Read Kahua HAGONEGAHANI 12 Bible Online

HAGONEGAHANI 12 - Kahua bible

HAGONEGAHANI 12

¹Na Araha God ki tamasi tanga o Abaramo ki vi: “Gu pania i pasimu ma ko panira na goamu ma ngaira i ruma iana o vaemamu. Go arâ nga tanga na agua, gê page usia tangago.

²Inê be hagarakunira na raraha iamu, hanana ga rakorako na varo ninuni iamu. Inê be haganahunigo renia na ramana ma be katoa ke rongo raha na atamu ma na enoni getera ka page nahunia na marapeha renigo igo.

³Na ani i obania na ramana tangago igo inê be haganahunia renia na ramana. Na ani i obania na eraha tangago igo inê be hagaitangia renia na eraha. Na enoni hato i maveta ka page avarasiê, kê korokoro tangara manga gê koro tangago igo.”

⁴Matena o Abaramo ki tonga na harisi 75 iana, ngaia ki pania i Harane manga i visia na Araha tanga. O Loti ki râ henia.

⁵O Abaramo ki merarâ ka Sarai kaniana mo Loti o mona henigi na nahuninga hato iata ma henira na kare vurivuri hato iata ga nahunira i Harane. Vikana ngaira ka tavoraha tanga i Kanani. Matena ga ata râ i Kanani,

⁶o Abaramo ki tavoraha ki râ nga mataro me ki ata igê na apinige apuna i More, na agua apuna i Sikemi. I na matena ngekana na Kananita ka oga mêngara igê.

⁷Na Araha ki vora tanga o Abaramo ma ki vi tanga, ki vi: “Ikê nga na agua, gê page haganahunira na raraha iamu renia.” I ngekana o Abaramo ki tagarahia igê na bea na panga ni vogasiha tanga na Araha, i vora tanga.

⁸I murina ngekana o Abaramo ki râ nikâ tangagi na hungani i na apanena akê na hinua raha i Betele. Ngaia ki hagêrasia na ruma na gahu iana i berarogaterua na hinua i kereso i Betele ma i kerekê i Ai. I ngekana ngaia ki tagarahia nikâ igê na bea na panga ma ki vogasia igê na Araha.

⁹Ma hemuri ngaia ki tavoraha nikâ ma ki râ surigi na hinua i Kanani i na apanena bê râ tanga i Esipito.

¹⁰I ngekana ki na magêha i Kanani. Na magêha ki raha ngavê. Tahema o Abaramo ki râ nga tanga i Esipito, hanana vi gâga noga i ngekana.

¹¹Matena i sugia ma vige pupu tarê i Esipito, ngaia ki vi tanga ka Sarai kaniana, ki vi: “Igo na gete go bâkoro ngavê.

¹²Manga vi na me ni Esipito ma ka bâsigo, ngaira ka page girara, vi igo kani kaniaku. Vikana ngaira ka page nahuiê kê meme ma ka nakago so igo.

¹³Hoi, go vivi ma, vi kesiku kanigo. Vikana ngaira ki asa vige nahuiê kê meme, ma ka page katoê maninga hete.”

¹⁴Matena i pu tarê i Esipito, na me ni Esipito ka boretenia kaniana, suria ngaia ki bâkoro ngavê.

¹⁵Tani na kariana na maneraha i marungia i Esipito ngaira ka bâsia nogata, ma ka hagarongoa na maneraha iata renia vi na gete ga bâsia ki bâkoro ngavê. Vikê ngaira ka torea ka Sarai tanga na ruma raha iana na maneraha.

¹⁶Renia ngaia ka Sarai tahema na maneraha ki katoa maninga o Abaramo ma ki haganahunia renira rako na togoha na sipi, na goti, na puruka, na tonki, na enoni vurivuri ma na kamelo.

¹⁷Ma suria na maneraha ki torea ka Sarai, tahema na Araha ki hagaitangira ngaia ma na kariana renigi na maeha era.

¹⁸Hemuri na maneraha ki vi, ka guhia me o Abaramo. Ngaia ki hagatea, ki vi: “Go he nakê? Hega go pe hagagirarê renia, vi ngaia kani kaniamu?

¹⁹Tanu hega go vi, vi ngaia kani kesimu? Tahema gê torea manga vi na gete iaku. Ia kaniamu! Gu mehura!”

²⁰Na maneraha ki bonasira na kariana ka torea o Abaramo ma ka paia hura tenia i Esipito henia kaniana ma henigi na ara ni nahuninga hato iana.