Read Kahua HAGONEGAHANI 13 Bible Online

HAGONEGAHANI 13 - Kahua bible

HAGONEGAHANI 13

¹O Abaramo ki pania i Esipito ma ki aporo tanga i Negeve i Kanani. Ngaia ki merâ kaniana henigi na ara ni nahuninga hato iana. O Loti ki takua.

²O Abaramo ki ruruguha ngavê. Ngaia ki nahunira rako na sipi, na goti, na puruka ma na siliva ma na golo nikâ.

³Tenia i ngekana ngaia ki aporo surigi na hinua bê râ tanga i Betele. Ngaia ki tariha aporo râ igê na agua i beraragaterua na hinua i Betele ma i Ai, na agua i hagêrasia i nago igê na ruma na gahu iana,

⁴ma ki tagarahia igê na bea na panga ni vogasiha. Ngaia ki vogasia igê na Araha.

⁵O Loti ki nahunira nogana na sipi, na goti ma na puruka henira na ahemata iana ma na kariana.

⁶Tahema na bena ni go i ngekana ki pe ararirerua o Abaramo mo Loti, hanana vigaru gâga haku igê, suria na togoha iaterua ka rako era.

⁷Tahema na mane ga bâsurira na togoha iana o Abaramo ma na mane ga bâsurira na togoha iana o Loti ka heariha. I na matena ngekana na Kananita ma na Pirisita ka gâga mêngara i ngekana.

⁸Vikê o Abaramo ki vi tanga o Loti, ki vi: “Igerua na vetage mane. Na kariamu ma na kariaku ki pe arari vige heariha.

⁹I arari, garu oga hegitigi. Gu atea na apanena go obania. Manga go arâ i ta apanena inê kê arâ i ta apanena. Manga go bêbêso, inê kê bêbêkê, se manga go bêbêkê, inê kê bêbêso.”

¹⁰O Loti ki bâ rârâ ma ki tarahua, vi na maruguna hagenani i ve i Jotano mataro me i Soare ka apia na ve karu. Ngaia ki bâ manga na agua bâkoro i Etene, se manga na mako koro i Esipito. I ngekana kani i nago tarana na matena na Araha ki ruhuruhurerua igê i Sotome me Gomora.

¹¹Vikê o Loti ki atea na maruguna hagenani i ve i Jotano ma ki aharaga ki bêkê. Ngekana nga hanana garu oga hegitigi.

¹²O Abaramo ki oga so ma i Kanani. O Loti ki râ tangagi na hinua igê na maruguna i ve i Jotano ma ki hagêrasia na ruma na gahu iana hagarangia na hinua i Sotome.

¹³Na enoni i Sotome ka erataga ngavê ma ka haritohea na Araha.

¹⁴Matena i bani râ o Loti, na Araha ki vi tanga o Abaramo, ki vi: “Igê na agua go oga igê ikê go bâbâ rârâ maninga igê na ara ni agua rihigo.

¹⁵Inê be haganahunigamu, igo ma na raraha iamu, renigi na ara ni agua ni mako go bâsigi. Na agua ngegana mu page nahunigi hagahu.

¹⁶Inê be hagarakunira na raraha iamu, ma ki asa ngavê ta na enoni, vige girara ge tomanira. I mangagi na momogani na one i maveta hagenani i bara tanga ta na enoni, vige tomanigi.

¹⁷Hoi, gu râhia na mako hagenani, gê page haganahunigo renia.”

¹⁸Vikê o Abaramo ki tavoraha nikâ, ma ki râ ki oga tonge hagarangigi na apinige apuna iana o Mamere hagarangia i Heberoni. Ma i ngekana ngaia ki tagarahia igê na bea na panga ni vogasiha tanga na Araha.