁷Oi tangaanak ku, kada' dokoyu pologoso' ot isai nopo o tulun do mamalid dokoyu. Tulun nopo di momonsoi do korohian do Kinorohingan om tanak nod Kinorohingan, do miagal do Kristus tu' Tanak do Kinorohingan.

⁸Nga' tulun nopo dit a' tumingkod do momonsoi'd dusa om tangaanak nod Rogon, tu' Rogon nopo om kidusa mantad, do mantad di timpuun i'. Om iri no o kinorikatan di Tanak do Kinorohingan tu' mongoi pamaraag di karaja' do Rogon.

⁹Tulun nopo di nosiliu do Tanak do Kinorohingan, om a' no tumilombus do momonsoi'd dusa, tu' haro no dot id dau i kowoyo-woyoon do Kinorohingan. Om a' noddi iyau milo do tumilombus do momonsoi'd dusa tu' Kinorohingan no o Tapa' dau.

¹⁰Iti no o pisuayan do tangaanak do Kinorohingan om i tangaanak do Rogon: Isai nopo it a' momonsoi do korohian do Kinorohingan ko' it a' osianan do tobpinai dau, om okon no ko' tanak do Kinorohingan.

¹¹Mantad po di timpuun i' om nokosunud no dot id dokoyu o habar diti: Mositi' no do mogiinsian-sian toko'.

¹²Kada' toko' no omit di Kain, i nosiliu do tanak do Rogon om minamatai di tobpinai dau. Nokuro tu' minamatai i Kain di tobpinai dau'ddi? Kinapamatayan nopo dau di tobpinai dau nga' kasala' i winonsoi dau. Nga' iri nopo i winonsoi di tobpinai dau om koontok i'.

¹³Iyo nopoddi, oi tobpinai-tobpinai ku, om kada' kou no kosuayai do karaatan kou piya do tulun do hiti'd pomogunan.

¹⁴Noilaan toko' i' do nokosoliwan toko' no do mantad id kapatayon, om nakakaa toko' no dot id koposion. Noilaan toko' i' iri, tu' osianan toko' no di tobpinai toko'. Tulun nopo dit a' osianan om komoyon nopoddi nga' porintaon kasai' po iyau do kapatayon.

¹⁵Tulun nopo dit araatan do tobpinai dau om gampamatai i', om koilo kou no do tulun nopo di gampamatai om aiso' no o koposion dit otopot kopio om i poingompus.

¹⁶Om iyo nodti o koila-ilaan toko' do kowoyo-woyoo' do mogiinsian-sian. Nakatahak nod Kristus o koposion dau do minatai do suminowoli dati'. Iyo nopoddi, om mositi' no do patahakon toko' o dati' do koposion gisom do matai do bagi'd tobpinai toko'!

¹⁷Ondung haro o tulun dit aiso' no o kokurangan do kokito di tobpinai dau di haro o kokurangan, om a' indo iyau monulung di tobpinai dau'ddi, om poingkuro nondo iyau'ddi do milo do momoros dot osianan iyau do Kinorohingan?

¹⁸Oi tangaanak ku! Kada' toko' pomoros dot osianan dot id kabang noo ko' boros no toomod dot osianan. Mositi' no dot otopot kopio dot osianan toko', om i kointalang kopio dot id wonsoyon toko'.

¹⁹Iyo noddi o koila-ilaan toko' do nokohompit toko' do tangaanak do Kinorohingan dit otopot, om osimbayan o ginawo toko' dot id toguang do Kinorohingan.

²⁰Koilo toko' i' dot ondung pasalaon toko' do ginawo toko', om toilaan nopo do Kinorohingan om agayo po ko' i toilaan do ginawo toko', om oilaan toko' dot iyau nopo om koilo i' do koinsanai'd nunu nopo.

²¹Iyo nopoddi, oi tobpinai-tobpinai di kosianan ku, om ondung a' toko' pasalaon do ginawo toko', om katama' toko' no do tumimbaba' do Kinorohingan.

²²Om nunu nopo i pokionuon toko' dot id dau, om aanu toko' no iri, tu' minumboyo' toko' i' do koinsanai di ponuhuan dau om minomonsoi toko' di kohubayaan dau.

²³Iti no o ponuhuan dau dati'. Mositi' no dot otumbayaan toko' di Tanak dau, iri no i Yesus Kristus, om mositi' no do mogiinsian-sian toko' do miagal di pinonuhuan do Kristus dot id dati'.

²⁴Koinsanai'd tulun di mumboyo' do ponuhuan do Kinorohingan om poingiso' no dot id Kinorohingan, om Kinorohingan nga' poingiso' no diyolo'. Om oilaan toko' no do poingiso' o Kinorohingan dati' tu' nakatahak no dau dati' i Rusod dau.